Read kirikeni Aịzaya 34 Bible Online

Aịzaya 34 - kirikeni bible

Aịzaya 34

¹Ó ḅo, ómine sẹsẹ ma ḅie-a tomoni mamgba! Ó kpokponima se poki. Bebe sẹkiri mị na, anịa ḅie simeḅọ goyegoye na mịanga ḅo se poki.

²Nyanaḅọ Ḅe ori ịganị nyana sẹsẹ ma na arịa owunima na pịrịmẹ. Ori ini ḅaaḅịa nwọḅẹ ḅẹrẹ ḅarasi pẹlẹ ini pịrịsam.

³Inia fị ojuma ini ḍipi ẹkẹ, ọkụma anịanga mị àrị sime ḅụrụ pịkị fụrụ simeḅịaye-ẹ; tụndụma ḅụ tomoni pulo ḅeinḅịa.

⁴Ịrụa na akalụ na pịkị lolia ma na àrị kọsị ḅo fọn sọḅịa. So mị nweni iko-sin-ḍiri pamba sime ọkụ simeḅịa, nweni ḅarị anị ọrị ẹkẹ, anịsịkị lolia ma irumịẹ ozuma na figi chịnma, tịḅị ịnyanya ma sokoro sara ọkụ anị àrị saraḅịa ọkụ-ẹ.

⁵Nyanaḅọ Ḅe oria okola-agiji mị ọ̀ nwọ karakaramasam soḅie, mịọkụ Idọm mị anị nwọ gbogboḅịa, ini anị ọ̀ fị-ḅẹrẹ-ḅarasi pẹlẹ pịrị apụ ma-ẹ.

⁶Inia ḅụ pulo na, ḅẹlẹkị na oria okola-agiji mị gbẹịnḅịa ḅara, anị ini ḅaa se agbamịẹ anana awọ na oḅori awọ ḅụ pulo na ḅẹlẹkị na sime ọkụ simemẹ. Nyanaḅọ Ḅe Bozra opuama mị ḅie mị ori oria agba mị mịẹḅịaye-ẹ; mịn mị mịẹḅụ Idọm ama ḅie ḅaka apụ fịḅịa.

⁷Tomonima piri nambulo na ayamburama nambulo awọ na sara fị ọkụ anị ini sara fịḅịa ọkụ-ẹ, kiri mị mgba pulo na ḅẹlẹkị na anị gbẹịnmẹ.

⁸Mịn sịkịḅụ anị Nyanaḅọ Ḅe Zaịyọn mị ḍụa pịkị anị na-tarakapụ ma ḅara so owu ḅiḅịaye-ẹ.

⁹Idọm ideri mengi ma àrị ḅo kurukuru agba sọḅịa, anịsịkị kiri mị ḅo kọrịkọrị akanwụ sọḅịa. Bebe sẹ mị mgba kurukuru agba kọrị ọkụ kọrịḅịa.

¹⁰Enekaka na ḍin na ḅụ anị kọrịḅịa, onwoin pịkị anịa ḅie iwo gbasoḅịa. Ḅụọ ọkịmun ḅụọ la, amakiri mị ḅarị sọye mịẹka ḅaraḅụ papa sara simeḅịa, gbọrịḅọ sọ ḅarị pịkị anịa ḅie nwẹngị ma ḅọrọ ẹkẹ.

¹¹Ikpikikpiki ma na ḍụẹịn ama ọḅọkọ ma na mị ama mị ọkị nyanaḅịaye-ẹ, Nyanaḅọ Ḅe ọ̀ pịkị anị mịẹḅịa anịḅo papa-sara-sime, sọye-mịẹka kiri sọḅịa anị ma ini anị tẹmẹka sịkị anị sime ọkụ mị.

¹²Ḅẹrẹtọn sẹ mị pịrịḅịa gbọrị amanyanaḅọ sọnị ḅarị oforiḅịa, tịḅịnị mamgba ini soḅịa.

¹³Amanyanapụ odo mamgba, ịga na ichuka-ichuka osuein na sẹnị anị na, ini onu mịẹ kelema ama mamgba gbẹịnḅịa, se piri nama na ikpikikpiki na arịa ḅie angaḅịa.

¹⁴Piri ḅie-a nama anịnyọ nwẹngịma ḅọrọḅịa, si-a tẹmẹ pịkị jịnye jịnye chịnḅịa. Ḍin ḅie nwẹngị-nwẹngị si-a nama ḅo anịanga ịnyọ sara nyọ ḍọkịḅịa.

¹⁵Ikpikikpiki ma arịa warịma namaḅịa, àrị anyị koroma pịkị anyị ma kẹngẹḅịa, se anịnyọ ḅụ arịa awọma koko pakụmaḅịa. Ẹdẹlẹ ma, gbọrịye gbọrịye mun anịanga koḅirimaḅịa.

¹⁶Nyanaḅọ Ḅe tẹmẹ, ḍumo ayema ḍiri mị ḅie ḍiki se anị fiearịye go. Ma ini tẹmẹ ayema ḅụ gbọrịye sọnị fa ẹkẹ. Àrịa ḅie owoi na ịrọrọ na nyanakaye ofori-ẹ. Nyanaḅọ Ḅe ọ̀ tọnsam na anị ọkọsime-ẹ; ori-na-mịnaḅụ na àrị ọkịḅo gbolomaḅịa.

¹⁷Nyanaḅọ Ḅe, amakiri mị ḍie àrị pịrịḅịa, se àrịa ḅie gbọrịye gbọrịye ḍiekiri nyanaḅịa. Ḅụọ ọkịmun jịn ḅụọ la, àrị anị ama mị ḅie angaḅịa anị pịkị sime àrị pịrị gbasoḅịa.