Read kirikeni Kaḅo Ma 23 Bible Online

Kaḅo Ma 23 - kirikeni bible

Kaḅo Ma 23

¹Ị́ opuḅọ na sime yefịarị sịkị, ò sime ọkụ nwọse ḅietọn

²Ị́ opuma yefịfịmẹ ḅẹḅẹ ị́ ḅụ ọlọ.

³Ò se koroma ḅẹlẹ fịayema àrị ọfọịn-fịma; sosi ori epele-se-ị́-ti ḍọkịaḅẹ.

⁴Iḅiọkụma nemi nwọ nyana, ị́ ngọ kọnḅịa gose fịrịnwẹngị ị́ ḅụ ḅaama.

⁵Ị́ nyana igbiki ma, tọrụmgbọlụ-gbẹịn se finjiḅịa sịkị àrị maịn fasam, anị sime ḅara àrịḅo igo ḅe pamba chụa se finso ọkụ simemẹ.

⁶Ịkịḅọ na fịye fị gbolomama, anịkanịka opu pụkọ nyana ọ̀ karakarama koroma iḅi fịye mị pịrịma.

⁷“Ọ̀ nwọ ḅẹmẹ ḅo, pịkị jịn aye fị,” ọkụma anị ò kuḅie anịkẹ. Ò koroma ọkụ anị ò sime ọkụ-ẹ.

⁸Ị́ fịsaye ma ị́ àrị ọsụn pakụmaḅoḅịa, ị́ ḍuko ḅẹlẹmaḅịaye mamgba yeḅụ sọ ẹkẹ.

⁹Nemi ḅụ yeḍuko yenemikaḅọ ḅe pịrịma; ori anị kaịnḅo ẹkẹ.

¹⁰Ngịsị ini se olomu sịkị ḅụ elekima chụa koromaye sin ma, anịkanịka ḍapụ na nyengi apụ na nyanaka awọ kiri nwọ ọkị ma inia ḅaraḅụ.

¹¹Nyanaḅọ Ḅe anị inia opu kụrọnịḅọ-ẹ, ori inia ḅẹrẹ mị se ị́rị́ na yenụnụa se ị́rị́ na tụḅụrụḅịa.

¹²Tọrụ se yese ị́ ḍiearị yeḍieḅọ ḅe ḅụ wẹrị, se ị́ ḍawọ gbẹịn aye mamgba nwọ ḍawọ.

¹³Ị́ ḅara ọlọchịẹmama fomuḅara se kalatọkụ pịrị mị ḅụ. Iḅi fomuḅara mị anị ọ̀ ḅaa ẹkẹ.

¹⁴Karakaraye ḍuko ḅụ, anị ine ò ḍumo ḍụaḅọrọmaḅịa.

¹⁵Ị̀ya tọkụ, ị̀ ḅie opuma ḅẹlẹḅịa, ị́ yenemi ọkụma.

¹⁶Anị ị̀ tịḅịḅie-kpokoromaḅịa, nemi ọkwẹịn ị́ nwọ kọn se à naa sịkị.

¹⁷Si-a tomonima ini ḍiki pụkọ soli ma; osi se Nyanaḅọ Ḅe pịrị mị ị́ ḅụ palịmaye nwọsọ ị́ ḍumo ḅie.

¹⁸Ị́ ọkọmịẹmẹ nwọ ḅẹḅẹ ị́ tọrọkọ mun nwọ nyanaḅịa.

¹⁹Poki, ị̀ya tọkụ, nemi nyana, pịkị gbunma yekoroma ị́ kọn àrị ḍumo mị pịrị.

²⁰Opu iruḅu apụ, anịkanịka opuma yefị ḍin apụ na nwẹngịgboloma ma.

²¹Iruḅutọrụḅaa apụma na, opuma fịye fịfị apụma na, ini iderimaḅo igweinḅịa. Yefị na mọnọ na kẹngẹ ị́ nwọse tịḅị sẹkẹmẹ ḅẹḅẹ, ḅọlọ ẹkẹ ị́ agịpẹkẹrẹ ḅụchụaye nwọ chụaḅịa.

²²Ḅeritokoloma ị́ ḍaḅe poki, anịatịḅị ori oforika ọkụma ị́ pakaḅo ẹkẹ. Ị́ nyengima árịa olomu sịkị ḅụ á ḅieḅẹlẹmaḅịaye nwọ mịẹ.

²³Karakaraye na yenemi na yeḍawọ na yekaịnḅo na—ma ayema igbiki fama àrị pịrị gbẹịnmẹ, ọkụma ị́ dẹrị gbẹịnkẹ; anịatịḅị àrị opuma yela mẹ.

²⁴Karakaraye mịẹarịḅọ ḅe ḍaḅe, ori opu ḅieḅẹlẹ nyanaḅịa. Ị́ ineda yenemi tọkụ se opuaye mịẹḅịa.

²⁵Ye ị́ ḍaḅe na ị́ nyengima na ị́ se opuaye mịẹ; mịẹse ị́ yi nyengiḅọ ma ḅieḅẹlẹ.

²⁶Ị̀ya owutọkụ, kweinma ị́ tọrụ se ị̀ ḅụ wẹrị, se ị̀ya ḍumo mị anị elekima sọ ị́ pịrị.

²⁷Sẹfị eremeni na amanwẹngị eremeni na, iniapụ ma anị nweni ḅaaḅaa ḍẹịnye.

²⁸Furu apụ nweni koru ọkụ ini nwọse ị́ koruḅịa, ini pịkị mịẹsam tọn-a owuapụ ḅarị kuḅie se ḅụgbana na gbẹịn ḅara simekẹ.

²⁹Iru ḅu tọrụ ḅaamaḅọ ḅe se ị̀ ḍie, anị sịkịmamgba iru ḅẹlẹma ḅuarịḅọ ḅe, se yeḅụ oforika pịkị ngịrị mịnaḅụ pịrịḅọ ḅe à nwọse ị́ ḍieḅịa, sịkịmamgba ḅụfụka pịrị pịkị ḅẹrẹsuama ḅọrọḅọrọḅọ ḅe. Ọ̀ tọrụmgbọlụ ḅie mgba pulo-pulo-pulo waraḅẹ, oria oju ḅụ ọ̀ la gbẹịnkaye pịkị ọ̀ lamẹ.

³¹Ḅerenima iru telimaye sọ ị́ pịrị, anị pulo-pulo-pulo la-ọkụ la-ọkụ, anị ọmọngọ mị ḅie ḍarị la-ọkụ la-ọkụ, se anịḅo ọmọngọ mị ḅie ḅụiderima ḅo nyọnịma sime sọnị.

³²Ḅa dede laḅịa sịkị anị sime ị́ pịrịḅịa ḅara ị́ ḅẹḅịa na si oruwu ị́ gbọ mẹ.

³³Ị́ ineda kaịnḅoẹkaye ị́ nwọ ọrịḅịa, anịsịkị ị́ ḅarị ine yekoroma pịkị iḅiọkụma ọkwẹịn ẹkẹ.

³⁴Ị́ koromaḅịa na abaji ogboku ị́ omi-ẹ tọrụ ogbo gelegele àrị onwoin arụ yemịẹ ọkụ.

³⁵“Ini yese ị̀ lamasam,” ị́ nwọ ḅẹḅịa, “ini ị̀ fomumẹ, ọkụma ị̀ ḅiekoromakẹ. Cheye gose à ḅarị ineda sịsẹka? À pịkị jịn iruḅu ḍọkịmẹ.”