Read kirikeni Kaḅo Ma 17 Bible Online

Kaḅo Ma 17 - kirikeni bible

Kaḅo Ma 17

¹Ḅụfụkamaye ofori ḅụ deinma sime se samịna-fịturu-okpokpo fị mị iḅitẹịn ḅẹrẹ-ḅẹrẹ-ḅẹrẹ warị ḅie sime alalị fịaye fị mị nẹngịmẹ.

²Yenemi fịrịnwẹngịḅọ ḅe ọ̀ kụrọnyanatẹịn warị nyanaḅọ ḅe oria yeḅụ oforika tọkụ ḅe nwọ nẹngịḅịa; ọ̀ pịkị ngọ ḅụ pẹkẹrẹ ḍiekiri nyanaḅịa.

³Goli na seleḅa na fịnị ini nwọse àrị ḍaḍikiḍikimẹ, ọkụma tomoniḅọ kuḅiemgbọlụ mị Nyanaḅọ Ḅe mị anị ḍaḍikiḍikiye-ẹ.

⁴Si-a tomonima si koroma anị ini pokipokiye-ẹ, iruokọn apụma pịkị iruoaye pokipokimẹ.

⁵Ị́ nemikase igwein apụ ḍẹrịmẹ ḅẹḅẹ, ini tẹmẹ Tamụnọ Ḅe mị ị́ wọlọarịye-ẹ. Fomuḅara sime ị́ pịrịḅịa nemikase sifụḅara jịn apụ la mị ị́ ḅieḅẹlẹma-ḅẹlẹmamẹ ḅẹḅẹ.

⁶Olomu apụma inia awọma-awọma, se opuaye mịẹmịẹmẹ, anị asẹmẹnị awọma sọnị inia ḍapụma se opuaye mịẹmịẹ ọkụ-ẹ.

⁷Mịnaḅụ osi-apụ ma ini iruo kọnkọnkẹ, anịsịkị oḅoriapụ ma ini yeḅụ sọye ḍukoḍukokẹ.

⁸Tọn apụ koromamẹ na ọḅụfị mị anị ḅụgbiripuma ḅara se ye mịẹmịẹmẹ; ini ḅerenimẹ na anị ine yegoyegoye mịẹḅịa.

⁹Ị́ nemikase ḅimẹ na tomoni ị́ ḍiki ḅieḅẹlẹ-ẹ ḅẹḅẹ, si ḅụ ḅarasin ini pịrị ini ị́ mịẹirima sịkịḅụ. Mịẹirima se ḅiekoroma mị, anị ine ikia kanḅịa.

¹⁰Yenemiḅọ ḅe gbọrị sịkị ịganị ḅụ kẹngẹ ò ye ḍawọḅotẹịnḅịa, ọkụma yenemikaḅọ ḅe fomuye ḅara sọnọasi nwọseni ò fomu, ò nemiḅịaye ofori-ẹ.

¹¹Fị mị tịḅịḅiekụrọ okunwẹngịḅọ ḅara anị anị se sitịḅịnyana apụma damaḅoḅịa ọkụ-ẹ, anị sịkịmamgba ḅụfụka pịrịarịapụ ma.

¹²Kụrọ ḅara ḅụ kunso chịrịtọkụ nyengi na ịrịa mị iḅitẹịn oḅoriḅọ ḅe oria yenemika fịrị mị nwọ nwẹngịarị sịkịḅụ ori-na-ịrịa mị nẹngịmẹ.

¹³Ị́ si se iḅigbẹịnmẹ ḅẹḅẹ, ị́ya warị ḅie si ngịsị faẹkẹ.

¹⁴Ḅẹrẹnụnụa mị ḅe sakị simeọkụ anị, ini nama-se-ideri-mengi kiki onu se ideri mengi mị tatarị mun anị bịan se dachịẹ ọkụ simemẹ, anị anị dachịẹma so anị ḅọrọḅịa.

¹⁵Siḅẹrẹ kọn ḅẹrẹtịḅị nemikaḅọ ḅe pịrị, na siyemịẹḅọ ḅe ḅụ ḅarasin se ò so mị na, Nyanaḅọ Ḅe mamgba ọ̀ ḅụḅẹlẹḅẹlẹkẹ.

¹⁶Yenemikaḅọ ḅe, anị iḅi se ọ̀ mịẹkẹ, igbiki famaye se ò telima mị; anịatịḅị ò koroma nyanakẹ.

¹⁷Ikiapụ sịkịmamgba inia ḅẹlẹma mị ḍiepakụma-pakụmamẹ. Mịnapụ ma ini cheye ḅụ omi ini nemikase ine ḅụfụka ḅie ḅarachụa jụmḅọ jụmḅọ pịrị-ẹka ọkụma.

¹⁸Koroma nyanakaḅọ kẹngẹ anị onyechịẹ jụmḅọ fị sa pịrịḅịaye-ẹ.

¹⁹Siye ḅẹlẹma mị anị ḅụfụka ḍọkị nwọ ḅẹlẹma-ẹ. Sịkịmamgba ị́ ḅụ bomaḅẹ ḅẹḅẹ anị ị́ ḅụfụka ḍọkịaḅẹ.

²⁰Si koroma kọn pịkị si ọkwẹịn kọn arịḅọ goyegoye iḅiye nyana ẹkẹ, nụḅọ opu ḅụfụka ḅie sọḅịa.

²¹Kururu na kuḅie si na anị sime yenemikaye mịẹarị tọkụ ḍaḅọ ḅe pịrịḅịaye-ẹ.

²²Sịkịmamgba ḅieḅẹlẹ ḅụ sime mị, ị́ mịẹse ị́ iḅi oju nyanaḅịa, sịkịmamgba ngịrị mị anị kelekelema fị se ḅoḅomẹ.

²³Si ḅẹrẹkọn apụma ini ḅọịma ọḅụfịfịmẹ mịẹse karakara ḅẹrẹ mị ḅarị kọn ẹka ọkụ.

²⁴Yenemiḅọ ḅe ò kuḅie tọn se ọ̀ mịẹḅịaye ma nemi ḅụ mị ọ̀ mịẹmịẹye-ẹ, ọkụma oḅoriḅọ ḅe ọrịḅara-ọrịḅara anị ò se oriaye mịẹmịẹye-ẹ.

²⁵Yenemika tọkụ ḅe kuḅie si sịkịmamgba ọ̀ nwọ ọkịḅo ḍawu ḅe pịrịḅịa, ọ̀ pịkị ḅụọyịma-kuḅie-si ọkịḅo nyọngọrọma pịrịḅịa.

²⁶Anị karakarakẹ siyemịẹkaḅọ mịẹse nụḅọ oloko gbẹịn, karakara ḅẹrẹ mị ini pịkị iḅomẹ karakaraye mịẹ apụma nemikase ḅụfụka da ọkụma.

²⁷Mịna ḅụ kaịnḅoḅọ ọrị-ọkụ-ọrị-ọkụ ọkwẹịn-ọkwẹịnkẹ, deinma sime se ḅụ ọlọ apụma anị kuḅie ḅụ yekaịnḅoḅo apụ-ẹ.

²⁸Anịmgba ḅe kuluma, oḅoriḅọ ḅe sọnị ori ineda yenemiḅịa ò yeḍawọ ọkụma, ọ̀ pịkị yekaịnḅoḅịa ò deinma sime se ọ̀ ḅịpịgbẹịn ọkụma.