Read kirikeni Kaḅo Ma 7 Bible Online

Kaḅo Ma 7 - kirikeni bible

Kaḅo Ma 7

¹Ị̀ya owutọkụ, ị̀ya ọkwẹịn ma koko, pịkịna à ḍuko ị́ pịrị na mịẹ ḅẹ-aye ma se ḅieḅaramama.

²À ḍuko ị́ pịrị ayema mịẹ anịsịkị ị́ ḍumoḅịa. Ị́ tọrụmgbọlụma ị́ nwọse yechịn ḅara nwọse à se ị́ telima ayema se yechịn.

³À se ị́ telima ayema sịkịmamgba tọrụse arịaḅụ wẹrị, àrị se ị́ kuḅiemgbọlụ ḅụ gịẹịn.

⁴Ị́ mbụra ḅara nwọse nemi mị ọkị, anịsịkị gbunma yekaịnḅo mị ị́ tẹmẹ ikiaḅọ ḅara nwọse anị ọkị.

⁵Jịn-a owuapụ eremeni ḅụ, àrị ị́ mịẹse ị́ ḅụ sinḅịa pịkị ḅịpị ḅẹlẹ eremeni ma ḅụ sọ.

⁶Gbọrị sịkị ị̀ya warị pẹlẹḅọkọ ḅie ḅụ, à toluma nụngọ ḍikimẹ,

⁷se ma yekaịnḅoka tọn-a asẹmẹnị awọ ọrịmẹ. Ọkụma inia ḅie gbọrị yenemikaḅọ ḅụ àrị elekima chụamẹ.

⁸Gbọrị eremeniḅọ árị anga warị mị na kpeki gbọrị ateli ḅụ ọ̀ ḅọrọaḅẹ. Ori árịa warị mị kpekima mun-aḅẹ,

⁹saso ḅiri ḅụ ịrụa mị ḅịkịsosam.

¹⁰Á ḅo orina ịrịa sịkị; sẹfị eremeniḅọ ḅara á nwọse ye ḅirimẹ, á yetọn aḅẹ á kuḅie ḅụ.

¹¹Kuḅie kụrọ pịkịna ḅụgerere nemika eremeniḅọ-ẹ, sịkịmamgba ateliogbo nwẹngịma ḅọrọḅọrọḅọ-ẹ,

¹²anịkanịka ateli ma anga sịkị ḅụ chịẹma ḅọrọḅọrọḅọ-ẹ, tọn-a sịkịḅụ ateli ma ḅie, tọn-a sịkị fẹ ma ḅie ḅụ.

¹³Árị á ḅara se asẹmẹnị tọkụ ḅe kọngọ gbanamẹ, árị ọ̀ ḅịpị nọnjụ se ọ̀ tọrụmgbọlụ ḅie wẹrị ò ḍikimẹ ḅalafaka ḅaraḅụ, se nwọ ḅẹmẹ,

¹⁴“Àrị agbamịẹmẹ mịmgba, se à se agbamịẹ nama mị mịọkụ anị omi-ẹ.

¹⁵Anị à gose paka se ị́ ḍọkịmaḅoarịye-ẹ. Àrị ị́ ḍọkịaḅẹ, mịọkụ àrị ị́ ọrịsam.

¹⁶Ị̀ya mọnọye mị, Ijipt ḅụ ḅo, tọrụ kịrịkịrị lọkọ-ḅịtẹ mọnọye-gbẹịnye à nwọse anị gbẹịn waraḅẹ.

¹⁷Iḅi kụnụ olo anị maah na, alọis na, ịkọmụ olo na à nwọse anịaḅụ sarasam.

¹⁸Ḅo! Wa bebe ḍin mị mgba nwọse mịnaḅụ ḅẹlẹmatị. Wa jụmḅọ jụmḅọ oḅolo mị anị mịna tọrụ ḅẹlẹmaḅịa.

¹⁹Ị̀ deḅe warịḅie ori ofori-ẹ. Ọ̀ ḅọlọju mun mẹ.

²⁰Tọn-a igbiki ọ̀ nwọ deki se chụa mun waraḅẹ, mama fẹnị anga ọ̀ nwọ sime se ọ̀ pịkịmaḅoḅịa.”

²¹Arịa ḅịpị ḅẹlẹ mị á nwọse ọ̀ ḅaalọkọma se pịkị ọ̀ dairimamẹ se ọ̀ ḅịkị à pịrịmẹ.

²²Ḅụnemika ḅaraḅụ ori árị na mun aḅẹ, ini mun ḅaaḅịa nambulo sime ọkụ, tụḅụra mangị mun ḍẹịn ḅie koro ọkụ simemẹ,

²³Anị ini ḍẹịn se ọ̀ tẹịn se anị ò kuḅie tolu ḅọrọḅịa nyọ mị. Mun ịgbọ ḅie koro mun-arị feni ọ̀ nwọ kịkẹmẹ—ò nemikẹ na ò ḍumo mị anị mun ḅalafamaye ḅie sọsa ọkụ.

²⁴Mịọkụ anịẹrẹchị, ị̀ya owuapụ awọ, ómine ị̀ poki, ó ḅeri tokoloma à ḍuko arịye ma nwọ poki.

²⁵Ó ḅerenima ọkọsime eremeniḅọ ọ́mịna kuḅie fẹ ọkị; ọ́ nwẹngị á kpekimama.

²⁶Tọn-a owuapụ á nwọ ḅịkịmasam, á kịẹnḅịa ọkụ ofori apụ ḅaasam.

²⁷Arịa warị ị́ nwọ mun mẹ ḅẹḅẹ anị ị́ nwẹngị fịapụma tomonikiri ateli mị da aḅẹ. Anị ateli mị fị mị ḅụ kpụlụ ateli-ẹ.