Read kirikeni Aịzaya 22 Bible Online

Aịzaya 22 - kirikeni bible

Aịzaya 22

¹Mịn mị anị Pẹsịkiri mị ḅe ịkịan gboloma oku-ẹ. Cheye paka-ao? Nde opuama mị ḅie sime apụ mamgba inia warịochuma ọgọnọ sime se ḅieḅẹlẹarịye?

²Bebe opuama mị mgba fieaḅẹ, opu ḅieḅẹlẹ nyọfiema ama mị ḅie ḅeinmẹ. Owu ḅie fị ị́ya tomonima, owusọ ḅụ ini fịkẹ.

³Ị́ya tịḅịda apụ mamgba ini mangịsomẹ, ma ini gbọrị ḍẹịn sọnị tẹịnka simeogbo ini ini kunmẹ. Ómine ini ḍọkịḅo apụ mamgba ini kun se somẹ, ini mangị so mun ḅọlọju lamẹ nwọḅẹ sọnị.

⁴Anị gose à nwọḅẹmẹ, pa ị̀ wẹrịso àrị ị̀ya tomoni fịsapụma gose ḅụakụ-owukọn. Kele ị̀ kuḅie kụrọmaḅịaye sọnị mịẹma, ị̀ya fịsapụma iremeni awọma gose.

⁵Mịn anị ḅalafaḅụ ḅụchịẹtarịka, ọmụ ḅarasi pịkịna ḅịpị ogbosọka sịkị-ẹ Pẹsịkiri mị ḅe ịkịan ḅụ, Kụrọmamgba Nyanaḅọ Ḅe anị fịrịma mịna ọgọnọ gbanasam. Mịna opuama onu ma ini kangbinsam, se chịngịma ḅụ ḅarachụapịrị owutịḅịḅie ịḅanịma mun mẹ.

⁶Ilam ama ḅie owuni asụn ọgọnọ ḅoaḅẹ, lubu na ḍẹịn na inia ḅara omi-ẹ. Kị ama mị ḅie owuni inia agbọ ma na ḅụkarakarama waraḅẹ.

⁷Juda ḅie fịaye pakụma-pakụma lọkọlọkọ pẹsịkiri ma ḅie owuni-kporokporo ḅeinmẹ; Jerusalẹm onu ḅọkọ ma tọrọkọ asụn ọgọnọ sime owuni chịẹ waraḅẹ.

⁸Juda mị seni anịaḅụ ḍụaḅịaye mamgba ḅịkịsam. Anị mị paka sịkị ó mun sẹkẹnịogbo owuniaye koko warịma ḅie owuniaye pakụmaḅomẹ.

⁹Jerusalẹm mị kelema onu ma ḅụ si seni ọ́ tẹlịmaḅịa nyọ ọ́ nwọ ḍọkịmẹ. Jerusalẹm ḅie sime warị mamgba ḅie ọ́ ḍọkịmẹ, ọ́ pịkịna daye sumagbinmẹ mịẹse ó seni opuama mị onu ma tẹlịmaḅịa ḍụparị ọ́ nwọ nyanaḅịa ḅara. Ó mengi kokoḅịaye gose,

¹¹opuama mị ḅie mengi kokoye ọ́ nwọ namamẹ mịẹsosịkị olomu ḍapa mị ḅie mengi ḅarị ideri-ḅọrọ-ẹka ḅara. Ọkụma ọ́ ḅarị Tamụnọ Ḅe se yechịnkẹ, anị ḅọlọsa kụrama ḅie ma ayema tọnse àrịḅo kiri ọkịḅọ ḅe.

¹²Kụrọmamgba Nyanaḅọ Ḅe anị sịkị ḅụ ómine chịn-aḅẹ na ómine owu pịkịna ngịrị, ọ́mịna tịḅị ma ọ́ sẹịn kporikporima seni okuru ḅiriaye nwọ ḅiri.

¹³Anịnakaraka, ọ́ ḍẹrị pịkịna ḅieḅẹlẹmẹ, ómine anana na nambulo na ḅaapẹịmẹ ọ́ pịkịna iru ḅumẹ. Ọ́ nwọḅẹmẹ, “Wa pa iḅiọkụma yefị pịkịna ḅuḅịa! Ḅa wa fịḅịa.”

