Read kirikeni Sọlọmọn Nime Ma 8 Bible Online

Sọlọmọn Nime Ma 8 - kirikeni bible

Sọlọmọn Nime Ma 8

¹Mgbọkụ ị́ ḅo mbire sọḅịaka, se ị̀ nyengima à kuḅie ndo se ị́ ḍikiḍiki pakụmaḅo ḅọ ḅara. Anị ọkọ pakamẹ nwọḅẹ ọkụma, àrị ateli ogbo ị́rị́ na bịama ọkụma, àrị ineda ị́ ḅịpị nọnjụḅịa gbọrịḅọ sọ ị̀ ḍikisima ẹkẹ.

²Àrị ị́ ọkị ị̀ nyengima warị munḅịa, ị́ ḅẹlẹma se ị̀ telimaḅịa nyọ. À mịẹkpaịnma iru se ị́ pịrịḅịa, àrị mgbafa se mịẹ iru se ị́ pịrị ḅuḅịa.

³Ị́ya ereḅara ị̀ tịḅị sẹkẹmẹ, se amaḅara mị pịkị ị̀ ọlọ oḅolomamẹ.

⁴Ó ḅereni ị̀ pịrị, Jerusalẹm eremeni, na ómine ị̀ya ḅẹlẹma ḅụ ọ́ ḅịpị chu ẹkẹ.

⁵Mịn tụḅọ onwun ele ḅie ḅo-ao, tịḅị se á ḅẹlẹmaḅọ ḅe aba ọgọnọ gbanama ḅo-ao? Gịda chịn chuku àrị ị́ wosịsẹmamẹ, anị yi á jike se ini ị́ yi nyọ mị.

⁶Ị́ya ḅẹlẹma goyegoye se jịnḅọ pịrịma ị̀ sikima; ị́ ḅara kọngọ ḅụ gbọrịḅọ sọ ọlọma ị̀ sakị sikima, anịatịḅị ḅẹlẹma ị̀ ḅaaḅe. Ḅẹlẹma mị fị ịnyọ nyana ọkụ nyanamẹ; ye ḍikipụkọsoli mị iḍupu mị si ọkụ simemẹ. Anị kọrịpaka se nyọ kan fịnị kịkẹmẹ.

⁷Mengi ineda anị ḅima ẹkẹ; opu mengi ineda anị ḅilema ẹkẹ. Ọkụma tomoniḅọ nemikase oria ngọ se ḅẹlẹma mị fẹ ḍọkịmẹ nwọ ḅẹḅẹ, ḍikisima anị arịmgba ḅụ ọ̀ nyanaḅịaye-ẹ.

⁸Wa kala eremeni mịnaḅọ nyanamẹ, ọkụma árịa ndo ma ma bokẹ. Wa chemịẹ á pịrịḅe asẹmẹnị tọkụ ḅo á sime ḍọkịḅịa sịkị?

⁹Árị nemikase onu agbagba ọkụma, wa árịa ọgọnọ seleḅa sokopi warị nama á pịrịḅịa. Ọkụma árị nemikase onu ḅọkọ-ẹ ḅẹḅẹ, wa awụ chịn ḍụpọ se á gbẹịnḅịa.

¹⁰Ị̀rị̀ gbọrị onu agbagba-ẹ, pịkị ị̀ya ndo ma anịa sokopi warị-ẹ. À ḅẹlẹmaḅọ ḅe ò nemimẹ na ọ̀ ḅụ ye ị̀ pụkọtan pịkị ị̀rị̀ na deinmẹ.

¹¹Sọlọmọn ḅe ọ̀ gbọrị irumịẹ chịn ozu nyanamẹ Beal Hemọn ini nwọ chịn nyọ ḅụ. Ori irumịẹ chịn ozu mị se anị ọkọ apụ pịrịmẹ; ọrụḅọḅọ se ọ̀ gbẹịnye anị seleḅa okpokpo-a mẹndẹ oyiasi fịnjị-ẹ.

¹²Sọlọmọn ḅe ori ineda oria mẹndẹ oyiasi fịnjị igbiki ma ọkịḅịa, se ozu kọrị apụma oyiasi ma ọkịḅịa inia ḍiekiriye ḅụ; Ị̀rị̀ à jokoma sime ị̀ pịrị gbọrị irumịẹ chịn ozu nyanamẹ!

¹³Ye ozu ḅie àrị ị́ pụkọ naa, à ḅẹlẹmaḅọ; ị̀rị̀ na nwẹngịapụma ini ị́ pụkọ naa nwọ koruaḅẹ.

¹⁴Sarama ị̀ damaḅo, à ḅẹlẹmaḅọ, owoi tụḅụra ḅara, tụndụ ọgọnọ kụnụ àrị chịnmgbọlụma paka nyọ sime ayamburama tụḅụra ma kịkẹḅọ.