Read kirikeni Ẹklisiastis 1 Bible Online

Ẹklisiastis 1 - kirikeni bible

Ẹklisiastis 1

¹Ma mị Yeḍieḅọ ḅe ḍukoaye ma-ẹ, Devid owutọkụ, Jerusalẹm amanyanaḅọ sọ ḅọrọsaḅọ ḅe.

²Anị ḅụḅalaḅalamamẹ, Yeḍieḅọ ḅe ọkọ ḅẹmẹ, anị iḅiọkụma ḅụḅalaḅalamamẹ; ḍumo mị ḅie sime ayema mgba kaịnḅo.

³Ị́ya ḍumo ị́ nwọ fama fịrịnwẹngịaḅẹ, ịnyọ ị́ nwọse fịrịnwẹngịaḅẹ, anị mị ḅụ cheye ị́ nwọ nyana se ḍiepakụmaḅe?

⁴Ḅụọ-ḅụọ ḅomẹ ḅụọ-ḅụọ pịkịna somẹ, ọkụma tomonikiri mị anị sime gbọrị ḅara anị anị pa omi-ẹ.

⁵Ịrụa mị pa pakaḅoaḅẹ, anị pa pịkịna tukoroaḅẹ, ịnyọ fa ḅara ḅụ anị pịkịma mun anị pịkị sakịḅịa nyọ mị lamẹ.

⁶Fọrụ mị fie chuku damẹ, fọrụ mị fie ọgọnọ damẹ, kelema kelema koro se pịkịma ḅomẹ.

⁷Ideri ḅu-mengi goyegoye ideri mun ala-mengi tọrụ ḅie koromẹ, ọkụma ala-mengi tọrụ mị ma ḅeinkẹ. Mengi mị anị vinpịkị ideri mengi mị sakị nyọ mị ḅomẹ, se anị sakị anị gbọrị ḅara mị mịẹmẹ. Yegoyegoye kuluma nyanaka ḅara nwọse pịkị sakịmẹ.

⁸Yegoyegoye tọrụ se ịnyọfa damẹ, ọkwẹịn ineda ḍuko-ẹka opu ịnyọfa. Mịna tọrụmgbọlụma ye ḍiki ḅụ ịnyọ arịaḅụ fakẹ, mịna ḅeri ma sọnị ịnyọ arịaḅụ fakẹ. Ye ma kuluma nyanaka ḅara mị àrị se pakarịye; tomoniḅọ ineda ḅịpị se ḍuko ẹka ḅara.

⁹Tatarị paka ḅọrọsaye mị pịkịna pakaḅịaye-ẹ. Tatarị mịẹ ḅọrọsaye mị pịkịna mịẹḅịa. Bebe tomonikiri ḅie mgba ịwọye ofori-ẹ.

¹⁰“Ḍiki,” ini nwọḅẹmẹ, “mịanga mị ịwọye-ẹ!” Ọkụma ẹn-ẹn, anịmgba mịẹ ḅọrọsam, ma ini wa yika sịkị ngịsị.

¹¹Ḅọrọsa sịkị ḅụ mịẹye seḅiekoroma gbọrịḅọ sọ ofori-ẹ, pịkị ḅoḅịa enema ḅie na mịọkụ na, anịsịkị na mịẹḅịaye seḅiekoromaḅịa gbọrịḅọ sọ ofori-ẹ.

¹²Ị̀rị̀, Yema Ḍawọ Nemiḅọ ḅe Izrẹl sẹ mị ḅie àrị amanyanaḅọ sọsam Jerusalẹm ḅie.

¹³À ḍuko pẹlẹmẹ na à ye sọkịrị ḍiki se mị tomonikiri mị ḅie mịẹaye goyegoye nwọ ḍawọḅịa. Tamụnọ Ḅe ngịsị tomoni-a ḅieḅẹlẹmaka ḅereniḅoye ọ̀ nwọse mịna ọgọnọ gbanasam.

¹⁴Mị tomonikiri ḅie mịẹye goyegoye àrị ọrịsam, se à ḍuko ị́ pịrịaḅẹ na, arịmgba ḅụḅalaḅalamamẹ. Mangị fọrụ ḍuko ọkụ simemẹ.

¹⁵Ị́ ineda pịkịma-pịkịmaye mịẹ gbụkụkụma-ẹkẹ, ị́ ineda oforika aye kịẹn-ẹkẹ.

¹⁶À nwọse ị̀ ḅụ ḅẹmẹ, “à ḅo opuḅọ sọsam, à yenemitẹịn ị̀ tọrọkọda tatarị Jerusalẹm ḅie ḅẹrẹtọnḅọ goyegoye nẹngịmẹ. Nemi mị na yekaịnḅo mị na; à jokoma árị sime ọkụ nwọ nemimẹ.”

¹⁷À ḍuko pẹlẹmẹ na yekaịnḅo mị na yenemika-mịẹmịẹaye mị na ogboku kịrịye à nwọ ḍawọḅịa, nemi mị na, nọmụ-a mịẹmịẹaye na. Ọkụma à ḍọkịḅo ọrịmẹ na à pa mangị fọrụ mị ḍuko aḅẹ.

¹⁸Ị́ yenemitẹịn àrị sịkịḅụ, ị́ ḅụḅalaḅala nyanatẹịnmẹ; ị́ yenemitẹịn sịkịḅụ, ị́ yeḅụosọ nyanatẹịnmẹ.