Read kirikeni Sọlọmọn Nime Ma 1 Bible Online

Sọlọmọn Nime Ma 1 - kirikeni bible

Sọlọmọn Nime Ma 1

¹Mịn anị Sọlọmọn ḅe oria iḅitẹịn nime mị-ẹ.

²“Che-ẹ!” Ye sịkịmamgba oria ḅẹlẹma ị̀ ḅụ ọ̀ nwọ ḍiepakụma; ị́ya ḅẹlẹma mị anị ḅẹlẹ iru nẹngịmẹ.

³Kụnụ onu ị́ kelemamẹ; anị ị́ya ẹrẹ fieye chịnpakụmamẹ. Anịgose ị́ ḅẹlẹma ẹka gbọrị eremeniḅọ sọ ofori-ẹ.

⁴Ị̀ ọkị ị́ ḅụ pịrị, se wa mangịsoḅịa; ị̀ya amanyanaḅọ nwọ sọ se ị̀ se ị́ya jukuru ḅie mun. Wa gboloma se ḅieḅẹlẹ nyanaḅịa, ḅakama iruḅu pịkị ḅẹlẹma ḅie mịna ḅụ timaḅịa. Pikipikiye ofori-ẹ eremeni mamgba ị́ ḅẹlẹmamẹ!

⁵Ómine Jerusalẹm eremeni, à kurukurumẹ ọkụma à ḍikitọrụgbẹịnmẹ, Kida onwun ele ikowarịma kurukuru ọkụ, ọkụma Sọlọmọn amanyanaḅọ odo ḅie ḅọkọ kiki ḅịtẹma iḅiọkụ anị àrị iḅiọkụ-ẹ.

⁶Ị̀ ḍiki iderimama à kurukuru ẹrẹchị, anịatịḅị ịrụa mịn ị̀ tẹịnye-ẹ. Ị̀ya owuapụ mịnapụma ị̀ ḍikiḅieḅumẹ se ị̀ mịẹse àrị irumịẹ chịnmgbọlụ ozu ḅie fịrịnwẹngịmẹ. À sịkị nyanakẹ se ị̀ ḅụ telima

⁷Ḍuko ị̀ pịrị ị̀ ḅẹlẹmaḅọ, Ị́ ndeju ị́ya nama ogboma ḅọrọma mun osuein fịḅe? Àrị ndeju eneogboin ịrụa ḅie ịnyọ saraḅe? Nde à gose ị́ ḍọkịḅịaye ísí anana ḍikiḍiki apụma anana ogboma ḅie?

⁸Nyọ mị ị́ nemika, eremeni mamgba ḅụ iḅitẹịnḅọ? Nama ogboma ḅọrọ ateli ḍuko mun; se ị́ya oḅorima fịḅịaye ḍọkị anana ḍikiḍiki apụma ikowarịma angasịkị.

⁹Ị́rị́, à ḅẹlẹmaḅọ, ḍikitọrụḅụ ị́ opuma iḅimẹ Amanyanaḅọ Fẹro ḅe oria asụnma ḅe gbọrịye iḅiọkụ ị́ nwọ iḅimẹ.

¹⁰Ị́ ḅeri sime ḅerichụayema àrị ị́ya iku iḅimamẹ ị́ kọngọ sime pụkọchụaye mị anị ị́ kọngọ iḅimẹ.

¹¹Ọkụma wa goli-goli pụkọchụaye tẹmẹ ị́ pịrịḅịa ini seleḅa se ḅirima aye.

¹²Ị̀ya amanyanaḅọ ḅe oria mọnọye ọgọnọ ọ̀ ḅọlọlọ waraḅẹ, se ị̀ya olo mị fọrụ ḅie kụnụ pakamẹ.

¹³À ḅẹlẹmaḅọ ḅe ị̀ya ndo ma ọgọnọ ḅụ ḅọlọlọ ọkụma maah onu ọ̀ ḅụ pakaḅo mẹ.

¹⁴À ḅẹlẹmaḅọ ḅe ori Ẹngẹdaị irumịẹ ozu ḅie ngẹrị paka iḅi ngwengwe ma kụnụ ọkụ mị ọ̀ kụnụ ọkụ-ẹ.

¹⁵Ị́ opuma iḅimẹ, à ḅẹlẹmaḅọ; ị́ tọrụmgbọlụma okuku tọrụmgbọlụ bụnẹ ọkụ bụnẹ mẹ!

¹⁶Ị́ opuma iḅimẹ, ị̀ ḅụ yelatẹịnḅọ; ị́ ị̀ ḅieḅẹlẹmamẹ! Ịwọ osueinma mịna mọnọye sọḅịa;

¹⁷awụ chịnma ochu saraye sọ mịna warị pịrịḅịa, pịkịna saịprẹs ejema ochu sileye sọḅịa.