Read kirikeni Aịzaya 3 Bible Online

Aịzaya 3 - kirikeni bible

Aịzaya 3

¹Mịọkụ Nyanaḅọ, Kụrọmamgba Nyanaḅọ Ḅe, Jerusalẹm na Juda ḅie ma ḅụ yelayelaye na, pịkịna tomoni kuḅie-se-ḅụgbana seni iniaḅụ sẹrẹrẹ apụ goyegoye ò dekisin-ẹ tọn aḅẹ. Inia fịayema na mengi ma na ò dekisinḅịa,

²inia ḅie ọmụ alapụ ma na, owunima na, ḅẹrẹkọnkọn apụ na, ịkịankoroapụma na, ḅịrị apụma na pịkịna opu apụma na,

³inia owuni tịḅịnịma na, pịkịna ama ḅie papa opu apụ na, ama-ḍikiḍiki-kụrọ-nyana-ogbo-apụ ma na pịkị ḍirikọrị se yemịẹarịḅọ goyegoye na, inimgba ori ini dekisinḅịa.

⁴Nyanaḅọ Ḅe, ọ̀ mịẹḅịa ma-ḅo-ogulaka owuapụ awọ ama mị ḅie ḅẹrẹtọnḅịa.

⁵Ini jụmḅọ jụmḅọ na kura ẹkẹ. Esa awọ sẹnị apụ osi ẹkẹ, ngịsị yeḅụsọkapụ pịkị iḅi ini nẹngịapụ osi ẹkẹ.

⁶Gbọrị sịkị ḅoḅịa, gbọrị sẹ ḅieapụ iniaḅie gbọrịḅọ sẹlẹpakụmaḅo se nwọse ọ̀ ḅẹḅịa, “Ị́rị́ anị-sime-ọkụ-sime-ọkụ sọ, ị́ chụachụaye nyanamẹ mị ḅụfụka sịkị ḅụ, ḅo mịna tịḅịnịḅọ sọ wa pịrị.”

⁷Ọkụma ọ̀ pẹkẹrẹḅịa, “Ị̀rị̀kẹ! Àrị ineda ḅarachụa ọ́ pịrị ẹkẹ. À fịaye anịkanịka chụachụaye sọnị nyanakẹ. Ómine ị̀ seni ọ́mịna tịḅịnịḅọ mịẹma!”

⁸Iin, Jerusalẹm mị fa ḅie sọsam! Juda mị ḅịkịaḅẹ! Ini ma nyana se ḍuko se mịẹaye goyegoye Nyanaḅọ Ḅe na tụḅụrụmẹ; Tamụnọ Ḅe na-mịnaḅụ-na ini ḅelema ọ̀ wọlọmẹ.

⁹Inia koroma ma pịkịna ini ọlọḅịa. Sọdọm apụma ḅelema si mịẹọkụ ini nwọ mịẹmẹ. Ini fịfasam, ini mị anị ọkịḅo inia ọgọnọ gbanaye-ẹ.

¹⁰Karakaraye mịẹmịẹapụma inia ḅie ḅẹlẹḅịa, ye pịkị ini na iḅima munḅịa. Ini ineda ini nwẹngịsa fịrịma ḅe sọaye fịḅịa.

¹¹Ọkụma siapụma ini fasam; ini se jịn apụ mịẹaye ma mịọkụ ḅo pịkịna iniaḅụ mịẹḅịa.

¹²Igbiki se ḅọlọ pịrịpịrị apụma ị̀ya tomonima pụnda aḅẹ, pịkị ini safị apụma ininuma aḅẹ. Ị̀ya tomoni, ọ́mịna tịḅịnịma ini ómine dairima aḅẹ, anịẹrẹchị ọ́ damunḅịa nyọ ọ́ ḅarị nemikẹ.

¹³Nyanaḅọ Ḅe ọ̀ ḅụkarakaramamẹ oria ḅẹrẹ mị ḍuko, ọ̀ ḅụkarakaramamẹ ḅẹrẹkọn oria tomonima pịrị.

