Read kirikeni Ẹklisiastis 11 Bible Online

Ẹklisiastis 11 - kirikeni bible

Ẹklisiastis 11

¹Ị́ya igbiki seni jịn sẹ apụ na sọye nyanaḅịa tuḅo ḅie chu; ị́ pịkị sọye nyanaḅịa ma enema ḅe gbọrị ene ḅụ.

²Ị́ya igbiki mị seni tọntọn-a nyọ ḅụ chu, tọntọn-a nyọ ḅụ, jokoma, anịatịḅị mị tomonikiri ḅie ị́ nyanaḅịa sifụḅara mị simeḅịa ọkụ ị́ nemikẹ.

³Anị simeọkụ simeọkụ sọnị, eje nwọ tịḅịtu da seni ḅịkị nyọ mị ḅụ, anị ḅọlọlọ simeḅịa. Soḅuno ḅakasa ḅẹḅẹ, ene koroḅịa.

⁴Fọrụ mị na, sịkị mị na pa ḅo karakara ị́ nwọ korumẹ ḅẹḅẹ, ngịsị gbọrịye sọnị ị́ ḍipi ẹkẹ ị́ pịkịna gbọrịye sọnị soku-ẹkẹ.

⁵Tamụnọ Ḅe yegoyegoye mịẹmẹ, ị́ pịkịna ineda ọ̀ mịẹarịye kaịnḅo-ẹkẹ ngịsị, anị ị́ pịkịna ineda fura eremeniḅọ ḅụlọ ḅie ịwọ-ḍumo mị sakị ọkụ nemi-ẹka ọkụ-ẹ.

⁶Dede ḅie ị́ ḍipiḅịaye ḍipi pịkịna saso ḅiri na. Ngịsị ị́ nemikẹ arịmgba iḅiọkụma pakaḅịa-etuḅo, anịkanịka ḍipiye mị ḅụ gbọrịye iḅiye mịẹtẹịn ísíye mị nẹngịḅịa.

⁷Ḅasa iḅi ene mị ḅụ tọrụḅẹlẹ nyana mị iḅimẹ.

⁸Ị́ lakụra-lakụra ḅụ ḅieḅẹlẹ nyana. Anị ḅẹrẹ nyanakẹ, ị́ ḍumo la-ḍin-la-ḍin, se ḅiekoroma na ị́ fịḅịa, anị mị ḍin latẹịnmẹ. Ngịsị tọrọkọ ḍikiḅịa gbọrịye ofori-ẹ.

⁹Ayamburamapụ, ómine ọ́mịna sịkị mị ḅụ ḅụtima. Ó ḅieḅẹlẹ ọ́ nwọ pa ịwọ ḅụ sime warasịkị. Ọ́ mịẹ ḍọkịye ọ́ mịẹ se ọ́mịna kuḅie tọnye mị ḍuko nwẹngị. Ọkụma se ḅiekoroma na ị́ mịẹye goyegoye ḅụ Tamụnọ Ḅe ọ̀ ḅẹrẹkọn ị́ pịrịḅịa.

¹⁰Ḅerenima ye ị́ ḅụḅalaḅalama anịkanịka ị́ ḅụ ọyịmaḅịaye ị́ la. Ị́ ịwọ ḅụ sime ḅọlọ sịkị la-ẹkẹ.