Read kirikeni Kaḅo Ma 1 Bible Online

Kaḅo Ma 1 - kirikeni bible

Kaḅo Ma 1

¹Devid ya Sọlọmọn, Izrẹl amanyanaḅọ ḅe kaḅo ma.

²Ma ma ḅarachụa ị́ pịrịḅịa kaḅo-ẹ, mịẹsosịkị ị́ nemi na, iḅi tetema na pịkị gbun ọkwẹịn fiearịaye na nwọ kaịnḅoḅịa ọkụ.

³Àrị ine nemi na, iḅi ḍumo na karakarayemịẹḅara na iḅi anga ḅara na se ị́ telimaḅịa.

⁴Àrị pịkị ineda iḅiọkụma nemi nyanakaḅọ mịẹse ò yenemitẹịn se ye se asẹmẹnị awọ telimaḅịa, se mịẹsosịkị ini sọnị ḅo mịẹye nyana apụ sọḅịa ọkụ.

⁵Ma kaḅo ma àrị ineda nemi se chụa yenemi apụma pịrịḅịa, pịkịna datekerema se ḍiri-nemi apụma pịrịḅịa,

⁶anị mịẹsosịkị gbun-a kaḅo fiearịye ini nwọ kaịnḅoḅịa, pịkịna yenemi apụma kọnkọn ḅụfụkama ọkwẹịn ma na.

⁷Ị́ yenemiḅịa nwọ ḅẹḅẹ, ị́ tatarị Nyanaḅọ Ḅe osiḅịa. Yenemika apụma ini osi nyana nemi mị pịrịpịrịkẹ ini pịkịna yeḍawọ ḍọkịḍọkịkẹ.

⁸Ị̀ya owutọkụ, ị́ nyengima na ị́ ḍaḅe na ḍukoḍuko ị́ pịrịarịaye ma iḅiọkụma nwọ poki.

⁹Ini se ị́ telima àrị ayema àrị ḅarachụa ị́ ḍumo iḅimaḅịa, anị iḅi tịḅịfịna ḅịtẹ anịkanịka pụkọchụaye ḅụgbẹịn ọkụ anị nwọse ị́ mịẹse ị́ ḍikitọrụgbẹịnḅịa.

¹⁰Ị̀ya owutọkụ, simịẹapụ ị́ dairima ḅi sịkị, ḅịkị ini pịrịma.

¹¹Ini nemikase nwọ ḅẹmẹ na, “Ḅo, wa ḅaaḅịaḅọ wa mun nwọ ḍọkị! Ye wa owu se ḅẹrẹtịḅị nemikapụ paka ti-ḅaraḅụ!

¹²Wa ini koroḅịa sịkị, ḍumo ḅụ ini kpụrụkpụrụ waraḅẹ, ọkụma wa fịrị mị nwẹngị so se iniaḅụ ḅarasinḅịa sịkị ini fịsam!

¹³Wa ọfọịnḅoḅịa tọn-a ngọ wa nwọ nyana se mịna warịma ḅeinmaḅịa.

¹⁴Ḅo mịnaḅụ sọ, se wa furuḅo aye mamgba wa nwọ ḍiaḅịa.”

¹⁵Ị̀ya owutọkụ, ọkọ simeapụ na nwẹngịma, iniaḅụ ḅụsikima.

¹⁶Ini korukorukẹ siye mịẹḅụ. Sịkịmamgba nweni ḅaa gose ini ḅụkarakaramamẹ.

¹⁷Anị ḅụgbẹịnkẹ ịgbọ ị́ nwọ wasama koroma, ị́ kun ḍọkịarị feni ḅe ị́ ḍikiarịogbo,

¹⁸ọkụma ọkọsime-a tomonima ini ḍẹịntu iniaḅụ pịrịaḅẹ, ini ḅie sọ mun fịḅịa ḍẹịn.

¹⁹Furu mị, tọn-a sịkịḅụ, furuḅọ ḅe ḍumo anị nwọ ọkịkịmẹ, mịn anị paka kụrọḅara se jịn apụ aye ọkịkị apụma pịrịpịrị ọkụ-ẹ.

²⁰Poki! Nemi mị anị olokuḅụ chịnpụkọ se nweni pịrịaḅẹ ateli ma ḅie na fẹ ma ḅie ḅụ na,

²¹anị oloku pakụmaḅẹ, opuamama ḅe onu-a ḅọkọ ma ḅụ na pịkị tomoni gboloma se koḅirima nyọ goyegoye mgba na.

²²Yenemika apụ! Ó yenemika ọkịmun nde sịkị laḅe? Ó nemi ḍẹrị mun nde sịkị laḅe? Ngịsị ó ye ḍawọ ẹka?

²³Iḅiọkụma poki, àrị ịganị ómine pịrịarị sịkị, àrị iḅi tetema ọkwẹịn kọn ọ́ pịrịḅịa, à pịkịna ị̀ya nemi mị se ómine na ḍiaḅịa.

²⁴Anịsịkị ngịsị à pa ọ́ chịn aḅẹ, à chịn ḅịpị se ọ́ pịrịaḅẹ na ó ḅo, ọkụma ó poki ḍụkụkẹ. Ọ́ tọrụ pịkị ị̀ ḍiki ḍụkụkẹ.

²⁵Ị̀ya tetema ọkwẹịn mamgba ọ́ sịkịmẹ, ọ́ pịkịna ḅikẹ àrị ọ́ datekerema.

²⁶Anịẹrẹchị ó mun ḅụfụka ḅie sọḅịa sịkị, àrị ọ́ ḍẹrịḅịa. Àrị ó se tiye mịẹḅịa, ḅalafamaye ọ́ dapakaḅịa sịkị,

²⁷anịḅo ọ́ laḅịa sịkị so ḅo ọkụ, ḅalafama ḅụfụkama irisi fọrụ fie ọkụ, anịsịkị ḅụ ọyị na tọrụsiọrị na ḅie ọ́ sọsam.

²⁸Ó nemi mị ḍọkịḅịa anịsịkịḅụ, ọkụma à ḅiefie ẹkẹ. Tọn-a nyọ ḅụ ómine ị̀ ḍọkịḅịa, ọkụma ómine ị̀ ọrị ẹkẹ.

²⁹Anịatịḅị ọ́ taraka se yekaịnḅo mị wẹrịmamẹ, ọ́ pịkịna Nyanaḅọ Ḅe ḅịpị poki ḍụkụkẹ.

³⁰Ómine ị̀ya tetema ḅikẹ, ọ́ pịkịna ị̀ poki ḍụkụkẹ àrị ọ́ datekeremarị sịkị.

³¹Anịgose, sime ọ́ pịrị gbẹịnye ọ́mịna ḅara laḅịa, ọ́mịna mịẹmịẹaye ma pịkị ọ́ mịẹse ómine obiḅịa.

³²Yenemikapụ ma ini fịmẹ anịatịḅị ini nemi sịkịmẹ. Yenemikapụ ma inia yeseyechịnka ḅụ ini fịmẹ.

³³Ọkụma ị̀ ḅịpị pokiḅọ goyegoye mamgba nụḅọ ḅọị nyọ nyanamẹ. Nụḅọ ḍụaḅọrọma nyanamẹ, nụḅọ gose ḅalafaḅịaye ngịsị ofori-ẹ.