Read kirikeni Aịzaya 33 Bible Online

Aịzaya 33 - kirikeni bible

Aịzaya 33

¹Mine na tarakapụma ini fasam! Ini furu pịkị ịba fịsam, gbọrịḅọ sọ ma ini furu anịkanịka ini se ịba fịkẹ nwọḅẹ sọnị. Ọkụma inia furu mị na ịba fị mị na kulumaḅịa, inina-mịnaḅụ-na ini ḅo jịn apụ ini furuḅịa ḅụfụka ḅie sọḅịa.

²Nyanaḅọ wa ḍikitịḅịfoin. Wa mịna kuḅie ma se ị́ ḅụgbanasam. Eneḅeneḅene wa ḅọị, pịkị ḅụfụka sịkị ḅụ wa ḍụa.

³Ị́ owusọ wa pịrịsịkị, sẹma owu mị ḅe nyọ fiema mị ḅụ mangị somẹ.

⁴Wa owu se iniaye ma paka se àrị ọfọịn somẹ.

⁵Nyanaḅọ Ḅe opusọ la-ọkụ ḍiki! Ọ̀ ḅẹrẹtọn yegoyegoye pịrịmẹ. Karakaraye na iḅiyemịẹmịẹḅara na ọ̀ nwọse Jerusalẹm ḅie ḅeinmaḅịa,

⁶ọ̀ pịkị mịẹse sẹma dein nyanamẹ. Sịkịmamgba ori oria tomonima ḍụaḍụamẹ, ọ̀ pịkị nemi na yekaịnḅo na se ini pịrịpịrịmẹ. Ini nyanatẹịn ngọ anị ini nyana Nyanaḅọ Ḅe pịrị osi mị-ẹ.

⁷Kụrọkuḅie nyanapụ ḅarachụa ḅi aḅẹ. Jịn sẹ ḅie sime sẹkẹnị kiri opuapụ, kụrọma owuaḅẹ deinma gose.

⁸Opu ateli ma àrị ḅalafama so ọkụma gbọrịḅọ sọ arịa ḅie nwẹngị ḅọrọkẹ. Ḅịpịogbosọ gose sẹma gịẹịn ḍiri ma fieaye ma ini kanmẹ, ini pịkị àrị kokokẹ. Gbọrịḅọ sọ ngịsị ḅarị osi nyanakẹ.

⁹Ama mị gbọnma simemẹ, ini pịkị anị koroma somẹ. Lẹbanọn piri ma samịna fịsam, Sharọn mị nyana fịaye pakụma pẹsịkiri mị onwun ele kịkẹmẹ. Bashan ḅie, Kamẹl Tụndụ mị ọgọnọ sime ejema tịḅị ịnyanya ma sokoro saraḅẹ.

¹⁰Nyanaḅọ Ḅe nwọse sẹma ḅẹmẹ, “Mịọkụ à yemịẹḅịa. À kụrọ la-ọkụ à nwọ ḍiepakụmaḅịa.

¹¹Yeḅụsọka aye ọ́ nwọ tọnmẹ, ọ́ tọnye goyegoye pịkị tịḅịnyanakaye-ẹ. Ị̀ ḅịpị ḅie ọwụ[1] mị ómine ḅaasinḅịa fịnị kịkẹmẹ.

¹²Ini seni sịmẹtị tẹmẹḅịa ẹrẹchị ini dọkịma ḍụparị kọsị-dẹkịdẹkị ọkụ anị ọ́ kọsị-dẹkịdẹkịḅịa ọkụ-ẹ, ịga dọkịma se àrị ḅo fọn sọ ọkụ.

¹³Ye sasaju na kpeki nyọ ḅụ na sime ḅọ goyegoye à mịẹsaye mị naa se ị̀ya kụrọ mị nemi.”

¹⁴Zaịyọn ḅie simịẹapụma, ḅalafa ḅụ inia ḅụgeregereaḅẹ. Ini nwọ ḅẹmẹ, “Tamụnọ Ḅe oria ḅẹrẹkọn mị, kọrị gbaso fịnị kịkẹmẹ. Mịna ḅie tụḅọ ineda ọkọsime fịnị ḅie ḍumo ḅe?”

¹⁵Ị́ ineda ḍumoḅịa ị́ nemikase karakara ọkwẹịn kọn, pịkị anị mịẹmẹ ḅẹḅẹ. Ị́ya kụrọ mị se igwein apụma inumama, pịkị ọḅụfị ma. Nini kọn ḅẹrẹḅiarịapụ ma ḅie sọma, anịkanịka jịn siaye mịẹapụ ḅie sọnị.

¹⁶Anịsịkị ị́ ḍụaḅọrọma nyanaḅịa; owuni kụrọma tọrụseḍikiḍikiarị kụrọ warị ḅie ị́ omi-ẹ nwọḅẹ ḅara ọkụ ị́ nwọ kịkẹḅịa. Ị́ fịaye nyana fịḅịa, ị́ pịkị mengi nyana ḅuḅịa.

¹⁷Mịn finjima koro ama mị ḅie, ọ́ pịkị gbọrị sịkị se ḍukoḍukoye ḅụ ofori gbọrị iḅi amanyanaḅọ ọrịḅịa.

¹⁸Ọ́mịna ḅara ama igbiki ocho-cho jịn sẹ apụma na pịkị ama ẹnyẹ-ẹnyẹ apụma mịẹmịẹaye mamgba àrị ḅieḅaramaye sọḅịa.

¹⁹Ọ́ ḅarị ọ́ kaịnḅoka ọkwẹịn kọn àrị ḅụ-se-ye-chịn opuaye mịẹmịẹ jịn sẹḅọ ọrị ẹkẹ.

²⁰Wa mịna Tamụnọ Ḅe alalị fịfị opuama Zaịyọn mị ḍiki. Jerusalẹm mị ḍiki! Ḅalafamaye oforika ḅaraḅụ anịa ḅie deinma anga mị simeḅịa ọkụ ḍiki! Ini pike koroma jikejikeka akpụrụ warị sime ọkụ anị nwọ simeḅịa, anị ini se anị pike chịnma wọrọ ḅịa ọkụ ofori-ẹ pịkị anịa ḍiki ma sọ pẹlẹḅịa ọkụ oforikaye ma.

²¹Nyanaḅọ Ḅe ori oria boma mị se wa ḍieḅịa. Opu mengi ma na ideri mengi ma na aka ḅụ wa angaḅịa, ọkụma mine-na-tarakapụ onwoin arụ àrị ọgọnọ dọkụ ẹkẹ.

²²Nyanaḅọ Ḅe-na-mịnaḅụ na mịna amanyanaḅọ sọḅịa; ọ̀ ḅẹrẹtọn wa pịrịḅịa ọ̀ pịkị tịḅị kikima nyọ sọ wa pịrịḅịa.

²³Àrị onwoin arụ ma ọgọnọ sime sịkaka mamgba papaye-ẹ; ịvala ma sọ ineda finji ẹkẹ! Mine-na-taraka owunima ngọ mamgba wa ọfọịnḅịa, àrị ḅakaso ọkụma ikeliapụ sọ ḍiekiri nyanaḅịa.

²⁴Mịna ama ḅie anga se obi ḅẹrẹ ḍukoḅịaḅọ ḅarị sime ẹkẹ, ini pịkị si goyegoye ḅụ ḅarasinḅịa.