Read kirikeni Kaḅo Ma 10 Bible Online

Kaḅo Ma 10 - kirikeni bible

Kaḅo Ma 10

¹Mà má Sọlọmọn ḅe oria kaḅo-ẹ: Yenemi owutọkụ ḅe ḍawu ḅe ori ose opuaye mịẹmịẹmẹ; ọkụma yenemika tọkụ ḅe ò kuḅie si ọkịḅo nyọngọrọma pịrịpịrịmẹ.

²Kuraka ẹmbẹ ḅụ ị́ nyanaḅo ngọma àrị iḅi se ị́ mịẹ ẹkẹ, ọkụma karakaraye mị anị ine ị́ ḍumo ḍụaḅịa.

³Nyanaḅọ Ḅe ò ḅereni ẹkẹ iḅi apụma ḅuru ini ḅaa, ọkụma ò ḅereni sitịḅịnyana apụma pịrị ẹkẹ, ini nyanaḅiarịye ini nwọ nyana.

⁴Ikula mịẹse ị́ igweinḅịa, ọkụma kụrọma fịrịnwẹngị mịẹse ị́ alakọnḅịa.

⁵Yenemiḅọ ḅe ọ̀ chịnmgbọlụma kpokponimaḅịa àrị ḅịa sịkị ḅụ; anị ḅụgereremaḅịa ozu soku sịkị mị mgba se mọnọ mị.

⁶Karakaraye mịẹḅọ ḅe ọ̀ ḅẹlẹma nyanaḅịa, ọkụma sitịḅịnyanaḅọ ḅe oria ọkwẹịn ma àrị si fịrị ḅọịmẹ.

⁷Iḅi apụma se ḅiekoroma mị ḅẹlẹma-ẹ, ọkụma sitịḅịnyana apụma ḅọlọka sịkị ḅụ ini ini se ḅieḅaramaḅịa.

⁸Yenemi apụma ini iḅi tetema ọkwẹịn nwọ ọkịkịmẹ. Yenemika ọkwẹịn kọn apụma ini mun faḅie sọḅịa.

⁹Karakarayemịẹ apụma ini ḍụaḅọrọma nyanamẹ ini pịkịna dein ḅara ḅụ omi-ẹ, ọkụma karakarayemịẹka apụma ini kunḅara ḅie sọḅịa.

¹⁰Karakaraye se ọḅụdaḅọ, ḅụfụka chịnchịnmẹ, ọkụma ḅelema mịn mị siye-ẹ ḍukoarịḅọ ḅe, anị deinma fịrịnwẹngịarịye-ẹ.

¹¹Karakaraye mịẹḅọ ḅe oria ọkwẹịn ma ḍumo arịa ḅie omi-ẹ, ọkụma sitịḅịnyanaḅọ ḅe oria ọkwẹịn ma àrị si fịrị ḅọịmẹ.

¹²Ḍikiḅụnwọnwọ mị anị ḅụfụka pakụma ḅoḅomẹ, ọkụma ḅẹlẹma mị anị mịẹirima goyegoye ḍikitọrụsinsinmẹ.

¹³Yenemi apụma ini nemi ọkwẹịn kọnkọnmẹ, ọkụma oḅori apụma fomuḅara sime ini pịrịmẹ.

¹⁴Yenemi apụma ini yemamgba nemimẹ, ọkụma oḅori apụma ini ye ḍukosa ḅẹḅẹ ḅụfụka kpekisam.

¹⁵Ngọ ma àrị nyanaḅọ ḅe ḅọịmẹ, igwein mị anị igweinḅọ ḅe fama mẹ.

¹⁶Iḅi mịẹ mị ḅe gbẹịnye anị ḍumo-ẹ, ọkụma si mịẹmịẹye mị anị ị́ pamun jịn si ḅie chuḅịa.

