Read kirikeni Aịzaya 11 Bible Online

Aịzaya 11 - kirikeni bible

Aịzaya 11

¹Devid amanyana ọrụ mị, ini pẹlẹgbinsa eje kịkẹmẹ; ọkụma pẹlẹ chịn chuku mị ḅụ ịwọ ịkpangị sopaka ọkụ, anị ịwọ amanyanaḅọ Devid furo ḅie apụma ḅie pakaḅoḅịa ọkụ-ẹ.

²Nyanaḅọ Ḅe ọ̀ kụrọ na nemi na pịkị iḅi koroma na tụkụma ḅara nwọse yemịẹḍin na seni ọ̀ pịrịḅịa ò se ḅẹrẹtọn oria tomonima pịrịḅịa. Ọ̀ Nyanaḅọ Ḅe tọnye mị nemi pịkị osi se ọ̀ pịrịḅịa,

³ọ̀ tọnye mịẹ mị ọ̀ pịkị nwọ ḅẹlẹmaḅịa. Ò tomoniḅọ simeḅara na ḅeri ḅụ naaye na nwọse ḅẹrẹkọn ẹkẹ;

⁴ọ̀ karakara ḅẹrẹkọn igwein apụma pịrịḅịa ọ̀ pịkị ḅarachụa mịẹḅịa ọkụ ofori apụma pịrịḅịa. Ọ̀ pịrịḅịa kụrọḅụ tomonima ini fomuḅara daḅịa, se siaye mịẹapụ ma ini fịḅịa.

⁵Karakaraye na ḍukoḅịaye-ḅụ-ofori mịẹmịẹaye na, anị ò se ḅẹrẹtọn oria tomonima pịrịḅịaye-ẹ.

⁶Piri obiri na anana na gbọrịanga deinma angaḅịa, ọpọ-chịrị pịkị oḅori awọ na pịkị gboloma ḅọlọlọḅịa. Nambulo awọ na chịrịḅa awọ na yefị gbolomaḅịa, anịsịkị kala awọmẹnị anị àrị ḍikiḍikiḅịaye-ẹ.

⁷Nambulo na opu-piriḅie-owoi nama na yefị gbolomaḅịa, se arịa awọma pịkị gbọrịanga ḅụ deinma ḅọlọlọḅịa. Chịrịḅa ma àrị nambulo osuein fị ọkụ se osuein fịḅịa.

⁸Ye kalatọkụ la-ẹkẹ ọ̀ ḅọrọ nweni ḅaaḅaa oruwu na kpekima ti sọnị.

⁹Tamụnọ osi nyana chịngị, Zaịyọn ọgọnọ, yese-nweni lamaḅịa gbọrịye sọnị sime ẹkẹ anị ḅọrọ siye sọnị. Ama mị mgba Nyanaḅọ Ḅe nemi anịa ḅie ḅeinḅịa, anị mengi opu-a tọrụ ma ḅie ḅein ọkụ mị.

¹⁰Gbọrị ene ḅoaḅẹ, anị Devid amanyana ọrụ mị ḅụ ḅoḅịa ịwọ amanyanaḅọ ḅe ori elekima sọ se sẹma pịrịḅịa. Oria amanyanaḅọ opuama mị ḅie ini koḅirima osi seni ọ̀ pịrịḅịa.

¹¹Anị ene mị ḅo laḅịa sịkị, Nyanaḅọ Ḅe, ọ̀ pịkịna gbọrị sịkị nwọse oria kụrọ mị seni Asiria ḅie na Ijipt ḅie na pịkị Patrus amama, Itiopia, Ilam, Babilọn na pịkị Hamat na ḅie kọn apụma na tọrụaka amama na pịkị tọrụ ma ḅie chọ ma ḅie kọn oria tomonima ọkị pịkịma ama ḅoḅịa.

¹²Nyanaḅọ Ḅe, gbọrị ịkpata ọ̀ nwọ dekichịẹmaḅịa elekima ḅaraḅụ, se sẹma ḍie na, ọ̀ pịkị sẹkiri ḅie galagala oria tomoni Izrẹl na Juda apụma na koḅiriaḅẹ, sẹkiri inein-a ịkọlị ma ḅie, se ini seni pịkịma ama ḅoḅịa.

¹³Izrẹl amanyanakiri mị anị ḅarị ngịsị Juda mị sọlị ẹkẹ, Juda sọnị ḅarị Izrẹl na taraka ama sọ ẹkẹ.

¹⁴Gbọrịḅụ ini owu seni Filistia mị pakaḅịa ịrụasọsọ nyọḅụ, se ini ịrụapakapaka nyọ ḅụ sime apụma ḅaasinḅịa. Ini Idọm apụma nẹngịmaḅịa pịkị Moab apụma na, anịsịkị Amọn apụma ini tọn ini pịrịye nwọ mịẹḅịa.

¹⁵Nyanaḅọ Ḅe ò Suẹz ẹgẹdẹ mị samịnamaḅịa, ọ̀ pịkịna ọfịrị-fọrụ nwọ seni Yufretis mị samịnamaḅịa, sọnọma kala gbam-gbam ideri mengi kẹngẹ ọ̀ nwọse koromaḅịa, mịẹsosịkị nweni ineda ḅụọ se arịa ḅie nwẹngị saḅaḅịa ḅara.

¹⁶Asiria ḅie gbọrị opu ateli paka oria tomoni Izrẹlapụma pịrịḅịa, anị anịnyọḅụ fịkọnma apụma, anị anị eneḅụ anị paka inia olomu-aḍapụma pịrị ḅara ini Ijipt ḅie pakaso àrị sịkị.