Read kirikeni Kaḅo Ma 26 Bible Online

Kaḅo Ma 26 - kirikeni bible

Kaḅo Ma 26

¹Ijiriji ịrụakpoin sịkịḅụ koro mị, anịkanịka ene ye soku sịkịḅụ koro mị anị osi se yenemikaḅọ ḅe pịrị ọkụ simemẹ.

²Worinime ine yese ị́ mịẹ ẹkẹ, ị́ mịẹye oforika simeogbo. Sotọrụ fin ma ḅọrọ àrị fenima ngịsị chịẹka ọkụ anị àrị sime ọkụ-ẹ.

³Ị́ asụn ḅe fomuḅịa, yepụra asụn ḅe ḅịpị mị ị́ fịnaḅịa, anịsịkị ị́ pịkị yenemikaḅọ ḅe fomuḅịa.

⁴Yenemikaḅọ ḅe gbela nemika ḅẹrẹ mị ị́ nwọ pẹkẹrẹmẹ ḅẹḅẹ, ye mị gbelaḅọ ḅe sime ọkụ anị ị́rị́sọ ị́ sime ọkụ-ẹ.

⁵Yeḅụoforika ḅara nwọse yenemikaḅọ ḅe pẹkẹrẹ, anị ofori ò yenemi ḅara se ọ̀ ḅụ kịẹnmaḅịa.

⁶Ị́ nemikase oku se yenemikaḅọ ḅe fịrịmamẹ ḅẹḅẹ, ị́ ị́ḅụọma pẹlẹsin aḅẹ, ị́ ḅụfụka ḅi ị́ ḅụ pịrịaḅẹ.

⁷Ikeliḅọ ḅe ḅụọma yeḅụsọka ọkụ mị anị kaḅo yenemikaḅọ ḅe ḅụ sime ọkụ-ẹ.

⁸Oḅoriḅọ nwọ tokoni mị sime ḅara anị ḍụparị se akarabọsị ḅụ fịna ọkụ simemẹ.

⁹Yenemikaḅọ ḅe nemi ọkwẹịn kọn mị sime ḅara anị iruḅu tọrụḅaamaḅọ ḅe ọ̀ ḅara temi ịga sin ọkụ simemẹ.

¹⁰Fịrị se yenemikaḅọ pịrịḅọ ḅe ọ̀ papa nweni mamgba ḅụosọḅịaye mịẹ-aḅẹ.

¹¹Maịn karama sịkị se oḅori aye mịẹarị yenemikaḅọ ḅe anị vinpịkị mun ori ọsụn ayema taḅa obiri sime ọkụ ọ̀ nwọ simemẹ.

¹²Yenemikase opuma yenemi ḅara se ọ̀ ḅụ wẹrịḅọ ḅe opu oḅoriḅọ iḅitẹịn oriḅọ ḅe nẹngịmẹ.

¹³Cheye gose ikula apụma ngịsị inia warị wẹrịsosoka? Cheye ini nwọ ḍikiḅalafa-ao? Chịrịḅa mọnọ?

¹⁴Ikulaḅọ ḅe oria mọnọye ọgọnọ pekele-pekele koro ọkụ, anị ḅọkọ mị ọlọ ikulele mị anịaḅụ oḅolo sime ọkụ simemẹ.

¹⁵Tọn apụ opuma ikulamẹ, fịye se inia ḅịpị ḅie chụa ḅụ.

¹⁶Ikulaḅọ ḅe ọ̀ nwọ chịnḅịa na ori ọbịrịtẹịn sọnọmapụ nẹngịmẹ, anị ine iḅiọkụma inia kuḅie ḅụ ḅẹrẹḍuko se jịn apụ na deinḅịa apụ.

¹⁷Ị́rị́ na gbolomakaye ḅụ ḅẹrẹ nụnụa mị sime ọkụ, anị nwẹngị ateliogbo mun se obiri ḅe ḅeri nụnụ ọkụ simemẹ.

¹⁸Epele se jụmḅọ ti se ḅo ḅẹ na ọ̀ papa tiaḅẹ nwọḅẹḅọ ḅe sime ọkụ anị nọmụḅọ nweni ḅaaḅaaye se ti ọkụ simemẹ.

²⁰Fịnị pẹkẹrẹ oforika nyọ, kọrịarị fịnị mị binḅịa; nweni se fie oforika nyọ kamụsọ koro ẹkẹ.

²¹Mà binsoka anyịmgbọlụ kalaye, anyị ogboku fịnị pakụmaḅịa, fịnị pẹkẹrẹ fịnị kọrịma kọrịmamẹ, ḅụfụka pịrịpịrị apụma sịkịmamgba ini ḅẹrẹ nụnụaḅịa.

²²Nweni se fie mị opuma ḅẹlẹmẹ! Nde wa ḅieḅẹlẹ se anị mịnị ọkụ?

²³Jokoma ị́ koromarịye ma ḅọị karakaraka ọkwẹịnma sime ọkụ iḅitẹmẹḍikiye se yeḅụoforika aramaḅẹlẹ ọgọnọ gbana ọkụ simemẹ.

²⁴Epekelepepeḅọ ḅe ò kuḅie ḅụ ọ̀ nyana taraka mị, ọ̀ kọn àrị ḅẹlẹ ọkwẹịn ma ọḅụju anị ḅọịmẹ.

²⁵Ḅeri ḅie ḅụ àrị ine ḅẹlẹḅịa, ọkụma ò pokima, anịatịḅị ò kuḅie taraka ḅein palịwaraḅẹ.

²⁶Ori ine ọ̀ nyana taraka mị ḅọịḅịa, ọkụma ọrụḅọḅọ ọ̀ mịẹarị siye mị ọrịḅịa.

²⁷Ḍẹịntu jịn apụ pịrịarịapụ ma ini mị anị pịkị kunḅịaye-ẹ. Jụmḅọ gose ḍụparị imbibilearị apụma, ini mị anị ḅaakọsịmaḅịaye-ẹ.

²⁸Ị́ taraka kuḅie nyanaye gose ị́ iruokọn jụmḅọ pụnụmamẹ. Karakaraka ḅẹrẹ ḍuko mị nyanaye jịnyekẹ, yesima sikima ọkụma.