Read kirikeni Ẹklisiastis 7 Bible Online

Ẹklisiastis 7 - kirikeni bible

Ẹklisiastis 7

¹Iḅi ẹrẹ iḅitẹịn yela-kunu-olo nẹngịmẹ; anịsịkị ị́ fị ene mị iḅitẹịn ini ị́ yi ene nẹngịmẹ.

²Tomoni ḍụẹịn-ḍin-arị warị mun iḅitẹịn ini ḅieḅẹlẹ yefịarị warị mun nẹngịmẹ, anịatịḅị ḍumo apụma sịkịmamgba seni inia ḅiekoroma na fị sime minemgba koru aḅẹ.

³Ngịrị iḅitẹịn ḍẹrị nẹngịmẹ, anị ineda mịẹse ngịrị ị́ tọrụkuḅu ḍiepakụmaḅịa, ọkụma anị ị́ya yekaịnḅo mị mịẹ sarasarama ḅịa.

⁴Sịkịmamgba ḅieḅẹlẹ koromarịḅọ ḅe yenemikaḅọ-ẹ. Yenemiḅọ fị se ḅiekoromamẹ.

⁵Yenemiapụ ị́ ḍiki ịganị mị iḅitẹịn yenemika apụ nime chu ị́ tokoni mị nẹngịmẹ.

⁶Yenemikaḅọ ḅe ḍẹrị mị, ịga fịnị ḅie kpapolo ọkụ simemẹ. Anị fie gbọrịye sọnị ofori-ẹ.

⁷Yenemiḅọ ḅe tomoniḅọ inumamẹ ḅẹḅẹ, ò yenemikaḅọ yemịẹ-ọkụ mịẹ aḅẹ. Ị́ ọḅụfịmẹ ḅẹḅẹ, ị́ya yemịẹḅara ị́ nwọ sima aḅẹ.

⁸Yegoyegoye anịa kuluma mị iḅitẹịn anịa sakị mị nẹngịmẹ. Ye inema iḅitẹịn ḅụdekichịẹma nẹngịmẹ.

⁹Ị́ya owoi kuḅie mị ọlọchịẹma; kuḅie ḅụ ngọrị nyana mị yenemika-ẹ.

¹⁰Ngịsị gbelama, “Yei, cheye gose olomusịkị ayema iḅitẹịn?” Anị mị nemi nyanaka gbela ḅịpị-ẹ.

¹¹Ḍumo arịḅọ goyegoye yenemi gbẹịnmẹ; fịsaḅọ aye ḅụ ini seni ị́ pịrị aye iḅiọkụ iḅimẹ

¹²anị pịkịna ineda igbiki nweni ḍụa ọkụ seni ị́ ḍụaḅịa. Yenemi mị anị ị́ kokomẹ—mị anị nemi mị nyana iḅi-ẹ.

¹³Tamụnọ Ḅe mịẹsaye seni ḅiekoroma. Nde tomoniḅọ ineda Tamụnọ Ḅe mịẹ pengemasaye gbụkụkụmaḅịa ọkụ?

¹⁴Mịẹaye ị́ ḅụ iḅiarị sịkị, ḅieḅẹlẹ nyana, se ḅụfụka ḅo sịkị; pa se ḅiekoroma Tamụnọ Ḅe ḅieḅẹlẹ na ḅụfụka na, maịn ma fịrịmamẹ; anị ḍukoma pakaḅịaye ngịsị ị́ nemikẹ.

¹⁵Tomoniḅọ yekaịnḅo ḅịa ọkụ oforika ḍumo mị ḅie, à yemamgba ọrịsam. Gbọrị iḅiḅọ fịḅịa anịsịkị ísí ḅọ ḅe ḍumo aḅẹ, ori simịẹḅọ-ẹ ḅẹ sọnị.

¹⁶Anịẹrẹchị opuma iḅima anịkanịka opuma yenemima, cheye gose ị́ ị́ ḅụ ḅaa-ao?

