Read kirikeni Fịafịa Nime 94 Bible Online

Fịafịa Nime 94 - kirikeni bible

Fịafịa Nime 94

¹Nyanaḅọ, ị́rị́ anị fomuḅara se nweni pịrịpịrị Tamụnọ-ẹ; ị́ya ịganị mị ḍiepakụma!

²Ị́rị́ anị ḅẹrẹkọn se nweni mgba pịrịḅịaye-ẹ; sịsẹ se opuaye mịẹapụ ma la-na-gbẹịn-a fomuḅara se ini pịrị!

³Sitịḅịnyana apụma ini ḅieḅẹlẹ mun nde sịkị laḅe? Anị ḅọlọ mun nde sịkị laḅe, Nyanaḅọ?

⁴Siaye mịẹapụ ma ini opuaye mịẹ mun nde sịkị laḅe, se pa ini mịẹ siaye ma se ḅụbomaḅe?

⁵Ini ị́ya tomonima ḅụ akụma aḅẹ, Nyanaḅọ; sime ị́ pịrị apụma ini ini pụnda aḅẹ.

⁶Ini deapụ na, ḍa-apụ na, nyengiapụ na, oforika apụma ḅaamẹ, mịna ama ḅie anga igoniapụma ini ini ninimẹ.

⁷Ini nwọḅẹmẹ, “Nyanaḅọ Ḅe ọ̀ wa ọrịkẹ; Izrẹl Tamụnọ Ḅe ò nemikẹ.”

⁸Ị̀ya tomoni, nde ómine ọkọsime opu oḅoriapụ sọ ọkụ? Nde sịkị ó yeḍawọ nemiḅe?

⁹Mịna ḅeri ma tẹmẹ Tamụnọ Ḅe—ò ye naa ẹka? Mịna tọrụmgbọlụma tẹmẹḅọ ḅe—ò ye ọrị ẹka?

¹⁰Ori ịganị sẹma pịrịmẹ—ori ineda fomuḅara se ini pịrị ẹka? Ori anị yese tomoni mamgba telima arịḅọ ḅe—ọ̀ gbọrị nemisọ nyanaka?

¹¹Nyanaḅọ Ḅe ini koroma arịye ò nemimẹ; ini koromaḅụ kọn àrị ọkwẹịnma yeḅụ oforika ọkụ ò nemimẹ.

¹²Nyanaḅọ, ị́ yese telima apụma nde inia ḅieḅẹlẹḅịa ọkụ, anị ị́ya olokoma ị́ nwọse telima apụma!

¹³Tọrụsiọrị enema ḅie ị́ ịnyọsara se ini pịrịmẹ, ọkịmun ini olulu soku se ḍẹịntu sitịḅịnyana apụma kunḅịa sịkị lamẹ.

¹⁴Nyanaḅọ Ḅe oria tomonima ori ini sarakoroma ẹkẹ; sime ọ̀ pịrị apụma, ori inia ḅụ ḅarasin ẹkẹ.

¹⁵Karakara ḅẹrẹkọn kpoto ḅẹrẹkọn a warịma ḅie simeḅịa, se karakaraye mịẹapụ mamgba ḅarapụnụ anị pịrịḅịa.

¹⁶Tụḅọ sịsẹ se ị̀ ḅụ sọ se sitịḅịnyana apụma na bịamaḅe? Tụḅọ ị̀ya kiri ọkị se siaye mịẹapụ ma na bịamaḅe?

¹⁷Nyanaḅọ Ḅe ḅarachụa ị̀ pịrịka ọkụma mgbọkụ sịkịfamaka ḅaraḅụ à mun fịapụ ama mị lasam.

¹⁸À nwọḅẹmẹ, “À ḅịkịaḅẹ”; ọkụma ị́ya kunoka ḅẹlẹma mị, Yei Nyanaḅọ, ị̀ ọlọchịẹmamẹ.

¹⁹Ye ị̀ ḅụfụkama se à koroma sịkị goyegoye, ị́ ḅieḅẹlẹ se ị̀ kuḅie kụrọmamẹ.

²⁰Siḅẹrẹ-kọnkọn apụma ị́ inina-mịẹgbolomaye nyanakẹ, anị siye mị re anị karakaraye-ẹ nwọḅẹ àrị apụma

²¹anị siḅẹrẹ ḅia karakaraye mịẹapụ ma pịrị, pịkị ḅaa ḅẹrẹkọn gbọrịye sọ mịẹka apụma pịrịpịrị apụma.

²²Ọkụma Nyanaḅọ Ḅe ori owusọ ị̀ pịrịaḅẹ; ị̀ Tamụnọ Ḅe ori ị̀ ḅọị aḅẹ.

²³Ò fomuḅara se ini pịrịḅịa, inia sitịḅịnyana mịẹmịẹaye ma gose, ọ̀ pịkị inia sima gose ini ḅaaḅịa; Nyanaḅọ mịna Tamụnọ Ḅe ori ini ḅaaḅịa.