Read kirikeni Kaḅo Ma 28 Bible Online

Kaḅo Ma 28 - kirikeni bible

Kaḅo Ma 28

¹Sitịḅịnyanapụma nweni ma ini ḍukoka simeogbo ini mangị-mangịmẹ, ọkụma karakaraye mịẹmịẹḅọ ḅe chịrịḅa ḅe kuḅie kụrọ ọkụ anị ò kuḅie kụrọ ọkụ-ẹ.

²Sẹ siye mịẹsa ḅẹḅẹ, anịa ḅie ḅẹrẹtọn mị anị gbọrịḅọ la so pịkị mun jụmḅọ laḅịa, ọkụma sẹ mị anị kụrọmachịẹ pịkị inema nyanaḅịa nemikase anịa tịḅịdapụ ma yekaịnḅo, yenemi pịkị koroma nyana apụ-ẹ ḅẹ ọkụma.

³Ḅẹrẹtọn kiri ḅụ sime se igwein apụ pụnụmarịḅọ sime ọkụ anị koro se pịkị nweni desin opu ene sime ọkụ anị ò sime ọkụ-ẹ.

⁴Ị́ oloko se yechịnkẹ ḅẹḅẹ, anị sitịḅịnyanapụma ḅụ ị́ omi-ẹ, ọkụma ị́ oloko se yechịnmẹ ḅẹḅẹ, anị ị́ ini na tụḅụrụmẹ.

⁵Simịẹmịẹye nyanapụ ma karakaraye mị ini nemikẹ, ọkụma nwọ Nyanaḅọ Ḅe tẹkẹarịapụ ma ini iḅiọkụma anị kaịnḅomẹ.

⁶Karakaraye mịẹḅụ sime igwein mị, iḅitẹịn nwenitelima na iruo kọn na, furu ḅụ na nyanaḅo ala mị nẹngịmẹ.

⁷Oloko mị ḍukoye mịẹ asẹmẹnịḅọ ḅe anị yenemiḅọ-ẹ. Yeḅụoforikapụ na ikiasọḅọ ḅe anị ḍaḅọ ḅụgererema ḅọ-ẹ.

⁸Ị́ nemikase nweni inuma, ye gbanama ọkị se ngọ kọn aḅẹ ḅẹḅẹ, ị́ya ngọma àrị so ḍikitịḅịfoin nyana igwein apụ pịrịḅọ ḅe damamunḅịa.

⁹Ị́ nemikase oloko mị fiearịye mịẹkẹ ḅẹḅẹ, Tamụnọ Ḅe sọ ị́ya tẹkẹma naa mị anị ọ̀ ḅụḅẹlẹkaye nwọsọḅịa.

¹⁰Ị́ nemikase karakaraye mịẹḅọ ḅe dairima se ò mun siyemịẹmẹ ḅẹḅẹ, ị́ tu ị́ ḅụ pịrị ḍẹịn mị ḅie ị́ sokoro sọḅịa. Ḅẹrẹnemikaḅọ ḅe ori iḅi gbẹịnye nyanaḅịa.

¹¹Ngọ-kọn-apụ ma sịkịmamgba ini koromamẹ na ini yenemimẹ, ọkụma igwein se gbunma tọrọkọju mịẹḅịaye mị nwọ koromarịḅọ ḅe yenemitẹịnmẹ.

¹²Karakaraye mịẹapụ ḅẹrẹtọn kiri ḅụ simesa ḅẹḅẹ, ọrụḅọḅọ nụḅọ ḅieḅẹlẹ mị ḍiepakụmaḅịa, ọkụma sitịḅịnyanapụ ḅo ḅẹrẹtọn sịkị, tomonima ini inia ḅụ ma ḅọịmẹ.

¹³Ye ngịsị ị́rị́na-ḅịrị-ẹkẹ ị́ nemikase ị́ya sima ḅọị ọkụma. Àrị ḍukopakụma se arịa ḅụ ḅarasin; anịsịkị mị Tamụnọ Ḅe ò ḍikiḅụgerere nyana ị́ pịrịḅịaye-ẹ.