¹⁷Datekerema ọkwẹịn poki poki apụma, ini ọkwẹịn ini pịrịarị sịkị ḅụ, ini ḍumoḅịa; ọkụma ini yemịẹirimasam nwọ ḅereni ọkịkịka apụma ini faḅie omi-ẹ.

¹⁸Taraka nyana jụmḅọ pịrị se anị ḅọị arịḅọ ḅe anị iruo ḅo-ẹ. Nweni se fiearịḅọ goyegoye oḅoriḅọ-ẹ.

¹⁹Ị́ nwọ opuma ọkwẹịn àrị ọkụ, anị ị́ pịkị ḅụnemikaḅụ si mịẹḅịa ọkụ-ẹ. Ị́ yenemimẹ ḅẹḅẹ, ị́ deinma simeḅịa.

²⁰Karakaraye mịẹḅọ ḅe oria ọkwẹịn ma yela seleḅa sime ọkụ simemẹ, ọkụma sitịḅịnyanaḅọ ḅe oria koroma ma àrị ye ḅụ ofori-ẹ.

²¹Karakaraye mịẹḅọ ḅe oria ọkwẹịn ma, tọn apụ àrị se sọye mịẹḅịa, ọkụma oḅori-a mịẹmịẹye ḅụ ị́ ineda ị́ ḅụ ḅaaḅịa.

²²Nyanaḅọ Ḅe oria ḅẹlẹma ị́ mịẹse ị́ ngọ kọnmẹ; kụrọ fịrịnwẹngị ineda ị́ mịẹse ị́ alakọntẹịn ẹkẹ.

²³Si mịẹmịẹaye ḅẹlẹma mịẹ mị anị oḅori-a mịẹmịẹaye-ẹ. Tịḅịḅie nyanapụ ma ini nemi ḅẹlẹmamẹ.

²⁴Karakaraye mịẹapụ ma ini ḍọkị àrị ye mị ini nyanaḅịa, ọkụma sitịḅịnyanapụma ini opuma ḍikiḅalafatẹịnye mị anị ini dapakaḅịaye-ẹ.

²⁵Irisi fiemẹ, se anị sitịḅịnyanapụma ofurosinmẹ, ọkụma karakaraye mịẹapụ ma ini ḍụaḅọrọma nyanamẹ sịkịmamgba.

²⁶Ngịsị fịrị se ikulaḅọ fịrịma ma; anịka ọ̀ tụmgbakị iru sọḅịa ị́ ḅịpị ḅie, anịkanịka ori onwoin sọḅịa ị́ tọrụmgbọlụ ḅie.

²⁷Nyanaḅọ Ḅe ḅịpị poki, ị́ nangwọ ḍumo nyanaḅịa. Sitịḅịnyanapụma inia enema laka simeogbo anị ini fịḅịaye-ẹ.

²⁸Karakaraye mịẹapụ ma ini tọrụseḍikiarịye mị anị ini se mun ḅieḅẹlẹ ḅie chuchumẹ, ọkụma sitịḅịnyanapụma inia ḅietọn ayema inia ḅieḅaraḅịa.

²⁹Nyanaḅọ Ḅe karakaraye mịẹapụ ma ori ini ḅọịḅọịmẹ, ọkụma si aye mịẹmịẹapụma ori ini ḅaasinḅịa.

³⁰Karakaraye mịẹapụ ma ini ḅọị nyọ nyanamẹ sịkịmamgba, ọkụma sitịḅịnyanapụma ama mị ḅie ini ḍumo ẹkẹ.

³¹Karakaraye mịẹapụ ma nemi ọkwẹịn anị ini kọnkọnye-ẹ, ọkụma si ọkwẹịn kọnkọn ḅịpịḅieḅẹlẹ mị ini anị dachịẹmaḅịa.

³²Karakaraye mịẹapụ ma nweni na deinḅịa ọkwẹịn anị ini kọnḅịaye-ẹ, ọkụma sitịḅịnyanapụma ini ọkwẹịnḅịaye mamgba nweni ịganịmaḅịaye-ẹ.