Read kirikeni Kaḅo Ma 20 Bible Online

Kaḅo Ma 20 - kirikeni bible

Kaḅo Ma 20

¹Opuma iruḅu mị anị ị́ mịẹse ị́ oloku ọkwẹịn pịkị ị́ se yenemikaḅọ mịẹḅịa. Iru ḅu se iru tọrụsọ mị anị yenemika-ẹ.

²Ḅie ḍarị àrị chịrịḅa ḅe ị́ nwọ ḍikiḅalafaḅịa ḅara mị, ọkọse ịganị-ịganị amanyanaḅọ ḅe ḍikiḅalafa, ị́ ori ịganịmamẹ ḅẹḅẹ, anị mịnaḅụ kpọḅaa-ẹ.

³Yenemikaḅọ goyegoye ineda ḅẹrẹnụnụa sakịḅịa; ḅụ osiḅụ ị́ mịẹḅịaye anị inia ḅie ị́ ḅụ sikima.

⁴Opuma ikula ozu ḍipiḅọ ḅe, ozu ḍipi gbẹịn sịkị ḅụ oria ozu mị ḅie ye ḍipika ọkụma, ò sokuḅịa fịaye ofori-ẹ.

⁵Tomoniḅọ koroma ma gbun tiḅe ḅie mengi ọkụ simemẹ, ọkụma yekaịnḅoḅọ ḅe ori ineda anị ḍu pakụmaḅoḅịa.

⁶Ọrụḅọḅọ nụḅọ nyana osi na nyana ḅereni na nwọ ḍukomẹ, ọkụma ḅụkụrọma inia ḅie kọkọma ọkọsimeḅọ ḍọkịḅo!

⁷Karakaraye mịẹ pịkị mịẹ gbẹịnye nwọ mịẹarị ḍaḅọ ḅe oria awọma ini iḅifụḅara nyanamẹ.

⁸Amanyanaḅọ ḅe sime ḅẹrẹkọn àrị sịkị, ò siye mị nemimẹ ori anị ọrị sịkị.

⁹Nde gbọrịḅọ ineda kọkọma ḍuko ḅe na nụḅọ kuḅiemgbọlụ fịafịamẹ, na oria si mịẹmịẹaye ma ḅụ ọ̀ ḅarasinsam.

¹⁰Nyanaḅọ Ḅe ọ̀ taraka se kurakaye se yetọn, pịkị yedẹrịarị apụma wẹrịmamẹ.

¹¹Kalatọkụ ḅe pembe, oria mịẹmịẹaye ḅụ ò sime ọkụ mị ḍiepakụmaḅịa, ị́ ineda ḍukoḅịa ọ̀ karakaraye mịẹmịẹ na ori iḅi na.

¹²Nyanaḅọ Ḅe, ọ̀ tọrụmgbọlụ se wa pịrịsam wa se ye ọrị, pịkị wa se ye pokiḅịa ḅeri na.

¹³Ị́ya sịkị ị́ nwọ fama mọnọmọnọ aḅẹ ḅẹḅẹ, ị́ igweinḅịa, sịkịmamgba ị́ ḅụ se fịrị ḅie chu se ị́ ḅakama fịaye nyana fịḅịa.

¹⁴Ye fẹarịḅọ ḅe sịkịmamgba ọ̀ ḅẹrẹsuaḅẹ na ngọ dẹrị ḅịpị opuma iwomẹ, ọkụma ọḅụkọ ò somun ori-ini-na-nyana ḅịpịogbosọ mị se ḅụboma ma ḅọrọaḅẹ.

¹⁵Ị́ ḍukoarịye ị́ nwọ nemimẹ ḅẹḅẹ, goli na anịkanịka yela ḍụparị na nẹngịye ị́ nwọ nyanamẹ.

¹⁶Tụkụma ḅara se yenemika se igoniḅọ fị sa nwọ gbẹịnḅịa ḅereni ọkịḅọ ḅe, anị ḅụgbẹịnḅịa ori oria ngọma se tatarị ọ̀ gbẹịnḅịa sa mị gose nweni-a ḅarachụa koroma.

¹⁷Siḅọkọ ḅụ ị́ nyanaye mị ine ḅẹlẹtẹịn fịye fị ọkụ nwọse anị fịḅịa, ọkụma ḅọlọka sịkịḅụ onwun ị́ ḅịpị ḅie ḅeinmẹ nwọḅẹ ḅara anị anị simeḅịa ọkụ-ẹ.

¹⁸Iḅi tetema nwọ ọkị, se mịẹmịẹye ị́rị́ na kpaịnḅịa; ị́ ḅụkarakarama pịrịka owu nwọ pakama.

¹⁹Nweni se fiefieḅọ ineda ngịsị ye-ḅọị-ẹkẹ. Opuma ọkwẹịn ḍin apụ ḅie ị́ ḅụ sin.

²⁰Ị́ nemikase nime se ị́ nyengi na ị́ ḍa na worimẹ ḅẹḅẹ, ị́ya ḍumo mị kpụlụḅịa; kanakana ḅie tọnjie bin ọkụ.

²¹Ị́ nwọ tọrụsiọrịka ḅụ ngọ mị nyana ḅara, anị ị́ pịkị anịa iḅi ọrịẹka ọkụ-ẹ.

²²Ị́ mịẹirimaḅọ ḅe ị́rị́ ḅarana anịse ọ̀ gbẹịnma, kuḅie se Nyanaḅọ Ḅe ḅụgbana, ori mị anị tẹlịmaḅịaye-ẹ.

²³Nyanaḅọ Ḅe ọ̀ ḅụnwọnwọ nyana se kurakaye se yetọn, pịkị yedẹrịarị apụma wẹrịmamẹ.

²⁴Nyanaḅọ Ḅe mịna ateli ma ọ̀ karakaramasam, nde tomoniḅọ ineda nụḅọ ḍumo mị damun-arị ateli mị kaịnḅoḅịa ọkụ?

²⁵Iḅiọkụma koroma, anịsịkị ị́ ḅereni ọkị na ị́ yese Tamụnọ Ḅe pịrịḅịa. Ọḅụkọ à nwọ nemi-ọkụma ị́ nwọḅẹḅịa.

²⁶Yenemi amanyanaḅọ ḅe siye mịẹarịḅọ ḅe ọ̀ nwọ ḍọkịḅoḅịa se ḅụfụka se ọ̀ pịrịḅịa ḍikiḅụgerere oforika ḅara ḅụ.

²⁷Nyanaḅọ Ḅe anị kuḅie na tịḅịḅie na se wa pịrịye-ẹ, wa ine mịna ḅụ ḅọị ẹkẹ.

²⁸Amanyanaḅọ ḅe ọ̀ ḅẹrẹtọn gbasoḅịa, oria ḅẹrẹtọn mị karakaraye ḅụ na, iḅi ḅẹrẹkọn na ḅụ simearị sịkị.

²⁹Asẹmẹnị ma inia ịnyọ mị ḅieḅẹlẹmamẹ, wa pịkị osi se iḅulu-chụa sẹnịsaḅọ ḅe pịrịmẹ.

³⁰Tọn-a sịkị anị ḅụakụmamẹ, wa mịẹ ḅọrọ pịkị nemisaye ma ḅụ pịkịḍinma jịn mịẹmịẹaye mịẹ.