Read kirikeni Ẹklisiastis 8 Bible Online

Ẹklisiastis 8 - kirikeni bible

Ẹklisiastis 8

¹Yenemiḅọ ḅe kẹngẹ mị ye jokoma fiearịye nemiye-ẹ. Yenemi ọ̀ mịẹse ọ̀ ḍẹrịmẹ, se oria tọrụfụrụma mị somẹ.

²Amanyanaḅọ ḅe ḍukoye mị mịẹ, koromaka ḅaraḅụ gbọrịye sọnị seni Tamụnọ Ḅe karịma.

³Amanyanaḅọ ḅe ori ineda ọ̀ ḅụḅẹlẹye layelaye mịẹḅịa, anịẹrẹchị ọ̀ tọrụkuḅu nwẹngị so; ọkọsime ḅalafama nyọ simema.

⁴Amanyanaḅọ kụrọ mị ò se ḅẹrẹtọn arịye-ẹ, gbọrịḅọ sọnị pịkị ineda ọ̀ da tụḅụrụ ẹkẹ ọ̀ mịẹarịyeḅụ.

⁵Ị́ ọ̀ ḅịpị poki sịkị goyegoye, ị́ laḅịaye ofori-ẹ, yenemiḅọ ḅe, ye mị mịẹḅịa ọkụ na sịkị mị na ò nemimẹ.

⁶Yegoyegoye mịẹgbẹịn sịkị na mịẹgbẹịn ḅara na nyanamẹ, ọkụma kalaye kẹngẹ anị wa nemiye-ẹ!

⁷Mịna ḅie gbọrịḅọ sọnị pakaḅịaye nemikẹ, pịkịna ḍuko wa pịrịḅịa gbọrịḅọ sọnị ofori-ẹ.

⁸Fị ḅụ mịna ḅụ kikiḅịa gbọrịḅọ sọ ofori-ẹ anịkanịka oria ene mị dasinḅịaḅọ ofori-ẹ. Anị wa ineda pọkọso-ẹka gbọrị ọmụ-ẹ; wa ineda anị inuma se so ẹkẹ.

⁹À mịn mị mgba ọrịmẹ tomonikiri mị ḅie mịẹarịye ma à nwọse koroma ḅụ chu sịkị, tomonikiri ḅie dapụ kụrọ nyanamẹ se jịn apụ inia chuku ḅie sime tọrụsiọrịaḅẹ.

¹⁰Iin, à sitịḅịnyanapụ ọrịmẹ inia iḍupuma ḅie ini ḍipi apụ, ọkụma ini ḍụẹịn ḍipi nyọ pịkịma ḅoarị sịkị tomoni ini tokonimẹ ini inia siaye ma mịẹ gbọrị opuama mị ḅie. Mịn mị sọnị kaịnḅo ḅịa ọkụ oforiye.

¹¹Cheye gose tomoni gbọtụma ḅụkarakarama siye mịẹ-o? Anịatịḅị si mị anị kirikiri anị da gbẹịn fomuḅara nwọ dakẹ.

¹²Simịẹḅọ ineda si a sọnọasi nwọ mịẹḅịa se ọ̀ pa ḍumoḅịa. Yei iin, ini ḍukoye à nemimẹ: “Ị́ nemikase Tamụnọ Ḅe ḍukoye mịẹmẹ ḅẹḅẹ yegoyegoye deinḅịa,

¹³ọkụma anị sitịḅịnyanaḅọ ḅe na dein ẹkẹ. Inia ḍumo mị tẹmẹ kịkẹmẹ, ini pịkị kpọka ḅụ fịḅịa, anịatịḅị ini Tamụnọ Ḅe ḍukoye mịẹkẹ.”

¹⁴Ọkụma mịn mị sọnị nemiḅịa oforikaye-ẹ. Tomonikiri ḅie mịẹarịye ḍiki: da sịkị ḅụ iḅi apụma sitịḅịnyanapụma laḅịa fomuḅara damẹ, sitịḅịnyanapụma pịkịna iḅi apụ ọkịḅịa iḅi gbẹịnye mị ọkịmẹ. À nwọ ḅẹmẹ, anị kaịnḅo ḅịa ọkụ oforiye-ẹ.

¹⁵Anịẹrẹchị anị ị̀ ḅụokoromẹ na tomoniḅọ mịnaḅụ tima; anịatịḅị mị ḍumo ḅie fị na ḅu na pịkịna mịnaḅụ tima na kẹngẹ-ẹ. Wa ineda ḅụkụrọma mịn mị mịẹḅịa Tamụnọ Ḅe mị tomonikiri se wa pịrị ḍumo mị ḅie wa nwọ fịrịnwẹngịarị sịkị.

¹⁶À ḅo ḅụkụrọma yenemi se tomonikiri mị ḅie mịẹarịye ḍawọ sịkị goyegoye, àrị ọrịmẹ na ḍin na enekaka na ị́ sịsẹḅịa

¹⁷se ineda Tamụnọ Ḅe mịẹarịye kaịnḅo ẹkẹ. Ị́ ḅụkụrọma la-ọkụ la-ọkụ sọnị, ị́ ineda ḍọkịḅo-ẹkẹ. Yenemi apụ ineda ḅẹḅịa na ini nemimẹ, ọkụma ini nemikẹ.