Read kirikeni Sọlọmọn Nime Ma 4 Bible Online

Sọlọmọn Nime Ma 4 - kirikeni bible

Sọlọmọn Nime Ma 4

¹Ị́ kọn iḅi, à ḅẹlẹmaḅọ! Ị́ tọrụmgbọlụma ḅịarị ọkụ ḍiki tọrụ gbẹịn ḅịtẹ ḅie. Ị́ tịḅị inime ma sẹkịarị ḅara anị Giledị chịngị aka oḅori ogbo nwẹngị koroarị ọkụ simemẹ.

²Ị́ya aka ma ḅịa ḅara anị ini wẹkẹrẹngẹ oju-ichuka kịrị se sịkịrị anana awọ ḅịa ọkụ. Anịa ḅụ iriye ofori-ẹ; arịmgba karagbasị waraḅẹ.

³Ị́ ḅịpị-a pẹkẹrẹ ma àrị opuma iḅime pulo-pulo iri sime ọkụ; àrị kọn iḅi ị́ ọkwẹịn sịkị. Ị́ya ikuma tọrụgbẹịn-ḅịtẹ ḅie àrị ḅịa pakamẹ.

⁴Ị́ kọngọ mị anị ọgbọkọ ḅara sime so ọkụma anị ḅo Devid ḅe oria ọgọnọ warị mị na kịkịnamẹ, anị kelekele pịkị sịnịnị-sịnịnịmẹ; agbọ-a mẹndẹ oyiasi fịnjị nwọse tẹmẹ pụkọchụaye anị kpọ kelema waraḅẹ.

⁵Ị́ya ndo ma àrị opuma ḍikitọrụgbẹịn so ọkụma àrị owoi tụḅụra na kịkịnamẹ, anị mama ịkpatụ ḍun alege ma ḅie yeḍọkịfịarị namama.

⁶À maah olo chịngị mị ọgọnọ simeḅịa, kụnụ insẹnsị ma chịngị mị ọgọnọ, ọkị nweni dede fọrụ fie sịkị laḅịa se kanakana mị kansoḅịa.

⁷Ị́ kọn iḅi, à ḅẹlẹmaḅọ; ị́ karakara gbasịmẹ!

⁸Lẹbanọn Tụndụ ma ọgọnọ ị̀rị̀ na pakaḅo, à yasa eremeniḅọ; ị̀rị̀ na Lẹbanọn ḅie pakaḅo. Amana Tụndụ tịḅị ọgọnọ na, Sena Tụndụ na Hamọn Tụndụ na ọgọnọ koroḅo, anị chịrịḅama na chịrị ma na anga nyọ mị.

⁹Ị́ḅụ yela eremeniḅọ, pịkịna ị́ chụa pụkọchụaye na ị̀ kuḅiemgbọlụ fẹ ọkịsam.

¹⁰Ị́ya ḅẹlẹma mị ị̀ ḅieḅẹlẹmamẹ, ị̀ḅụ yela eremeniḅọ. Ị́ya ḅẹlẹma mị ḅẹlẹtẹịn iru mị nẹngịmẹ; ị́ya kụnụ ḅakatẹịn jịn kụnụmaye nẹngịmẹ.

¹¹Ị́ ḅịpị-a pẹkẹrẹ ma ḅụ ḅẹịn omi-ẹ, ị̀ya iḅi eremeniḅọ; ị́ya ọkwẹịn mị ndo mengi na ḅẹịn na sọ ị̀ pịrịmẹ. Ị́ya ḅụchụaye mamgba Lẹbanọn kụnụ onu nyanamẹ.

¹²Ị̀ḅụ yela eremeniḅọ, à ya eremeniḅọ ma anị, ḅọị ozu-ẹ, ogbokiaye ozu-ẹ, sosikima kiriḅie pakaḅo mengi-ẹ;

¹³anị nyọ chịnma iḅiọkụ pakamẹ. Àrị chịnmgbọlụ ozu kịkẹmẹ, pịkị iḅitẹịn chịnmgbọlụ nwọ chụamẹ. Hẹna na nad na chịnmgbọlụma anị nyọ kụrọkẹ,

¹⁴anị nyọ kọn chịnmgbọlụ ofori-ẹ, safrọn na, kalamọs na, ịkọmụ na, anịkanịka insẹnsị ḅụ tọrụ kịrịkịrịaye na. Maah olo na alọis na anị nyọ ḅụ pakamẹ pịkịna kụnụtẹịn-aye-ẹ.

¹⁵Lẹbanọn Tụndụ ma ḅie anị ideri mengi kan pakaḅo ozu kirima pisimaye-ẹ.

¹⁶Sịsẹ ọgọnọ fọrụ. Chuku fọrụ, fie ị̀ya ozu ọgọnọ sara; se kụnụ fọrụ se ḅeinma. Ye à ḅẹlẹmaḅọ ḅe oria ozu ḅie ḅo se anị nyọ ḅụ ḅẹlẹtẹịn chịnmgbọlụ fị.