Read kirikeni Ẹklisiastis 10 Bible Online

Ẹklisiastis 10 - kirikeni bible

Ẹklisiastis 10

¹Fị ọmụmụ ineda bebe kụnụ olo gbọrị ololo fụrụmaḅịa, yenemika kala mịẹmịẹaye pịkịna ineda opu yenemitẹịn mị kansinḅịa.

²Yenemiḅọ ḅe karakaraye mịẹ mị; pịkịna yenemikaḅọ ḅe iri aye mịẹ mị, pakapaka aye-ẹ.

³Oria yenemika mị, ateli ogbo ori na ịrịa igoniapụ sọnị jokoma ọ̀ tọrụ ḅie anị ọrịḅịa; ọ̀ mịẹḅịa tomoniḅọ goyegoye nemiḅịa na ori yenemikaḅọ-ẹ.

⁴Ḅẹrẹtọn ị́ pịrịarịḅọ ḅe taraka se ị́ wẹrịmamẹ ḅẹḅẹ, fịrị mị ḅụ ị́ soḅịa nwọḅẹ ḍiri pẹkẹrẹ gịẹịn ọ̀ pịrịma; ị́ nemikase deinma simemẹ ḅẹ ọkụma, sitẹịn mịẹirimaye ḅụ sọnị siḅụ-ḅarasin tomoniḅọ pịrị mịẹmịẹmẹ.

⁵Mị àrị ọrịsa gbọrị simịẹmịẹye-ẹ mị tomonikiri ḅie, ḅẹrẹtọn apụ mịẹarị siaye.

⁶Ini osi nyanakiri seni yenemikapụ ma pịrịmẹ, anịsịkị ini ḅifie ngọ kọn apụma pịrịkẹ.

⁷Àrị omoniapụ ọrịsam asụn ọgọnọ, anịsịkị ḅịpịḅẹrẹlapụ ḅụọ seni omoniapụ nwẹngị ọkụ nwẹngịmẹ.

⁸Ị́ olulu sokumẹ ḅẹḅẹ ị́ sokoro anịa ḅie sọḅịa, ị́ onu kantolumẹ ḅẹḅẹ oruwu ị́ gbọḅịa.

⁹Ị́ ḍụparị seni fịrịnwẹngị-nwẹngịmẹ ḅẹḅẹ, ḍụparị ye seni ị́ lamaḅịa. Ị́ fịnị pupumẹ ḅẹḅẹ anịaḅụ ye ḅọrọ ị́ laḅịa.

¹⁰Ị́ya apala mị ikirimẹ se ị́ farịkẹ ḅẹḅẹ, ị́ iḅiọkụma ịnyọ fama se kụrọma anị seni fịrịnwẹngịḅịa, mịẹḅịaye mị nwọse tatarị koroma ḅụ chu mị iḅitẹịnmẹ.

¹¹Ị́ oruwu ḍiri kọrịmẹ se oruwu tatarị ị́ gbọmẹ ḅẹḅẹ, ị́ kọrị ḍiri mị yeḅụ ofori-ẹ.

¹²Yenemiḅọ ḍukoye osi ọkịḅo ọ̀ pịrịmẹ, ọkụma yenemikaḅọ ḅe ọ̀ ḅarana kọn ọkwẹịn ọ̀ famamẹ.

¹³Yenemika ọkwẹịn ọ̀ nwọse sakịmẹ se ọ̀ jokoma nọmụ se kulumamẹ.

¹⁴Yenemikaḅọ ọkwẹịn pẹlẹpẹlẹkẹ. Mịẹḅịa jịnye nemiḅịa gbọrịḅọ sọnị ofori-ẹ, pịkịna wa fịḅọrọso seni mịẹḅịaye ineda nwọ ḍuko wa pịrịḅịa gbọrịḅọ sọnị ofori-ẹ.

¹⁵Mun nụḅọ warị la ateli mị nemika opu oḅoriḅọ kẹngẹ mị fịrịnwẹngị ọ̀ ḅụ ịnyọ famaḅịaye-ẹ.

¹⁶Kala asẹmẹnị tọkụ amanyanaḅọ sọ se, pịkịna anịa ḅẹrẹtọn apụma sịkịmamgba fị-na-ḅu-na-ḅụ sime sẹ mị tọrụsiọrị ḅie anị omi-ẹ.

¹⁷Ò kuḅie tọnye mị mịẹ, pịkịna ḅẹrẹtọn apụma ye fị gbẹịn sịkị ḅụ ye fị seni iruḅu tọrụ ḅaamaḅịa se mịnaḅụ kaịnḅo amanyanaḅọ ḅe, se amanyanaḅọ mịẹ sẹ mị anị iḅifụḅara nyanamẹ.

¹⁸Tomoniḅọ opuma ikulamẹ seni oria warị ochu mị tẹlịmakẹ ḅẹḅẹ, anị firiḅịa, se warị mị ḅịkịḅịa.

¹⁹Fị-na-ḅu-na mị ị́ mịẹse ị́ ḅieḅẹlẹmẹ, iru mị pịkịna ị́ nwana-nwanamamẹ, ọkụma maịn ma ḅụ ị́ ineda nyanaḅịaye ofori-ẹ igbiki ofori ọkụma.

²⁰Amanyanaḅọ ḅe, ngịsị miniminima ò ḍukosimama pịkịna ngọ kọn apụma sọnị ḍukosimama, jụmḅọ ị́rị́ na nyanaka ị́ya ḅọị jukuru mị ḅie sọnị. Gbọrị feni ineda ị́ kọn ọkwẹịn mị se mun ḍuko ini pịrịḅịa.