Read kirikeni Sọlọmọn Nime Ma 2 Bible Online

Sọlọmọn Nime Ma 2 - kirikeni bible

Sọlọmọn Nime Ma 2

¹Ị̀rị̀ papa ngwengwe-ẹ sime ọkụ à nwọ simemẹ Sharọn ḅie, tụndụ nyọ pẹsịkiri ḅie alege-ẹ.

²Alege ịga ḅie sime ọkụ mịn à ḅẹlẹmaḅọ ma eremeni ogbo ḅie sime ọkụ-ẹ.

³Gbọrị gịda chịn piriḅie ejema ogboku sime ọkụ, mịn ị̀ ḅụ yelatẹịnḅọ ḅe se jịn owuapụ na otoma ḅụ sime ọkụ-ẹ. Ọ́ tẹmẹ chuku ḅie à sime mị ị̀ tọrụḅẹlẹmamẹ, oria chịnmgbọlụma pịkị ị̀ ḅịpị ḅie ḅẹlẹmẹ.

⁴Ori ị̀ se oria alalị fịaye fị warị ḅie ḅomẹ se oria ḅẹlẹma ḅelema nwọse ị̀ gbẹịnmẹ.

⁵Samịna irumịẹ chịnmgbọlụ nwọse ị̀ya ịnyọ pịkịmaḅo se gịda nwọse ị̀ pịrị se mịẹso sịkị ịnyọ ị̀ ḅụ sọ; anịatịḅị ị́ nyana ị̀ pịrị ḅẹlẹma mị ị̀ ḅaaḅẹ! Anịatịḅị ḅẹlẹma ị̀ ḅụ palịmamẹ.

⁶Oria ereḅara mị ị̀ tịḅị sẹkẹmẹ, se oria amaḅara mị ị̀ apuramẹ.

⁷Ó ḅereni ị̀ pịrị, Jerusalẹm eremeni; ómine ọbịrị ḍun ma na owoi tụḅụra ma na ẹrẹḅụ yekarịfị na mịna ḅẹlẹma mị ḅụ ọ́ ḅịpịchu ẹkẹ.

⁸À ḅẹlẹmaḅọ ḅe pụkọ à nwọ naamẹ. Ọ̀ mangị ḅoaḅẹ tụndụma ọgọnọ, ò fin-fin chịngịma saḅama ị̀ damaḅoaḅẹ.

⁹À ḅẹlẹmaḅọ ḅe ori opu tụḅụra, anịkanịka kala tụḅụra mangị ọkụ mangịmẹ. Ḍiki! Anịnyọ ọ̀ warị agbagba ḅụ chịẹ waraḅẹ. Se pẹlẹḅọkọ ḅie toluma warịḅie ḍikiaḅẹ.

¹⁰À ḅẹlẹmaḅọ ḅe ori ọkwẹịn ị̀ pịrịaḅẹ. Sịsẹ se ḅo à ḅẹlẹmaḅọ; à ḅẹlẹmaḅọ, ḅo ị̀rị̀ na so.

¹¹Opu oḅoku sịkị mị ḅọrọsam, ene ḅarị korokẹ;

¹²ngwengwe ma àrị nyọnyọ ma ḅụ ḅịpịtolumasam. Mịn nime chu sịkị mị-ẹ; okuku ma pụkọ nweni nwọ naaḅịa sịkị ele ogboma ḅụ.

¹³Figi chịnmgbọlụma àrị sakị ḅịa-aḅẹ; ḅịasa mịnịmịnị iru ozuma àrị fọrụḅie kụnụ pakaḅoaḅẹ. Sịsẹ se ḅo, à ḅẹlẹmaḅọ; À ḅẹlẹmaḅọ ḅo ị̀rị̀ na so.

¹⁴Ị́ ḍụparị ḅie sime pokolo ḅie ḅọị okuku na kịkịnamẹ. Ye àrị ị́ya ḅẹlẹma tọrụ mị ọrị ye àrị ị́ya ḅẹlẹ pụkọ mị naa.

¹⁵Pụnụ ma kun, anị kala pụnụ awọma, ma àrị mịnịmịnị iru ozu ḅie ịwọma chụarị chịnmgbọlụma ḅaka simeogbo.

¹⁶À ḅẹlẹmaḅọ ḅe ị̀yaye-ẹ, ị̀rị̀ pịkị oriaye-ẹ. Alege ma ḅie ò fịye se oria nama ogboma pịrịpịrịmẹ

¹⁷ọkịmun dede fọrụ fie sịkị la anị kanakana mị ḅọrọso sịkị. Sarasarama pịkịmaḅo, à ḅẹlẹmaḅọ, kala tụḅụra ḅara, Bẹta tụndụma ọgọnọ ḅe pukoro nyọ mị ḅụ be ị̀ damaḅo tụḅụra nwẹngị ọkụ.