Read kirikeni Kaḅo Ma 27 Bible Online

Kaḅo Ma 27 - kirikeni bible

Kaḅo Ma 27

¹Ḅa mị se opuaye mịẹma. Mịọkụ na, anịsịkị ḅụ na pakaḅịaye ị́ nemikẹ.

²Ye jịn apụ ị́ tokoni—igoniapụ sọnị, ị́rị́ ngẹrị ị́ ḅụ tokonima ngịsị.

³Ḍụparị na onwun na ḅe iku mị seni yenemikaḅọ se nweni pịrịḅịa ḅụfụka na otomaḅịa ọkụ ofori-ẹ.

⁴Ḅụnwọnwọ nyana mị siye-ẹ pịkị yesimaye-ẹ, ọkụma anịse yesọlị na otomaḅịa ọkụ ofori-ẹ.

⁵Anị iḅitẹịnḅịa tomoniḅọ mịẹirimaye mị, ị́ ḅelema nwọ ḍuko nụḅọ pịrị se nụḅọ ḅo koroma na ngịsị ị́ nụḅọ se yechịnkẹ.

⁶Ị́rị́ na ikiaḅọ ḅe ò se ị́ mịẹye ị́ ḅụosọ sọnị, ori iḅi se ḅietọnmẹ, ọkụma ị́rị́ na tarakaḅọ ḅara se ị́ya aba gbanamẹ ḅẹḅẹ, ị́ ḅụ ọbị!

⁷Ị́ ḅụlọ ḅeinmẹ ḅẹḅẹ, ḅẹịn mị ị́ anị sịkịḅịa, ọkụma fịye ị́ tarịsa ḅẹḅẹ, akụ fịye mị ị́ ḅịpị ḅie ḅẹlẹḅịa.

⁸Nụḅọ ama ḅie ḅụ sikimaḅọ ḅe sime ọkụ anị feni mịna feni-warị wẹrịso ḅụ sikima ọkụ simemẹ.

⁹Kụnụ ngwengwe na kụnụ olo na ị́ ḅieḅẹlẹmamẹ, ọkụma ị́ya kuḅie dein mị, ḅụfụka ḅo sịkị anị galagalaḅịa.

¹⁰Ị́ya ikiapụ ma na ị́ ḍaḅe oria ikiapụ ma na, inise ḅieḅaramama. Ḅụfụka ị́ lasịkị ị́ mbire ḅe ọ̀ ḅẹma na ò ḅo ḅarachụa ị́ pịrị-ẹ; ị́rị́ na kpekima angaḅọ ine ḅarachụa ị́ pịrịtẹịn ị́ mbire sasaju simeḅọ ḅe nẹngịḅịa.

¹¹Ị̀ya owutọkụ nemi nyana, anịsịkị ị̀ ḅieḅẹlẹḅịa; ị̀ ḍukosimaḅọ goyegoye àrị nụḅọ pẹkẹrẹḅịa.

¹²Koromanyanapụ ma tọrọkọju ḅoarị ḅụfụka ini ọrịḅịa, se ḅụkwa anị pịrịḅịa, ọkụma yekoromakaḅọ ḅe, ọ̀ dada nwẹngị mun anịa ḅie sọḅịa, se ò ḅo ḅẹḅịa à nwọ nemi ọkụma.

¹³Opuma oḅorisọ se igoniḅọ fịsa gbẹịnḅịa nwọ ḅereniḅọ ḅe, anị iḅiḅịa ọ̀ nyana ngọma ini nwọ ọlọchịẹma ò ḅereni na ọ̀ gbẹịnḅịa nwọḅẹ sa mị gose.

¹⁴Ị́ ineda ị́ya ikiaḅọ ḅe, dedeḅie-dedeḅie oloku kereniḅịpị ḅụ nime se ò wori se owosịsẹmaḅịa.

¹⁵Ọkwẹịn pụkọtanka eremeniḅọ ma, enekoro se kpọịnkpọịnma sararị mengi sime ọkụ anị á sime ọkụ-ẹ.

¹⁶Nde ị́ mịẹse á yawụma simeḅịa ọkụ? Jịnsịkị fọrụ mị ị́ kele anị dachịẹmasa anịkanịka ḅarakuḅu ḅeinḅịa pulo ị́ nwọ ọlọsa?

¹⁷Tomoni jụmḅọ jụmḅọ ḅụ yeḍawọ ọkịkịmẹ anị ikulele se jịn ikulele farị oḅuma ọkụ mị.

¹⁸Kwein tọrụ se figi chịn mị ḍiki se anị ị́ fịḅịa fịaye pakụmaḅo ị́ pịrịḅịa. Fịrịnwẹngịḅọ ḅe ori osi nyanaḅịa, ọ̀ tọrụ ọ̀ nyanaḅọ ḅe ḅụ karamẹ nwọḅẹḅẹ.

¹⁹Mengi mị ḅie ị́ ọrị tọrụ mị anị ị́ tọrụ anị-ẹ, anị ị́ pịkị ị́ kuḅiemgbọlụ ḅụ ị́ ḅụ ọrị ọkụ-ẹ.

²⁰Tomonima ḅietọn arịaye ma anị fịsapụma inia tomonikiri mị ọkụ simemẹ—sịkịmamgba sime tọn apụ pịrị jukuru pa omi-ẹ.

²¹Fịnị anị ini se goli na seleḅa na ḅe karakara mị nemi-nemiye-ẹ; tomoniḅọ sime ḅara mị sọ ini ine se oria karakara mị nemiḅịa.

²²Yenemikaḅọ ḅe ị́ ò fomuḅa-ẹtọnmẹ nwọḅẹ sọnị, ò ḅie sime nemika mị ị́ ineda anị fomu sin ẹkẹ.

²³Iḅiọkụma ḅụkụrọma inedaḅịa ḅara nwọse ị́ya ananama na namama na ḍikiḍiki,

²⁴anịatịḅị ngọ kọn mị simegbasokẹ. Sẹsẹ ma na mịnaḅụ na àrị simegbaso ẹkẹ.

²⁵Nama fịfị osueinma ị́ nwọ pẹlẹmẹ, anịsịkị ị́ pịkị chịngịma aka ḅụ sime osueinma pẹlẹmẹ, anịẹḅẹsọ ísí nama fịfị osueinma àrị sẹnịaḅẹ.

²⁶Ị́ya ananama ḅụ ichuka ma ine àrị se ḅụchụaye mịẹḅịa, se ị́ nyana da oḅori ḅụ ị́ dẹrịḅọ igbiki mị nwọse kiri fẹḅịa.

²⁷Ísí kọn oḅorima àrị nama ndo mengi pakụmaḅo ị́rị́ na ị́ furo na pịrịḅịa, pịkị ị́ya fịrịnwẹngị eremeni-awọ ma na sọnị.