Read kirikeni Aịzaya 37 Bible Online

Aịzaya 37 - kirikeni bible

Aịzaya 37

¹Amanyanaḅọ Hẹzekaya ḅe inia ḅẹrẹ mị naa kirikiri, opu kururuḅụ, ori oria ḅụchụayema kan se okuru ḅiriaye ḅirimẹ, se ò so Nyanaḅọ Ḅe Oputẹkẹwarị mun mẹ.

²Ẹlaịakịm amanyanaḅọ odo ḍikiḍiki apụma ḅe tịḅịnịḅọ ḅe na Shẹbna ḅẹrẹkọn warị ḅie ḍiri gịẹịnḅọ ḅe na pịkị Emọs ya ịkịankoro Aịzaya ḅe oria tịḅịnị agbamịẹḅọ ḅe na fịrịma ḅomẹ; inimgba ini okuru ḅiriaye ḅiri waraḅẹ.

³Mịn anị ò ḍuko ini pịrị na ini ḍuko Aịzaya ḅe pịrị-ẹ nwọḅẹ oku mị-ẹ; “Mịmgba, tọrụsiọrị ene-ẹ; wa ḅụfụka da pịkị ḅụgerere ḅie omi-ẹ. Tọkụ yi ḅịa ẹrẹchị ḅụkarakaramarị eremeniḅọ sime ọkụ wa nwọ simemẹ, ọkụma ịnyọ á ḅụ faye gose árị inekẹ.

⁴Asiria sẹdaḅọ ḅe oria ọmụkụlọdaḅọ ḅe fịrịmaḅo ḍumo Tamụnọ Ḅe wọlọmẹ. Ye Nyanaḅọ Tamụnọ Ḅe ma wọlọ ọkwẹịn ma naa se ḅụfụka se àrị kọn apụma pịrị. Anịẹrẹchị Tamụnọ Ḅe tẹkẹ mịna tomonima ḅie fịkọnmapụ ma pịrị.”

⁵Aịzaya ḅe, amanyana Hẹzekaya ḅe se ọ̀ fịrịma oku mị ḅo ọ̀ ḅara lasịkị,

⁶ọ̀ mịn pẹkẹrẹ ḅịpị mị se ọ̀ sẹịnmamẹ, “Nyanaḅọ Ḅe ḍuko ị́ pịrịaḅẹ, Asiriapụ ma ḍuko na ori ineda ọ́ ḍụakẹ nwọḅẹye mị, ị́ ḅalafamama.

⁷Nyanaḅọ Ḅe ọ̀ mịẹḅịa Asiria sẹdaḅọ ḅe ori iriaḅa naaḅịa se ọ̀ pịkịmaso oria sẹ munḅịa, anịanga ḅụ Nyanaḅọ Ḅe pịkị mịẹḅịa ini ọ̀ ḅaaḅịa.”

⁸Asiria ọmụkụlọdaḅọ ḅe ọ̀ naamẹ na sẹdaḅọ ḅe, ò Lekish ḅụ so mun kpeki nyọḅụ sime Libna opuama mị na owu sọaḅẹ; anịẹrẹchị ori anịju mun ori na ḅịpị ogbosọ-ẹmunmẹ.

⁹Ọkwẹịn mun Asiriapụ ma lamẹ na Sudan amanyanaḅọ Tahaka ḅe, Ijipt owunima kụlọ da se ḅo owu se ini paka-ẹḅoaḅẹ. Sẹdaḅọ ḅe mịn mị naa sịkị, ò ḍiri pẹkẹrẹ se Juda amanyanaḅọ Hẹzekaya ḅe fịrịmamẹ.

¹⁰Ḍuko ọ̀ pịrịaḅẹ; “Ị́ kuḅie ị́ nwọse ḅụgbanarị oru ḅe ḍuko ị́ pịrịmẹ na ị́ ḅịkị ị̀ ḅaraḅie sọẹka-ẹ, ye anị mị ị́ dairimama.

