Read kirikeni Ẹklisiastis 6 Bible Online

Ẹklisiastis 6 - kirikeni bible

Ẹklisiastis 6

¹À ḍọkịḅo ọrịsam na mị tomonikiri ḅie tọrụkpọma simịẹmịẹaye mịẹsam.

²Tamụnọ Ḅe ḅaka igbiki na, osi na pịkị ngọ na seni tomoniḅọ pịrịḅịa, iin, ọ̀ nyana ḅiye goyegoye, ọkụma ò ḅereni ọ̀ pịrị-ẹkẹ ori anịa tọrụḅẹlẹ nyana. Jịn igoniapụ re mị anịa tọrụḅẹlẹ nyanaḅịaye-ẹ. Anị mị ineda anị kaịnḅo ẹkẹ, anịmgba karakarakẹ.

³Gbọrịḅọ ineda awọ-a sọnọasi nyanaḅịa se ḅaka ḍin laḅịa, ọkụma ọ̀ la kụrama ḅaka la-ọkụ la-ọkụ sọnị, ò nemika se anịaḅụ oria ḍiekiri ḅaraḅụ tọrụḅẹlẹ nyanaka, ini pịkịna tọrụḅẹlẹma ḅara seni ò ḍipikẹ ḅẹḅẹ, anịọkụma à ḅẹḅịa na yi-so-se-fị-tọkụ iḅitẹịnmẹ.

⁴Anị tọkụ mị ini anị yi gbẹịnkẹ, anị kanakana ḅie sọ famẹ, ini anị seni ḅieḅarama nyọḅụ.

⁵Anị enekuḅu ọrịkẹ anị pịkịna ḍumo mị sime ọkụ nemikẹ, anị simeọkụ simeọkụ sọnị anị ịnyọ sara nyọ ḍọkị ọrịsam—

⁶anị ma iḅitẹịn nwọ ḍumo ḅụ ọ̀ ḅụtimakaḅọ ḅe nẹngịmẹ, ò kụra sọnọ-a ẹndẹ la sọnị. Anịḅe kuluma, gbọrị nyọ mị ini mama apụma mun-arịye-ẹ.

⁷Tomoniḅọ ọ̀ nwẹngịḅịa fịrị mamgba nwẹngịmẹ, ọ̀ pa yefịḅịa ẹrẹchị, ọkụma ọ̀ ḅaka aye nyanakẹ.

⁸Nde yenemiḅọ ḅe iḅitẹịn yenemikaḅọ ḅe nẹngị ọkụ? Ḍumo mị sime ọkụ nemi se tọrụ se anị daḅịa ọkụ nemi igweinḅọ ḅe che iḅi anị nwọse ọ̀ mịẹ?

⁹Anị mị kaịnḅo mị ḅụfụkamamẹ, mangị fọrụ mị ḍuko ọkụ simemẹ. Ị́ nyanaye mị ị́rị́na-dein-koro mị iḅitẹịn ị́ sịkịmamgba pa jịn aye ḍọkị mị nẹngịmẹ.

¹⁰Pakaye goyegoye, ḅọlọsịkị ngịsị ini tọn wẹrịsam, mine mgba pịkịna nemimẹ na, tomoniḅọ ineda kụrọ ọ̀ nẹngịḅọ na ḅẹrẹ nụnụa-ẹkẹ.

¹¹Ị́ ḅẹrẹ mị nụnụatẹịn àrị sịkị, anị sitẹịnmẹ, anị pịkịna iḅi ị́ pịrịkẹ.

¹²Nde tomoniḅọ ineda mị oria kpụlụ kaịnḅo ẹka ḍumo ḅụ iḅitẹịn ọ̀ pịrịye nemiḅịa ọkụ, tẹmẹ ḅọrọ ọkụ ḅọrọ àrị ḍumo mị? Nde tomoniḅọ ineda nemiḅịa ọkụ ọ̀ fị ḅọrọ sịkị mị tomonikiri ḅie pakaḅịaye?