Read kirikeni Ẹklisiastis 5 Bible Online

Ẹklisiastis 5 - kirikeni bible

Ẹklisiastis 5

¹Ị́ ḅụ ọbị ị́ Oputẹkẹwarị munḅịa sịkị. Mun anịnyọ ye ḍawọ mị iḅitẹịn yenemika apụ ḍiepịrịye agbamịẹ ọkụ mị mịẹ nẹngịmẹ, anị siye mị ḅụ iḅiye mị nemi sikimaka apụma.

²Koroma tẹrẹrẹ ị́ ọkwẹịn, pịkịna iḅiọkụ koromakaḅụ yeḅereni Tamụnọ Ḅe pịrịma. Soḅie ori omi-ẹ se ị́rị́ sẹkiri ḅie ị́ omi-ẹ, ọkọ ẹrẹchị ị́ ineda mịẹ-ẹkaye ḍukoma.

³Ị́ ị́ ḅụ ḅalaḅalamatẹịn sịkị, gbarịmaka ḅaraḅụ ị́ si-a ḍawọ kọntẹịnmẹ, ị́ pịkị ọkwẹịntẹịn sịkị ị́ yenemika ọkwẹịn kọntẹịnmẹ.

⁴Anịẹrẹchị ị́ yeḅereni Tamụnọ Ḅe pịrịmẹ ḅẹḅẹ, ị́ ineda kirikiri mịẹḅịa ḅara nwọse anị mịẹsin. Ò Yenemikaḅọ ḅe na mịẹḅịaye ofori-ẹ. Ị́ ḅereni se ị́ mịẹḅịaye mị mị-ẹ.

⁵Ngịsị yeḅerenika mị iḅitẹịn yeḅereni se mịẹka mị nẹngịmẹ.

⁶Ḅerenima ị́rị́ ḅarana kọn ọkwẹịn ma ị́ se mun si ḅie chu, mịẹso sịkị ị́ ḍuko Tamụnọ agbamịẹḅọ ḅe pịrị ẹka ḅara na ị́ ọkọ ḅẹkẹ. Cheye gose ị́ Tamụnọ Ḅe mịẹse ori ịganị nyana ị́ pịrị? Cheye gose ị́ mịẹse ori ị́ nwẹngịsaye ma sima.

⁷Ị́ ḍawọ kọn la-ọkụ la-ọkụ, yeḅụ oforika fịrị ị́ nwọ nwẹngị la-ọkụ la-ọkụ, anịkanịka ị́ ọkwẹịn la-ọkụ la-ọkụ sọnị, mịẹkamịẹka ḅaraḅụ Tamụnọ Ḅe ị́ ò ḍiki ḅalafaḅịa.

⁸Sẹkẹnị ogbo mị igwein apụ pụnụma, pịkịna iḅi ḅẹrẹkọn ini pịrịka, pịkịna inia karakaraye mị mịẹ ini pịrịkẹ, ị́ nwọ ọrị sịkị, anị ị́ ḅụ gbiripumaye sọma. Fịrị tịḅịnịḅọ goyegoye ọ̀ nẹngịḅọ agbọ sọ ọ̀ pịrịmẹ, anịsịkị fịrị kiriḅụ ini mama apụma nẹngịḅọ pịkịna agbọ sọ ini pịrịmẹ.

⁹Amanyanaḅọ ḅe sọnị fịaye soku sịkị ḅụ mị ò kuḅie se gbanaye-ẹ.

¹⁰Ị́ igbiki ḅẹlẹmamẹ ḅẹḅẹ, ye ị́rị́ na dein koro ẹkẹ; ngọ kọn ị́ nwọ ḅimẹ ḅẹḅẹ, ị́ kuḅie tọn aye mamgba ị́ nyana-ẹkẹ. Anịmgba ḅụḅalaḅalamamẹ anị kaịnḅo.

¹¹Ị́ ngọ kọntẹịn sịkị, ị́ fịaye se tọn apụ kokotẹịnmẹ. Anịmgba ḅụ ị́ya sọye anị, ị́rị́ ngọ kọnmẹ ḅẹye mị ị́ nemimẹ.

¹²Fịrịnwẹngịarịḅọ ineda ḅakaye nyana fịḅịa anịkanịka ori ineda nyana fịẹkẹ, ọkụma anị sime ọkụ sime ọkụ sọnị ori ineda iḅiọkụma ḍin mọnọ kọnḅịa. Ngọ kọnḅọ ḅe, ye sime ḅaraḅụ, ọ̀ ḅaka aye nyana ẹrẹchị koromaḅụ mọnọ ọ̀ tọrụ sọkẹ.

¹³Mị pịkị mị tomonikiri ḅie àrị ọrịsa gbọrị ḅalafamaye-ẹ: tomoni inia igbiki kokomẹ ini ḅi sịkị ini seni fịrị ḅụ chuḅịa ẹrẹchị,

¹⁴anịsịkị gbọrị sifụḅara ḅụ anịmgba famasinmẹ, gbọrịye sọnị kọnma inia awọma pịrịka ḅaraḅụ.

¹⁵Wa mị tomonikiri mị ḅie so ọkụ anị wa anịa ḅie sọḅo ọkụ-ẹ, gbọrịye sọnị oforika ḅaraḅụ. Wa nwẹngị-a fịrị mamgba sọnị, wa seni soḅịa gbọrịye sọnị ofori-ẹ.

¹⁶Anị mị karakarakẹ! Wa ḅo ọkụ anị wa pa pịkị soḅịa ọkụ-ẹ. Wa fịrịnwẹngịmẹ, pa ḅụkụrọma fọrụ mị kunḅịa ẹrẹchị, cheye wa nwọ nyana?

¹⁷Wa mịna ḍumo ma se kanakana na, kururu na, ḅụḅalaḅala na, ḅụnwọnwọ na, obi na ḅie angaḅịa.

¹⁸Mị anị à ḍọkịpakụmaḅosaye-ẹ: tomoniḅọ goyegoye ineda mịẹtẹịnḅịaye anị Tamụnọ Ḅe se ọ̀ pịrị kpụlụ-a ḍin ma ḅie, se ọ̀ nwẹngị pakụmaḅosaye ma fị se ḅu tọrụḅẹlẹ nyana; mị anị tomoniḅọ ḅereniḅoye mị-ẹ.

¹⁹Tamụnọ Ḅe ḅaka igbiki na ngọ na nwọse tomoniḅọ pịrịmẹ, na ori àrị seni ọ̀ ḅụ tima-ẹ ḅẹḅẹ ò ḅieḅẹlẹ se ọ̀ nwẹngịsa fịrịḅụ ḅo aye ọ̀ nwọse tọrụḅẹlẹ nyana ọ̀ ḅụ tima. Anị mị Tamụnọ ḍiepịrịye-ẹ.

²⁰Tamụnọ Ḅe ḅereni ọ̀ pịrịsam na ò ḅieḅẹlẹ nwọ ḅe sịkị, ori opuma ḍumo mị kpụlụ ọkụ mị se ọ̀ ḅụḅalaḅalamama.