Read kirikeni Sọlọmọn Nime Ma 5 Bible Online

Sọlọmọn Nime Ma 5 - kirikeni bible

Sọlọmọn Nime Ma 5

¹Àrị ị̀ya ozu ḅie sọsam, ị̀ḅụ yela eremeniḅọ. Ị̀ya kụnụmaye ma na maah olo ma na à nwọ koḅiri aḅẹ; àrị ị̀ya ḅẹịn na ḅẹịn akpa na nwọ taḅaḅẹ; àrị ị̀ya iru na ndo mengi na nwọ ḅuaḅẹ. Ọ́ fị, ḅẹlẹmapụ, pịkị ḅu ọkịmun ḅẹlẹma ọ́ tọrụsọ sịkị la!

²À mọnọarị sịkị, ị̀ kuḅie mọnọkẹ. À ḍawọmẹ, à ḅẹlẹmaḅọ ḅe, ḅọkọ mị gbolo aḅẹ. Ye à sọḅo, ị̀ya iḅi eremeniḅọ, ị̀ḅụ yela eremeniḅọ, ị̀ya okuku. Ijiriji ị̀ tịḅị pisimamẹ, otita ị̀ tịḅị inime ma oḅokumamẹ.

³À ḅụchụaye sinsam; nde à pịkị gose ḅụchụaye chụaḅịaye? Ị̀ ḅụọma à sịkịrịsam; nde à gose pịkị àrị ịlọlịmaḅịaye?

⁴À ḅẹlẹmaḅọ ḅe ḅara se ḅọkọ mị lamamẹ, anị ị̀ kuḅie jikeye-ẹ na à ḅẹlẹmaḅọ ḅe ò kpekisam.

⁵À ḅụkarakarama ọ̀ pịrịmẹ, ọ̀ sọḅo. Ị̀ ḅarama maah olo àrị gbẹịnmẹ, ị̀ ḅaratụmgbalị ma maah olo mengi àrị lamẹ, à ḅọkọ finjiye mị ọlọ ọkụma.

⁶À ḅọkọ finji à ḅẹlẹmaḅọ ḅe pịrịmẹ, ọkụma ọ̀ ḅọrọ sosam. Ị̀ tẹmẹ famẹ! Àrị ọ̀ ḍọkịmẹ, ọkụma àrị ineda ori ọrịkẹ; àrị ọ̀ chịn olokumẹ, ọkụma à pẹkẹrẹ ḅịpị naakẹ.

⁷Nyọ koruapụma ị̀ ọrịmẹ ini opuama mị nwẹngị kelemarị sịkị; ini ị̀ fomumẹ pịkị ye se ị̀ lamamẹ; opuama mị onu agbagba koruapụma ini ị̀ya tịḅịkikima ḅịtẹ mị kansinmẹ.

⁸Àrị ọ́ ḅara ḅimẹ, Jerusalẹm eremeni, ó nemikase à ḅẹlẹmaḅọ ḅe ọrịrị, anịatịḅị ḅẹlẹma ị̀ ḅaaḅẹ.

⁹Eremeni ma ḅụ iḅitẹịnḅọ, ị́ ḅẹlẹmaḅọ ḅe ọ̀ jịn-a ḅẹlẹmapụ ḅụ kịrị? Nde ọ̀ ḅụ opuma anịkanịka ḅaraḅụ simeye se wa gose yeḅereni ị́ pịrịḅịaye?

¹⁰À ḅẹlẹmaḅọ ḅe ori owuapụ iḅi kọnmẹ pịkị kụrọmẹ; ori na kikinaḅọ ofori-ẹ.

¹¹Ọ̀ tịḅị goli iḅiọkụ iḅimẹ; ọ̀ tịḅị inime ma fangala fangala kurukuru se wiliwili, kurukịara oju sime ọkụ simemẹ.

¹²Ọ̀ tọrụmgbọlụma ideriarị mengi aka chịẹ okuku tọrụmgbọlụ iḅiọkụ iḅimẹ, ideri mengi aka chịẹ ndo mengi se sịkịrị okuku.

¹³Oria ikuma ḅe kụnụ ḅara mị anị chịnmgbọlụ na ḍọkọḍọkọ ịnyanya na ḅein ozu kụnụ ọkụ kụnụ mẹ. Ọ̀ ḅịpị-a pẹkẹrẹma alege kịkẹmẹ, maah olo mengi arịa ḅie ma pisimamẹ.

¹⁴Ọ̀ ḅarama ini iḅiọkụ tẹmẹmẹ, ọ̀ pịkị yela iringi chụamẹ. Oria oju sịnịnị oḍu kịkẹmẹ, yẹrịyẹrị ḍụparị se tẹmẹye.

¹⁵Ọ̀ ḅụọ furoma àrị kụrọmẹ, ḍụparị kụrọ ọkụ goli ọgọnọ pikemẹ. Ò gelemẹ, Lẹbanọn Tụndụma na arịa awụ chịnma na chịẹ ọkụ.

¹⁶Ọ̀ ḅịpị ḅẹlẹmẹ nọnjụ ḅụ; ori na gbolomaye goyegoye ị̀ ḅụsẹkịmamẹ. Mịn anị à ḅẹlẹmaḅọ ḅe kịkẹye-ẹ, Jerusalẹm eremeni.