Read kirikeni Sọlọmọn Nime Ma 3 Bible Online

Sọlọmọn Nime Ma 3 - kirikeni bible

Sọlọmọn Nime Ma 3

¹Àrị ị̀ya mọnọye ọgọnọ mọnọ ọkụma, ḍin goyegoye àrị à ḅẹlẹmaḅọ ḅe ḍawọ kọn-aḅẹ; àrị ọ̀ ḍọkịaḅẹ, ọkụma àrị ineda ori ọrịkẹ.

²À nwẹngị opuama mị kelemamẹ, anịa ateli ma na ọpọkụrụ ma ḅie mgba na. À ḅẹlẹmaḅọ ḅe à nwọ ḍọkịmẹ. Àrị ọ̀ ḍọkịmẹ, ọkụma àrị ineda ori ọrịkẹ.

³Ateli ma ḅie nwẹngịma ḅọrọarị ḍinkoruapụ ma ị̀ ọrịmẹ. Àrị ini gbelamẹ, “À ḅẹlẹmaḅọ ḅe ómine ori ọrịsa?”

⁴Àrị ini wẹrịso kirikiri mị àrị ori ọrịye-ẹ. Àrị ori ọlọmẹ se ḅereni ọ̀ pịrịkẹ ò so ọkị nweni àrị ò se ḅo ị̀ nyengima warị lamẹ, se ò se ini ị̀ yi jukuru ḅie chumẹ.

⁵Ó ḅereni ị̀ pịrị, Jerusalẹm eremeni; ọbịrị ḍun ma na owoi tụḅụra ma na ọ́ nwọ karịfị na mịna ḅẹlẹma mị ḅụ ọ́ ḅịpị chuẹkẹ.

⁶Mịn cheye nwọ onwun ele ḅie nwẹngịmabo-ao onwoin kpo sime ọkụ, tuḅonima dẹrị insẹnsị na maah olo na anịaḅụ kụnụ aḅẹ?

⁷Sọlọmọn ḅe oria emine ọgọnọ ini ò deki ḅoaḅẹ; owuni-a tesi mị ò koruarịye-ẹ, Izrẹl ḅie iḅiọkụma owusọ ḍin apụ-ẹ.

⁸Inimgba ini kongo se owusọ ḍinmẹ; ini anị kụrọ owu-akọnị-ẹ. Ọrụḅọḅọ kongo se ọ̀ ḅụ ọbị waraḅẹ, se ọbị ḍin mị koruaḅẹ.

⁹Ini Lẹbanọn ḅụ iḅitẹịn chịn se kara emine ọgọnọ ini Amanyanaḅọ Sọlọmọn ḅe dekimẹ.

¹⁰Anịa ịkọlị ma ini seleḅa se mịẹmẹ; anịa ọgọnọ ini goli se ḍori kelema ḅịtẹ se gbẹịnmẹ. Jerusalẹm eremeni ma ḅẹlẹḅara se ḍori pulo-pulo tọrụ ḅịtẹ ini nwọse anịa simeayema gbẹịnmẹ.

¹¹Zaịyọn eremeni, ó ḅo Amanyanaḅọ Sọlọmọn ḅe ọrị. Nyọngọrọ ma se ori eresime ene ò chira amanyanaḅọ chu ọ̀ nwọ chira waraḅẹ, ḅieḅẹlẹ ò kuḅie ḅein ene ḅụ.