Read kirikeni Aịzaya 16 Bible Online

Aịzaya 16 - kirikeni bible

Aịzaya 16

¹Onwun ele mị ḅụ sime Sila opuama Moab apụma gbọrị ayamburama anana tọkụ se ḍie Jerusalẹm ḅie ḅẹrẹtọn arịḅọ ḅe pịrịmẹ.

²Anọn Tọrụ mị aka ini koru simemẹ, se ini sịsẹ nwẹngị damunḅịa nyọ nemika ḅaraḅụ, ini nwẹngị iwo nwẹngị iderima ḅọrọmẹ, anị feni-warị ḅie ini depakụma fenima sime ọkụ.

³Ini nwọse Judapụma ḅẹmẹ, “Wa mịẹḅịaye ò kele nwọ ḍuko wa pịrị. Eje eneogboin anịa ḅarama finjima nyọ gbẹịn oḅokuma ọkụ ọ́ nwọse wa gbẹịn, se wakele ọ́mịna chuku ḅie sime ịnyọsara. Wa ḅo ịnyasọ-ẹḅomẹ; tomoni ineda wa ḍọkịḅo ẹka nyọ ḅụ ọ́ wa ḅọị.

⁴Ye wakele ọ́mịna ama ḅie anga. Wa ḅaafama ḍọkịarị apụma ḅara ḅie ọ́ wa ḅọị.” (Nweni pụnda na ama kangulugulu na kulumaḅịa, se nwọ sẹ mị kanguluguluma àrị apụma ini soḅịa.

⁵Anịsịkị anị Devid furo ḅie apụma ḅụ gbọrịḅọ ḅo amanyanaḅịaye-ẹ, ọ̀ pịkị karakaraye ḅụ na ḅẹlẹma ḅụ na ḅẹrẹtọn tomonima pịrịḅịa. Ọ̀ sarasarama mịẹgbẹịn karakaraye mị mịẹḅịa, ọ̀ pịkị ọrịḅịa na karakaraye mị mịẹmẹ.)

⁶Judapụma nwọ ḅẹmẹ, “Moab apụma ini opuaye mịẹ la-ọkụ wa naamẹ. Wa nemimẹ na ini opuma ḅụdekichịẹma-chịẹmamẹ ini pịkị tomoni ogboku iniaḅụ ḍuko gololoma-gololomamẹ, ọkụma inia ḅụboma mamgba papaye-ẹ.”

⁷Moab apụma ini owuḅịa, ini da tọrụsiọrị ma gose. Kị Hirẹs opuama mị ḅie ini fịfị iḅi fịayema ini nwọse ḅiekoroma sịkị inimgba ini owuḅịa. Kuḅiesi ḅụ ini ḅarị yeseḅiekoromakẹ.

⁸Hẹshbọn na kpeki ozuma na pịkị Sibma apụma nyana irumịẹ chịnmgbọlụ ozuma na ini àrị kọsịma gulugulumasam—àrị irumịẹ chịnmgbọlụ ozuma ḅie iru ma anị sẹma ḅie ḅẹrẹtọn apụma ḅụ inia tọrụ ḅaama aye ma-ẹ. Gbọrị sịkị ḅụ ma ozuma àrị finjima paka mun Jiza opuama mị lamẹ, àrị pịkị ịrụapakapaka nyọ daọrụ ḅụ wasama mun piri ele mị lamẹ, àrị pịkị mun Fị Tọrụ mị ḅụ ịrụasọsọ ísí pẹkẹrẹ mị sọ lamẹ.

⁹Mịọkụ, Jiza mị gose àrị owu ọkụ anị à pịkị Sibma irumịẹ chịnmgbọlụ ozuma gose owu ọkụ-ẹ. Hẹshbọn na Ẹliele na gose àrị owu mengi saramẹ, anịatịḅị fịaye soku sịkị ḅụ, tomonima ini soku se inia ḅieḅẹlẹmaḅịaye ḅarị ofori-ẹ.

¹⁰Fịaye pakụma ozu kirima ḅie mịọkụ ḅieḅẹlẹarịḅọ ofori-ẹ. Ozu ma ḅie oloku nime chuarịḅọ ḅarị ofori-ẹ. Tụmgbakị elelenda nanga se arịa ḅie mengi pakụmaḅo irumịẹ apụ ḅarị ofori-ẹ. Ḅieḅẹlẹ oloku tịḅịḅie ma àrị kulumasam.

¹¹Moab mị gose ngịrịḅụ ị̀ ḅie fiemẹ, à pịkị gbunma ngịrịmẹ Kị Hirẹs mị gose.

¹²Moab apụma ini papa mun tụndụma ọgọnọ inia oru-a warịma na lụgụ-a warịma na ḅie inia oru ma tẹkẹtẹkẹ iniaḅụ ịnyọ famamẹ, ọkụma anịse ini mịẹḅịa gbọrị iḅi sọnị ofori-ẹ.

¹³Mịn anị aya pịrịpịrịḅụ Nyanaḅọ Ḅe Moab mị na gbolomaye ḅụ pịrị oku-ẹ.

¹⁴Mịọkụ Nyanaḅọ Ḅe nwọ ḅẹmẹ, “Tẹrẹ-a kụra dam laḅịa sịkị, Moab mị nyana opu ngọ mamgba ịmaịnfaḅịa. Anị nyana ḅaka tomoni mamgba ḅụ boka kalapụ kẹngẹ anị fịka-ḅaraḅụ kọnḅịaye-ẹ, iniaḅụ ịnyọ pịkị opuma faḅịa.”