Read kirikeni Fịafịa Nime 96 Bible Online

Fịafịa Nime 96 - kirikeni bible

Fịafịa Nime 96

¹Ómine ịwọ nime chu Nyanaḅọ Ḅe boma! Ó nime chu Nyanaḅọ Ḅe boma tomonikiri mị mgba!

²Ó nime chu Nyanaḅọ Ḅe pịrị, se ò boma! Eneḅeneḅene iḅi ḅẹrẹ mị ọ́ nwọ ḍuko finjima na ọ̀ wa ḍụasam.

³Oria boma mị ḍukopakụma sẹma pịrị, ọ̀ nwẹngị tomoni mamgba pịrị opu-a fịrịma.

⁴Nyanaḅọ Ḅe opuḅọ-ẹ, ọ́ pịkị opuḅara nwọse ò boma; ómine osi se ọ̀ pịrịtẹịn oru mamgba nẹngị.

⁵Jịn a sẹ oru mamgba ḍumo nyanaka aye-ẹ, ọkụma Nyanaḅọ Ḅe so ma tẹmẹmẹ.

⁶Boma na amanyana opu na, ò kelemamẹ; kụrọ na iḅi na oria Oputẹkẹwarị ḅie ḅeinmẹ.

⁷Ọ́ Nyanaḅọ Ḅe boma sẹkiri ḅie sime tomoni mamgba; ómine oria opu mị na kụrọ mị na boma.

⁸Ọ́ Nyanaḅọ Ḅe opu nyana ẹrẹ mị boma; ḍiepịrịaye agba ọ́ nwọse oria Oputẹkẹwarị ḅie ḅo.

⁹Fịafịaḅọ Ḅe tọrọkọ ọ́ tịḅịtu, ọ̀ pakaḅosa ḅẹḅẹ; ọ̀ tọrọkọ ọ́ ḅụgeregere nyana sẹkiri mị mgba!

¹⁰Ḍuko sẹ mamgba pịrị, “Nyanaḅọ Ḅe anị amanyanaḅọ-ẹ! Sẹkiri mị anị sime nyọ ḅụ anị simeḅịa, ini ineda anị dekisin ẹkẹ; ọ̀ karakara ḅẹrẹkọn tomonima pịrịḅịa.”

¹¹Ó ḅieḅẹlẹ, sẹkiri mị na so mị na! Ekerea, tọrụ, ị́ ḅie sime tẹmẹaye mamgba na;

¹²ozu mamgba ḅieḅẹlẹ, pịkị ọ́mịna ḅie sime ini tẹmẹaye mamgba na! Piri ḅie sime ejema àrị ḅieḅẹlẹ ḅụ olokuḅịa,

¹³Nyanaḅọ Ḅe ò ḅo sẹkiri ḅie ḅẹrẹtọn ḅịa sịkị. Ọ̀ ḅẹrẹtọn tomonikiri ḅie apụma pịrịḅịa, karakaraye ḅụ na iḅiyemịẹḅara ḅụ na.