Read kirikeni Aịzaya 2 Bible Online

Aịzaya 2 - kirikeni bible

Aịzaya 2

¹Mịn anị Tamụnọ Ḅe seni Emọs tọkụ Aịzaya ḅe fịrịma oku-ẹ Juda na Jerusalẹm na gbolomaye ḅụ:

²Dein sẹma ḅie simeḅịa Oputẹkẹwarị mị chịẹ tụndụ mị ọgọnọ anị nyọ mamgba ḅụ geletẹịnḅịa nyọ mị-ẹ, chịẹ geletẹịn chịngị mamgba nẹngịḅịa. Tọntọn-a sẹ kpokpo ḅụ anị damaḅoḅịa,

³se anịa tomonima nwọ ḅẹḅịa, “Ó ye wa iwo Nyanaḅọ Ḅe chịngị mị damamun, Izrẹl Tamụnọ Ḅe Oputẹkẹwarị mị. Ọ̀ tọn se wa mịẹḅịaye ọ̀ nwọ seni wa telimaḅịa; ọ̀ sẹlẹsa ateli ma ḅie wa nwẹngịḅịa. Anịatịḅị Nyanaḅọ Ḅe oria telimaye ma Jerusalẹm ḅie ḅụ ḅomẹ; Zaịyọn ḅie ḅụ ọ̀ wẹrị ọkwẹịn oria tomonima pịrịmẹ.”

⁴Opu-a sẹma ogboku ọ̀ ḅẹrẹ tẹlịmaḅịa. Inia kongo ma ini seni ozu kiri soku ayema ḅie ḅakụchuḅịa se inia sụḅa ma seni ngwengwe ozu tẹlịma kingi mịẹḅịa. Sẹ ma àrị ḅarị owu sọ ẹkẹ, àrị ḅarị ngịsị ḅụkarakarama owu pịrị ẹkẹ.

⁵Mịọkụ, Jekọb furo ḅie awọ, ó ye Nyanaḅọ Ḅe seni wa pịrị enekuḅu mị ḅie nwẹngị!

⁶Yei Tamụnọ, ị́ya tomonima ị́ ini sịkịsam, Jekọb furo ḅie pakaḅo apụma! Ḍirikọrị arịa mịẹmịẹaye ama mị ḅie ḅeinmẹ, ịrụapakapaka nyọ ḅụ ọkịmun Filistia mị la. Tomonima ini jịn sẹ apụ ama angangaḅara ḍukonwẹngịmẹ.

⁷Inia ama ḅie seleḅa na goli na ḅeinmẹ, pịkịna inia ngọ nyana mị kuluma nyanakẹ. Inia ama ḅie asụn ḅeinmẹ, inia owuni-a kporokporoma pịkị kuluma nyanakẹ.

⁸Inia ama ḅie oru ḅeinmẹ, ini pịkịna ini ngẹrị inia ḅarama seni tẹmẹaye tẹkẹtẹkẹmẹ.

⁹Ini ọrụḅọḅọ mịẹiderima pịkịna nụḅọ ḅụgereremaḅịa. Siḅụ-ḅarasin ini pịrịma Nyanaḅọ!

¹⁰Ini chịngịma ọgọnọ ịkụma ḅie sime pokolo ma ḅie ḅọịḅịa, anịkanịka ini kiri ḅie olulu sokuḅịa anị, Nyanaḅọ Ḅe ịganị na kụrọ na, oria boma na ḅụ ḅọịḅịa nyọ.

¹¹Gbọrị ene ḅoaḅẹ, tomoni opuaye mịẹ mị kulumaḅịa sịkị, pịkị tomoni ḅụdekichịẹma mị ini nwọ famaḅịa. Anịsịkị Nyanaḅọ Ḅe ngẹrị mị ẹrẹ ḅụ na opu na, boma ḅụ na geletẹịnḅịaḅọ-ẹ.

¹²Anị ene ḅụ Kụrọmamgba Nyanaḅọ Ḅe, ọ̀ kụrọḅọ goyegoye mịẹiderimaḅịa, pịkịna opuma ḅụdekichịẹma se ị̀rị̀-re-ị̀rị̀-ẹ nwọ ḅẹḅọ goyegoye na.

¹³Lẹbanọn ḅie sime gololo awụ chịn mamgba ọ̀ ḅaasinḅịa pịkịna Bashan ḅie sime kuru chịnma na.

¹⁴Gololo tụndụma na chịngịma na ọ̀ ḅaa kiri pịrịḅịa.

¹⁵Sokopi warị layelaye na, pịkị kụrọ amama kelema onu ma na, ọ̀ ḅaa kiri pịrịḅịa.

¹⁶Ḍụḅatẹịn pịkịna iḅitẹịn onwoin arụ ma ò ḅilemaḅịa.

¹⁷Tomoniḅọ opuaye mịẹ mị kulumaḅịa, pịkị tomoniḅọ ḅụdekichịẹma mị fasinḅịa. Ini tẹmẹ se tẹkẹtẹkẹ oru mamgba faḅịa, Nyanaḅọ Ḅe ngẹrị anị anị ene ḅụ ini tokoni gololomatẹịnḅịaye-ẹ.

¹⁹Tomoni chịngịma ọgọnọ sime ịkụma ḅie ḅọịḅịa, anịkanịka ini kiri ḅie olulu soku ḅịa mịẹsosịkị Nyanaḅọ Ḅe oria ịganị na, opu na, boma na ḅo sẹkiri mị jikeḅịa sịkị ini ḅọịḅịa ḅara.

²⁰Anị ene mị ḅolaḅịa sịkị, ini goli na seleḅa na seni tẹmẹ oru ma, ini àrị se gbin wokumaḅịa, se àrị sarakoroma ofunguru ma na poku ma na pịrịḅịa.

²¹Nyanaḅọ Ḅe ḅo sẹkiri jikeḅịa sịkị tomoni olulu ma ḅie na chịngịma ḅie sime ịkụ pokolo ma ḅie na ḅọịḅịa ini pa Nyanaḅọ Ḅe ịganị ḅụ pọkọso se oria kụrọ na oria boma mị na ḅụ ḅọịḅịaḅara.

²²Ḍumogbaso-ẹkaye ma ḅụ kuḅie se gbanama. Àrị che sọye nyana?