¹⁴Sịkịmamgba Tamụnọ Ḅe ḅịpịpoki se ị́ ḅieḅẹlẹḅịa. Ị́ nemikase kọngọ kụrọmamẹ ḅẹḅẹ, ị́ fịfaḅịa.

¹⁵Igwein apụma ini ḅarachụa nyanakẹ sitịḅịnyana ḅẹrẹtọnḅọ ḅe ḅẹrẹtọn àrị sịkịḅụ, ò sime ọkụ anị ḅie mbụrụmbụrụarị chịrịḅa ḅe ḅalafama ọkụ, ọ̀ nwọse ḅalafamamẹ, anịkanịka fịye gose fukuma ḅọrọarị piri obiri ḅe sime ọkụ simemẹ.

¹⁶Iḅikoroma nyanaka ḅẹrẹtọnḅọ ḅe, ori ngẹrị oloko mị se oriaye mịẹse sitịḅị ḅaraḅụ ḅẹrẹtọnḅịa. Simịẹmịẹaye na tụḅụrụḅọ ḅe, ọ̀ ḅọlọsịkị se ḅẹrẹtọnḅịa.

¹⁷Nweniḅa-ḅẹrẹ-ḅarasi nyanaḅọ ḅe ọ̀ sarasarama ineḅịa ọkụ ọ̀ nwọse oria iḍupu mị sokuaḅẹ. Ọ̀ dachịẹmama.

¹⁸Karakaraye mị nwọ mị-ẹ, se ị́ ḍụaḅọrọma nyanaḅịa, ị́ nemikase karakaraye mịẹmịẹkẹ ḅẹḅẹ, ḅụnemika ḅaraḅụ ị́ ḅịkịḅịa.

¹⁹Ịnyọ kụrọma ozu kọrịarịḅọ ḅe ọ̀ ḅakama fịaye nyana fịḅịa. Sime se sịkị famarịapụ ma sịkịmamgba ini igweinḅịa.

²⁰Karakarayemịẹ apụma, ini ḅakama ḅieḅẹlẹ ḍumo kọnḅịa. Ọkụma ị́ ọfọịn ngọ nyanaḅịa ḅẹḅẹ ị́ fomuḅara daḅịa.

²¹Karakaraye mị nemi se anị sime ḅara nwọse yemịẹka mị siye-ẹ. Ọkụma da ḅẹrẹkọn apụ ini fịḅịa ọḅụ mị anị boka la-ọkụ la-ọkụ sọnị ini tọrụgelegelema siye mị mịẹḅịa.

²²Ịmụkụ apụma ini be ngọ kọn nwọ ḍọkịarị sịkị, igwein ini fomu-ẹtọn àrị ọkụ ini nemikẹ.

²³Jụmḅọ datekerema, kuluma ḅụ ò ḅo nemiḅịa na anị iḅitẹịn ḅịpịḅieḅẹlẹ boma nẹngịmẹ.

²⁴Nụḅọ yi nyengiḅọ na ḍaḅọ na ye furu mị siyekẹ nwọ koromaḅọ ḅe ori iḅitẹịn jokoma furuḅọ ḅe nẹngịkẹ.

²⁵Ịmụkụ mị ḅụfụka mị anị se ḅoḅoye-ẹ, kuḅie se Nyanaḅọ Ḅe ḅụgbana mị dein se ị́ pịrịtẹịnḅịa.

²⁶Ị́ kuḅie tọnye ngẹrị-ngẹrị nwọ mịẹ mị anị yenemika-ẹ. Yenemisa apụma ḍieaye ma ḍukonwẹngị, se ị́ ḍụaḅọrọma nyanaḅịa.

²⁷Yese igweinḅọ pịrịḅọ ḅe ye ọ̀ ḅụfụkama ẹkẹ. Ọkụma nwọ igweinḅọ ḅe ọrị se tọrụ ḅọịḅọ ḅe ọ̀ ḅakama worinime daḅịa.

²⁸Siapụ ḅo ḅẹrẹtọn kiriḅụ simesa ḅẹḅẹ, tomonima ini iniaḅụ ḅọịmẹ. Ọkụma ḅẹrẹtọn kiriḅụ ini ḅịkịsa ḅẹḅẹ, karakaraye mịẹapụ ma pịkịḅo ḅẹrẹtọnḅịa.