Read kirikeni Aịzaya 25 Bible Online

Aịzaya 25 - kirikeni bible

Aịzaya 25

¹Nyanaḅọ, ị́rị́ ị̀ Tamụnọ-ẹ; Àrị osi se ị́ pịrị seni ị́ya ẹrẹ mị bomaḅịa. Ị́ ḅụbuanmaye mịẹsam; ị́ kọkọma kuḅie-se-ḅụgbana-gbẹịnḅọ ḅaraḅụ ḅọlọ sịkị ngịsị ị́ tọnye mị mịẹsam.

²Ị́ opuamama pịkị seni àrị ḅo kansaramẹ, se inia owuni-a-kụrọ-a-warị ma simamẹ. Mine-na-tarakapụ ma nama amanyanapụ odo ma àrị fagbamasosam, ini ḅarị kpoto àrị nama ẹkẹ.

³Kụrọ-a sẹma ḅie tomonima ini ị́ bomaḅịa; sitịḅịnyana sẹ opuamama àrị ị́ ḍikiḅalafaḅịa.

⁴Igwein, pịkị ḅarachụa pịrịḅọ nyanaka apụma ini mangị ị́ damaḅosam se ini pịkị tọrụsiọrị sịkịḅụ ḍụaḅọrọma nyanasam. Irisi ḅie ị́ tịḅị kikima nyọ se ini pịrịmẹ, ị́ pịkị ene ọfịrị sịkịḅụ deinyọ seni ini pịrịmẹ. Sitịḅịnyana tarakapụ, ene-sịkị-irisi ḅara nwọseni owu pakamẹ,

⁵ene korokoroka samịna-kpakịkị kiri sime ọkụ. Ọkụma ị́rị́, Nyanaḅọ Ḅe, mine-na-tarakapụ ma mịẹse ini yawụma simemẹ; ị́ mịẹse sitịḅịnyanapụ oloku-a tịḅịḅie ma yawụmẹ, soḅuno ọfịrị ene ḅụ deinma ọkụ.

⁶Mịanga Zaịyọn Tụndụ ọgọnọ Kụrọmamgba Nyanaḅọ Ḅe, ori alalị fịaye karakarama tomonikiri mị ḅie sẹ mamgba pịrịḅịa—yelatẹịn fịaye na iḅitẹịn iru na.

⁷Mịanga bẹkẹma ḅara ḅụ sẹma ọgọnọ gbana ngịrị soḅuno ma ò sinḅịa.

⁸Kụrọmamgba Nyanaḅọ Ḅe, ọ̀ fị mị fama gbasoḅịa! Ori ọrụḅọḅọ tọrụmgbọlụ owu-a mengi ma gurosinḅịa, se tomonikiri mị kelema, oria tomonima lasa ḅụgerere na tọrụsiọrị na sinḅịa. Nyanaḅọ Ḅe na mịnaḅụ na ọkọ ḍuko mẹ.

⁹Anị mị mịẹḅịa sịkị, ọrụḅọḅọ ḅẹḅịa, “Ori mịna Tamụnọ-ẹ! Wa mịna kuḅie seni ọ̀ ḅụgbanasam, ọ̀ pịkịna wa ḍụasam. Ori anị Nyanaḅọ Ḅe-ẹ! Wa mịna kuḅie seni ọ̀ ḅụgbanasam, mịọkụ mịna ḅieḅẹlẹ se pịkịna ḍorokuḅịa anịatịḅị ọ̀ wa ḍụaḅọrọmasam.”

¹⁰Tamụnọ Ḅe ọ̀ Zaịyọn Tụndụ mị ḍụaḅịa, ọkụma Moab apụma, ini ini nanga kiripịrịḅịa, anị ini fịaye pakụma aye ḅie samịna osuein nanga ọkụ simemẹ.

¹¹Ini inia ḅarama ịsụn pakụmaḅịa, ini mengi ọkịaḅẹ nwọḅẹ ḅara, ọkụma Tamụnọ Ḅe ori ini iderimaḅịa seni inia ḅarama ịnyọ ḅụfaḅụ àrị ḅileḅịa mịẹḅịa ọkụ oforikaḅụ.

¹²Moab mị, anịa kụrọ owuni-a-warị ma na, anịa gele onu ma na, ọ̀ kanḅịa, seni ini ḅịkị mbimbile ḅo fọn ḅie sọḅịa.