Read kirikeni Aịzaya 32 Bible Online

Aịzaya 32 - kirikeni bible

Aịzaya 32

¹Karakara ḅara se amanyanaḅịaḅọ gbọrị ene pakaḅoḅịa, pịkị sẹ mị ḅie karakara ḅẹrẹtọnḅịa tịḅịnị na.

²Inia ḅie ọrụḅọḅọ, fọrụ ḅie na irisi ḅie na ḅụ tịḅịkikima nyọ sime ọkụ simeḅịa. Onwun ele ḅie ideriarị mengi sime ọkụ ini nwọ simeḅịa, samịna se yepakapakaka ele ḅie sime tịḅịkikima opu ḍụparị ini nwọ kịkẹmẹ.

³Inia tọrụmgbọlụma na, inia ḅeri ma na, ini finji se tomonima ḅụpalịmaye ma pịrịḅịa.

⁴Ini ḅarị ngịsị ye-inemakaḅara se yemịẹkẹ, yekaịnḅo ḅara ini nwọse yemịẹḅịa, ini pịkị ini ḍukoye ḅụ chịẹḅịa.

⁵Gbọrịḅọ sọ koroma ẹkẹ na oḅoriḅọ ḅe ori osi nyanamẹ, anịkanịka sitịḅịnyana se ḅaralayelaye mịẹarịḅọ ḅe, ó nweni inuma ẹkẹ, ori iruo kọn ẹkẹ, ọ̀ pịkị furu ẹkẹ nwọḅẹḅịaḅọ ofori-ẹ.

⁶Oḅoriḅọ ḅe yenemika ọkwẹịn mị ọ̀ kọnḅịaye-ẹ, ọ̀ pịkị ọ̀ mịẹḅịa simịẹmịẹaye ḅe koroma nwọ kọnḅịa. Oria ọkwẹịn ma na ọ̀ mịẹḅịaye ma na anị Nyanaḅọ Ḅe ḅụ wọlọ-ẹ, ḅurupụkọtarịapụ ma ò fịye se ini pịrịkẹ, mengi-pụkọtarịapụ ma sọ gbọrịye sọnị ò se ini pịrịḅukẹ.

⁷Yenemikaḅọ ḅe siḅọ-ẹ, siaye mị ọ̀ pịkị mịẹmịẹye-ẹ; iruo kọn igwein apụma pụnụma se sime ini pịrị gbẹịnye ma ini nwọ nyana ẹka ḅara.

⁸Ọkụma osi nyanaḅọ ḅe karakaraye mị ọ̀ mịẹmịẹye-ẹ, karakaraye mị ḅụ mị ọ̀ pịkị chịẹḅịaye-ẹ.

⁹Ómine iretiarị eremeni, ye ḅụḅalaḅalamakapụ, à ḍukoarịye ọ́ nwọ poki.

¹⁰Ye ineda ómine na deinḅịa mịọkụ, ọkụma nwọ pembe ḅiri jịn kụra ḅụ ọ́mịna ḅietọn ayema ọ́mịna ḅie ḅaraḅịa, anịatịḅị ọ́ gbalaḅịa tụmgbakị elelenda ḅarị sime ẹkẹ.

¹¹Lọkọlọkọ ḍumo ḅie ó simemẹ, ye ọ́mịna ḅụfụkamaka ḅaraḅụ; ọkụma mịọkụ, ḅalafaḅụ, ọ́ ḅụgeregere nyana! Ómine ọ́mịna ḅụ ḅụchụayema sin anịsịkị ọ́mịna konju agịpẹkẹrẹ nwọ kaka.

¹²Kururu ḅụ ómine ọ́mịna ekpe ma ḅụrọ anịatịḅị fịaye pakụma ozuma na irumịẹ ozuma na ini àrị gulugulumasam,

¹³ịga na aga-ikpu na anị ị̀ya tomonima amama ḅie sẹnịarịye-ẹ. Nweni ma ḅieḅẹlẹma-ḅẹlẹma warị mamgba na pịkị tọrụḅẹlẹ ḅie ḅein opuama mị na gose ómine owu.

¹⁴Amanyanaḅọ odo mị na-mịnaḅụ-na ini anị wẹrịsoḅịa anịsịkị tịḅịda opuama mị mgba ini anị koroma mangịsoḅịa. Ini se anị ḍikiḍiki owuni-a warịma na owuniaye koko warịma na kangulugulu ḅụ sime gbasoḅịa. Piriḅie yepụra asụnma anịanga nwẹngịma nwẹngịma ḅọrọḅịa, ananama pịkị anịanga arịa fịaye ḍọkị fịfịḅịa.

¹⁵Ọkụma Tamụnọ Ḅe pịkị gbọrị sịkị ḅụ ọgọnọju oria kụrọ mị se wa sẹịnmaḅịa. Yepakụmaka ozuma àrị ḅo pịkị yepakụma ozu kiri sọḅịa, ozuma pịkị ḅakama fịaye pakụmaḅịa.

¹⁶Ama mị ḅie nyọ goyegoye ḅụ, karakara mịẹmịẹye na iḅi ḅẹrẹkọn na simeḅịa.

¹⁷Anịatịḅị tomoniḅọ goyegoye karakaraye mị mịẹḅịa, deinma na, ḅalafamaye ofori na sime gbasoḅịa.

¹⁸Tamụnọ-a tomonima inia ḅụfụkamaḅịaye ofori-ẹ, inia warị pịkị deinḅụ ḅalafamaye oforika ḅụ simeḅịa.

¹⁹(Ọkụma opu enemgbọlụ piri mị ḅie saraḅịa, opuama mị pịkị kankoroḅịa.)

²⁰Tomoniḅọ goyegoye ḅieḅẹlẹḅịa; ozuma ḅie, fịayema ḅakama mengi nyanaḅịa pịkị yepụra asụn ma na ananama na ike-nambuloma na, nambuloma na pịkị ikpoki-nambuloma na nyọ goyegoye ḅụ àrị fịḅịa iḅi osuein nyanaḅịa.