Read kirikeni Kaḅo Ma 19 Bible Online

Kaḅo Ma 19 - kirikeni bible

Kaḅo Ma 19

¹Tomoniḅọ igwein ḅụ sime se karakaraye mịẹmịẹ mị iḅitẹịn iruo kọnkọn yenemikaḅọ ḅe nẹngịmẹ.

²Yekaịnḅoka se kuḅie chịẹ-chịẹ-chịẹ mị iḅikẹ; inema nyanaka ị́ se ḅụfụka ḅie chuḅịa.

³Tọn apụ inia oḅori-a mịẹmịẹaye mịẹḅụ inia ḅụ se fa ḅie chuchumẹ, ọḅụkọ ini se Nyanaḅọ Ḅe ọlọḅịa.

⁴Ngọ kọn apụma sịkịmamgba ini ịwọ ikiapụ ḍọkịḅo aḅẹ, ọkụma igwein apụma ini nyana kala apụma sọnị ini ine ini ọlọkẹ.

⁵Ị́ nemikase ḅẹrẹkọn warị ḅie iruo kọnmẹ ḅẹḅẹ, fomuḅara sime ị́ pịrịḅịa—anị ị́ gbarị ḅọrọḅịa ọkụ ofori-ẹ.

⁶Tomoniḅọ goyegoye nụḅọ ḅẹlẹmaḅịa ikiaḅọ nwọ ḍọkị ḍọkịmẹ; tomoniḅọ goyegoye ḅarapakụma yepịrị pakụma ikiaḅọ nwọ ḅereni ḅerenimẹ.

⁷Igweinḅọ ḅe oria mịnapụma na mịnaḅụ na, ini ò se mịẹḅịaye ofori-ẹ; à ḍukoka ori ikiapụ nyanakẹ. Ọ̀ ḅụkụrọma mịẹọkụ mịẹọkụ sọnị, ori ineda gbọrịḅọ sọnị nyana ẹkẹ.

⁸Iḅi se ị́ ḅụ mịẹ, pịkị ị́ ineda ḍawọḅịa yemamgba nwọ ḍawọ, anịsịkị ị́ ḍawọ saye ma se ḅiekoroma, ye ị́rị́na-tọrọkọ-tọrọkọ munḅịa.

⁹Ḅẹrẹkọn warị ḅie iruokọn se fomuḅara la-ẹkaḅọ ofori-ẹ; ọ̀ fị ḅie sọsam.

¹⁰Yenemikapụ ma ini igbiki asẹti ma; omoniapụ pịkị tịḅịda opukiri lasa opuapụ pịrị ma.

¹¹Ị́ koroma nyanamẹ ḅẹḅẹ, ị́ya owoi-kuḅie mị ị́ nwọ ọlọḅịa. Tomoniḅọ ị́ mịẹirimamẹ ḅẹḅẹ, gboinma anị poki mị opuma iḅiye-ẹ.

¹²Amanyanaḅọ ḅe oria ịganị mị, chịrịḅa ḅe ekerea ọkụ simemẹ, ọkụma oria ḅẹlẹma mị, tomoni koruarị-koroḅịa-ene-mengi sime ọkụ simemẹ.

¹³Yenemika owutọkụ ḅe, ori ineda ḍawu ḅe se ḅo fa ḅie chuḅịa. Ọkwẹịn se ịganị ḍọkị ḍọkị eremeniḅọ ma sime ọkụ, anị sara-fa-arị-mengi kpọịnkpọịnma sara fa ọkụ simemẹ.

¹⁴Tomoniḅọ ineda warị nyanaḅịa, ḍawu na nyọngọrọ na pịkị igbiki se ọ̀ pịrịḅịa, ọkụma Nyanaḅọ Ḅe kẹngẹ anị koroma nyana eremeniḅọ se ọ̀ pịrịḅịaye-ẹ.

¹⁵Mịẹmamun se ikula; mọnọ-ma-mun, ọkụma fịye ị́ tarịḅịa.

¹⁶Tamụnọ Ḅe oria olokoma koko, se ị́ ḍumo ḅọlọ sịkị laḅịa; ị́ nemikase àrị ḍikisima ọkụma, ị́ fịḅịa.

¹⁷Ị́ ye se igwein apụ pịrị àrị sịkị, ị́ ye se Nyanaḅọ Ḅe ḅọlọ àrị ọkụ simemẹ, se Nyanaḅọ Ḅe ọ̀ pịkị anị se ị́ gbẹịnḅịa.

¹⁸Ị́ya awọma ini kala awọmẹnị ḅụ sime se yeḍawọḅịa sịkị ḅụ ini dagbụkụkụma, ị́ ọkọmịẹkẹ ḅẹḅẹ anị ị́ ḅarachụa ini pịrịaḅẹ na ini inia ḅụ ma ḅaafama.

¹⁹Tomoniḅọ owoi-kuḅie nyanamẹ ḅẹḅẹ ye ori anịa gbẹịnye mị ọkị. Ị́ gbọrị-sịkị ḅụ oria ḅụfụka ḅie ọ̀ ḍụapakụmaḅomẹ ḅẹḅẹ, anị ị́ pịkị gbọrị-sịkị nwọse ḅarị ọkọ mịẹḅịa.

²⁰Ị́ nemikase tetema poki se yeḍawọ ḍọkị ḍọkịmẹ ḅẹḅẹ, gbọrị ene, ị́ yenemiḅịa.

²¹Tomoni ineda ini mịẹḍọkị kịrịkịrị aye nwọ tọnḅịa, ọkụma Nyanaḅọ Ḅe ọ̀ tọnye mị anị mịẹḅịaye-ẹ.

²²Ịmụkụ mị anị ḅụgereremaye-ẹ, igwein apụma iḅitẹịn iruo kọnkọn apụma nẹngịmẹ.

²³Nyanaḅọ Ḅe ḅịpị poki, se ị́ ḍumo ḅọlọ-a ḍin laḅịa, ị́ pịkị dein nyanaḅịa, se yese nweni lamalamaye yese ị́ lama-ẹkẹ.

²⁴Tọn apụ, fịaye se inia ḅịpị ma ḅie chụa fị mị ḅụ, ini opuma ikulamẹ.

²⁵Ḅụdekichịẹma mị fomuḅara sime anị pịrị nyanamẹ, mịẹsosịkị iḅiye nemikapụ ma yeḍawọḅịa ọkụ. Ị́ yenemimẹ ḅẹḅẹ, ị́ yeḍawọḅịa ini ị́ datekerema sịkị.

²⁶Ḅụgerere nemika, ḅụgereremaye mịẹmịẹḅọ ḅe kẹngẹ anị ineda siye se ḍawu ḅe mịẹ pịkị oria warị ḅie nyọngọrọma depakụmaḅịaye-ẹ.

²⁷Owutọkụ, yeḍawọ ḅụ ị́ dachịẹ nyana ọkụma, ị́rị́ nemi ḅọrọsaye mamgba ị́ gboinma àrị pokiḅịa.

²⁸Iḅi ḅẹrẹkọn sime ẹkẹ onyechịẹḅọ nemikase jụmḅọ ḅụọyịmaḅịaye nwọ tọn jụmḅọ pịrị ọkụma. Sitịḅịnyana apụma si mị ḅe ḅẹlẹ mị, inia ḅịpị ḅie ḅẹlẹmẹ.

²⁹Nwọ opuma mịnaḅụ dekichịẹma yenemikaḅọ ḅe gbarịmaka ḅaraḅụ, ò fomuḅara daḅịa.