¹⁴Nyanaḅọ Ḅe oria tomonima ḅie sẹnịapụma na, tịḅịnịma na ọ̀ nwọ ọkịḅoaḅẹ, ḅẹrẹkọn ini pịrịḅịaye gose. Mịn ò seni inia tịḅị gbana ḅẹrẹ mị-ẹ: “Ómine irumịẹ chịnmgbọlụ ozuma simamẹ, igwein apụma ḅara ómine ọkị ayema ọ́mịna warịma ḅie ḅakawaraḅẹ.

¹⁵Ị̀ya tomonima pụnda mị, anị karakaraye sọ ọ́ pịrị ẹkẹ, pịkị tomonima inuma, ini igwein ẹrẹchị. Ị̀rị̀, Kụrọmamgba Nyanaḅọ Ḅe à ḍukosam.”

¹⁶Nyanaḅọ Ḅe nwọ ḅẹmẹ, “Ḍiki Jerusalẹm eremeni ma mịẹarị opuamịẹaye ma! Fọrụ ḅie ini inia nini ma dekichịẹma nwẹngị ma ḅọrọaḅẹ. Ini sịkịmamgba iniaḅụ seni owuapụ dẹrị aḅẹ. Ini ḅụḅaḅa deindeinma nwẹngịaḅẹ, ini seni inia ḅụọ-a chuku ma ḅụ chụa ḅirimaye ma pịkịna fieaḅẹ.

¹⁷Ọkụma à fomuḅara se ini pịrịḅịa inia tịḅị inime ma à sẹịnsinḅịa se ini kporikpori tịḅị nyanaḅịa.”

¹⁸Gbọrị ene ḅoaḅẹ, Nyanaḅọ Ḅe Jerusalẹm eremeni ma nyana seni opuaye mịẹarịaye layelaye inia ḅara ori ọkịfamaḅịa ini seni inia ḅụọ chuku anda-na iko na ḅụ chụa ḅiriaye ma, inia tịḅị ọgọnọ na, inia kọngọ ma na,

¹⁹pịkịna inia ḅarama ḅụ na, pịkịna ini seni inia tọrụ gbẹịn-gbẹịn iḅi-a ḅịtẹma na arịmgba ori ọkịfamaḅịa

²⁰inia chu ma na; ini kọrị seni inia ḅarakọngọ ma na inia konju ma na ḅụ kpọkpọ arịapụ agba poku ma na;

²¹ini seni inia ḅaratụmgbalị ma na inia nini ma na ḅụ chụachụa iringi ma na;

²²inia iḅi opu-koro-ḅụchụaye ma na papa-ḅụchụaye ma na pịkịna ḅịtẹ mamgba na pịkị igbiki-chụa-akpa ma na;

²³inia yẹrịyẹrị ḅụchụayema na, lọkọ ḅịtẹ akịsị ma na, tịḅịfịna ḅịtẹma na, pịkị inia tọrụ gbẹịn ḅịtẹma na, tịḅị ḅụ koroḅo inia ḅụọchuku ma laye ma na.

²⁴Ini kụnụ olo ọmbị na karaka ini fụrụḅịa, iḅi ḅirikunye kpọ na karaka, kanị-kanị, ḍiki ini nwọse inia ḅirikunḅịa, iḅi tịḅị inime ini nwọ nyana na karaka inia tịḅị ma firiḅịa, ini iḅi ḅụchụaye nyana na karaka, agịpẹkẹrẹ ini nwọ ḅiriḅịa; inia iḅi mị pịkịmaḅo ḅụgereremaye sọḅịa!

²⁵Opuama mị ḅie owuapụma, iin, kụrọtẹịn owuapụma sọnị ọmụ ḅie ini ini ḅaaḅịa.

²⁶Opuama mị onu ḅọkọ ma, àrị ngịrị owuḅịa, opuama mị na mịnaḅụ na papa kiri ọgọnọ sime se papa ḅụ sin eremeniḅọ sime ọkụ anị nwọ simeḅịa.