Read kirikeni Aịzaya 31 Bible Online

Aịzaya 31 - kirikeni bible

Aịzaya 31

¹Nwọ Ijipt mun se ḅarachụa ḅi apụma ini fasam! Ijipt owunima ḅe opu kụrọ ḅụ mị ini sẹrẹrẹarịye-ẹ—asụn ma na, owuni kporokporoma na, pịkị owunima ḅụ na. Ọkụma Izrẹl fịafịa Tamụnọ Ḅe ḅụ ini sẹrẹrẹkẹ, ini pịkị ọ̀ ḅụ ḅarachụa ḅikẹ.

²Ọ̀ mịẹarịye ò nemimẹ! Tọrụsiọrị se nweni pịrịḅịaye ọ̀ nwọ fịrịma pakụmamẹ. Ò sitịḅịnyanapụma na ini ḅọịḅọị apụma na ẹrẹmamẹ na ọ̀ ḅụfụka se ini pịrịḅịa.

³Ijipt apụma, ini tamụnọkẹ—ini anị papa ojumịnị chụa apụ-ẹ. Inia asụnma àrị jịn opu kụrọ nyanakẹ. Nyanaḅọ Ḅe ò ye mịẹḅịa sịkị, kụrọ sẹ mị anị ḅịkị kọsị saraḅịa, pịkị ḅarachụa pịrị ịnyọ nyanaka sẹ mị sọ ḅịkịḅịa. Arịmgba kan kọsịḅịa.

⁴Nyanaḅọ Ḅe nwọse ị̀ ḅẹmẹ, “Anana-koru-apụ oloku inia tịḅịḅie fụkama la-ọkụ la-ọkụ sọnị ini ineda chịrịḅa ḅe ḅaasa nama ḅụ ò desin ẹkẹ; anị gbọrị ḅaraḅụ, Ị̀rị̀ Kụrọmamgba Nyanaḅọ Ḅe kiki se à tịḅịkikima nyọ sọ Zaịyọn Tụndụ mị pịrị-ẹkaye ofori-ẹ.

⁵Anị feni fin-fin oria feni warị mị kelekele ọkụ simemẹ, mịẹsosịkị oria awọma, ye àrị la-ẹka ọkụ, anị Ị̀rị̀ Kụrọmamgba Nyanaḅọ Ḅe à tịḅịkikima nyọ sọ Jerusalẹm mị pịrị pịkị owusọ anị pịrịḅịa.”

⁶Nyanaḅọ Ḅe nwọ ḅẹmẹ, “Izrẹlapụ, ị̀ ḅụ ó simịẹsam, ọ́ pịkị ị̀rị̀ na tụḅụrụmẹ. Ọkụma mịọkụ, ó vinpịkị ị̀ damaḅo!

⁷Ómine mgba seleḅa na goli na ọ́ nwọse tẹmẹ siḅụ sime ḍumo nyanakaye ma se gbin wokumaḅịa sịkị ḅoaḅẹ.

⁸Asiria mị owu ḅie ini anị kanḅịa, ọkụma tomoni kụrọḅụkẹ. Asiriapụ ma owu ḅie ini mangịsoḅịa, anịsịkị inia asẹmẹnị awọma ini ini kun se omoniapụ mịẹḅịa.

⁹Inia sẹ mị daḅọ ḅe ḅalafaḅụ ọ̀ mangịsoḅịa, anịsịkị fịrịtịḅịnị ma inia ḅalafa-so-ọkụma inia owuni ịkpata ma ini àrị koroma soḅịa.” Nyanaḅọ Ḅe nwọ ḅẹmẹ—Jerusalẹm ḅie ini tẹkẹtẹkẹḅọ ḅe, anị agbamịẹ nyọ ḅụ kọrịkọrị fịnị mị nyanaḅọ ḅe-ẹ.