¹⁴Kụrọmamgba Nyanaḅọ Ḅe, na mịnaḅụ na ọkwẹịn ị̀ pịrị seni nwọḅẹmẹ, “Mịn si mị ḅụ ini siḅụ-ḅarasin nyana ẹkẹ ini ḍumo la ene la ene. Ị̀rị̀, Kụrọmamgba Nyanaḅọ Ḅe mị ọkwẹịn mị kọnmẹ.”

¹⁵Kụrọmamgba Nyanaḅọ Ḅe ị̀ ḅẹmẹ na à Shẹbna ḅe damamun, anị amanyanaḅọ warị mị ḍikiḍikiarị opuḅọ ḅe, se nwọse ọ̀ ḅẹ,

¹⁶“Ị́ chịnḅara ị́rị́ tụḅọ? Che kụrọ ị́ nwọ nyana se ị́ chịngịma ḅụ iḍupu karapakụma ị́ ḅụ pịrị?

¹⁷Ị́ ineda ḅịpịḅẹrẹlaḅọ sọḅịa, ọkụma Nyanaḅọ Ḅe ori ị́ sẹlẹpakụmaḅo se ị́ seni gbinwokumaḅịa.

¹⁸Ini ḅụọ-seni-tẹịntẹịn-mgbu sẹlẹ ḅara ọ̀ nwọ seni ị́ sẹlẹpakụma se ị́ seni ḍụḅatẹịn sẹ ḅie gbinḅịa. Anịju ị́ sime fịḅịa, ị́ se opuaye mịẹarị owuni-kporokporo ma anga sịkịḅụ. Ị́ ḅụgereremaye sọ ị́ nyanaḅọ ḅe warị mị mgba pịrịmẹ.

¹⁹Nyanaḅọ Ḅe, fịrị mị ḅie ori ị́ sinḅịa, seni ị́ya gololo fịrịkiri mị ḅie ori iderima kiripịrịḅịa.”

²⁰Nyanaḅọ Ḅe nwọ seni Shẹbna ḅe ḅẹmẹ, “Anị mị mịẹḅịa sịkị, àrị ị̀ya fịrịnwẹngịḅọ Ẹlaịakịm, Hilkaya tọkụ ḅe fịrịmaḅoḅịa.

²¹Àrị ị́ya fịrịtịḅịnịḅọ opu ḅụchụaye mị se ọ̀ chụaḅịa pịkịna ḅirikunye mị na, pịkịna ị́ nyana kụrọmamgba seni ọ̀ pịrịḅịa. Ḍaḅọ ḅara ọ̀ nwọ sime Jerusalẹm apụma na Judapụma na pịrịḅịa.

²²À jokoma kụrọ seni ọ̀ pịrịḅịa amanyanaḅọ ḅe chuku ḅie ḅụ, anị Devid furo ḅie pakaḅo apụma. Fịrị-warị-ḅọkọ-a sambị ma ọ̀ ḅara simeḅịa; ò finjisaye, gbọrịḅọ sọnị palị ẹkẹ, ọ̀ pịkịna palịsaye, gbọrịḅọ sọnị finji ẹkẹ.

²³Àrị iḅiọkụma ọ̀ mịẹkụrọmaḅịa gbọrị nyọḅụ, ikiḅa-chịn pike palị ọkụ, se bebe ò furo mị mgba ọ̀ ḅụ ḅọrọ osi nyanaḅịa.

²⁴“Ọkụma oria mịnapụ na pịkị pakapụ na ḅe ḅụḅalaḅala iku ọ̀ pụnụmaḅịa. Yechụọ ḅẹlẹ na yefị-a bọlị na seni yeḅụsụka ọkụ anị ini ọ̀ ḅụ sụka simeḅịa ọkụ-ẹ!

²⁵Anị mị mịẹsa ḅẹḅẹ, pike palị chịn-ikiḅa mị vọkọrọvọkọrọ se ḅịkịḅịa. Anị mị anị pịkị anịa ọgọnọ sụkaye mamgba ḅe kuluma mị-ẹ.” Nyanaḅọ Ḅe mị ò ḍuko ọkụ-ẹ.