¹⁷Ọkụma opuma sitịḅị nyanama pịkị opuma oḅoriḅọ sọma, cheye gose ị́ fị, ị́ fịḅịa sịkị ma laka sịkị ḅụ?

¹⁸Mama ayema ḅụ ḅụsikima. Ị́ osi nyana Tamụnọ Ḅe pịrịmẹ ḅẹḅẹ, anị simeọkụ simeọkụ mịẹaye ị́rị́ na deinḅịa.

¹⁹Yenemi mị ineda ye mịẹ tomoniḅọ pịrịtẹịn oyi-a ḅẹrẹtọn apụ ineda mịẹ gbọrị opuama pịrịḅịaye nẹngịmẹ.

²⁰Mị sẹkiri ḅie sịkịmamgba karakaraye mịẹ se ngịsị mịẹirima nyanaka gbọrịḅọ sọnị ofori-ẹ.

²¹Tomoni ḍukoye goyegoye pokima, ị́ya fịrịnwẹngịḅọ ḅe ị́ wọlọarịye ị́ nwọ naaḅịa,

²²ị́rị́na-mịnaḅụ-na ị́ nemimẹ na ị́ jịn apụ wọlọaye mịẹsam tọn-a sịkịḅụ.

²³Ị̀ya yenemi mị à nwọse ma mamgba ḍọkịḍọkịmẹ. À ḍuko pẹlẹmẹ na à yenemiḅịa, ọkụma anị ị̀ saḅakoromẹ.

²⁴Nde tomoniḅọ ineda ḍumo mị fieye nemiḅoḅịa ọkụ? Anị opuma gbun wa pịrịmẹ; anị kaịnḅo mị opuma kụrọmẹ.

²⁵Ọkụma àrị ị̀ ḅụ sịkịfama yenemi na, ye ḍawọ na pịrịmẹ; à mịẹkamịẹka ḅaraḅụ ḅereni ị̀ ḅụ pịrịmẹ na à yenemi ḍọkịḅịa, pịkịna à gbela ayema ḅe pẹkẹrẹ ḅịpị ma na, pịkịna sitịḅị na yenemika-oḅoria-mịẹaye ma sime ọkụ ḍawọ nemi.

²⁶Akụ fị nẹngịye à nwọ ḍọkịḅomẹ, anị eremeniḅọ. Á nyana ị́ pịrị ḅẹlẹma mị ḍẹịn ḅara se ị́ kunḅịa anịkanịka ịgbọ kịkẹ ḅara; á seni ị́ oḅolo kelema ḅarama, ikoli ḅara seni ị́ ọlọḅịa. Tamụnọ Ḅe ḅieḅẹlẹmaye mịẹḅọ ineda pọkọ soḅịa, ọkụma á simịẹḅọ ḅe kunḅịa.

²⁷Iin, sẹkiri mị na, ye mamgba na simeọkụ ḍawọ nemiḅọ ḅe ọkọ ḅẹmẹ, à kelekelema mịn mị ḍọkịḅomẹ, à pẹkẹrẹ ḅịpị koru àrị sịkị ḅụ.

²⁸À jịn pẹkẹrẹ ḅịpị ḍọkịmẹ ọkụma à gbọrịye sọnị ọrịkẹ. Kịnị-a mẹndẹ oyiasi ḅie, àrị osi seni pịrịḅịa gbọrịḅọ à nwọ ḍọkịḅomẹ, ọkụma gbọrị eremeniḅọ sọnị ofori-ẹ.

²⁹Mị anịmgba ḅụ à ḍawọsaye-ẹ: Tamụnọ Ḅe mịẹmẹ mịna mịẹmịẹaye mamgba gbụkụkụmẹ pịkịna sarasaramẹ, ọkụma mine ngẹrị anị ḅụḅalaḅala mị se mịnaḅụ ma pịrịmẹ.