¹¹Asiria sẹdaḅọ se ọ̀ kanḅịa sẹ mịẹmịẹye ị́ naasam. Ị́ chịn ḅara ị́rị́ ị́ pọkọsoḅe?

¹²Ị̀ya olomu-aḍapụma, Gozan na, Heran na, Rizẹf na kan pịkị Tẹlasa ḅie anga Bẹt-Idẹn apụma ḅaa sịkị, inia oru ma ḅụ gbọrị oru sọ ineda ini ḍụakẹ.

¹³Mịna opuamama, Hamat na, Apad na, Sẹfaveim na, Hẹna na pịkị Iva na ḅe amanyanapụma nde anga ini omi?”

¹⁴Amanyanaḅọ Hẹzekaya ḅe, oku mun apụma ḅara ḍiri pẹkẹrẹ mị ọkị se anị gomẹ. Anịsịkị ò so Oputẹkẹwarị mun, ḍiri pẹkẹrẹ mị se Nyanaḅọ Ḅe tọrọkọ koromamẹ,

¹⁵se ọ̀ tẹkẹmẹ,

¹⁶“Kụrọmamgba Nyana Izrẹl Tamụnọ, ị́rị́ anị enjẹlapụma ọgọnọju angaḅọ, ị́rị́ ngẹrị anị Tamụnọ-ẹ, ḅẹrẹtọn sẹsẹ mamgba pịrịarịḅọ ḅe-ẹ. Ị́rị́ so na sẹkiri na tẹmẹmẹ.

¹⁷Mịọkụ, Nyanaḅọ, wa naa se mịnaḅụ pakarịye mị ḍiki. Sẹnakirib ḅe se ị́rị́ ḍumo Tamụnọ Ḅe wọlọarịye mị poki.

¹⁸Mine mgba wa nemimẹ, Nyanaḅọ, Asiria sẹdaḅọ ḅe tọntọn-a sẹ ọ̀ nwọ kan pịkị inia amakiri ma se papa sara mịẹmẹ.

¹⁹Inia oru mamgba ọ̀ dọkịmamẹ-anị ngịsị oru sọka ayema, tomoni chịn ikiḅa na ḍụparị na ọkị se ngẹrị ḅara se tẹmẹ oru ma.

²⁰Mịọkụ, Nyanaḅọ, mịna Tamụnọ, Asiriapụ ma ḅara ḅie wa ḍụapakụma, mịẹsosịkị sẹkiri ḅie sẹsẹ mamgba nemiḅịa na ị́rị́ kẹngẹ anị Tamụnọ-ẹ.”

²¹Aịzaya ḅe oku se Amanyanaḅọ Hẹzekaya ḅe tẹkẹ mị pẹkẹrẹ ḅụ ḍuko ọ̀ pịrịaḅẹ na

²²Nyanaḅọ Ḅe ò ḍukosam, “Jerusalẹm opuama mị anị ị́ ḍẹrịaḅẹ Sẹnakirib, pịkị ị́ se kpọtimẹ.

²³Ị́ koroma ḅara tụḅọ ị́ nwọ wọlọ, pịkị se ḍẹrịye-mịẹ-ti-ao? Ị́ osikẹ, fịafịa Izrẹl Tamụnọ Ḅe.

²⁴Ị́ya fịrịnwẹngịapụma ị́ nwọ fịrịma se ḅo ḅụboma ị̀ pịrịmẹ na ị́ya owuni kporokporoma ị́ nwọse Lẹbanọn gololotẹịn-a tụndụma inumasam. Anị nyọ ḅụ ị́ ḅụbomamẹ na geletẹịn awụ chịnma na iḅitẹịn Saịprẹs ejema na ị́ pẹlẹ gbinmẹ, pịkị piri mị ḅie ị́ mun gbuntẹịn-a nyọma lamẹ.

²⁵Ị́ ḅụbomamẹ na, ị́ jịn sẹ amakiri ḅie olulu soku se anịa ḅie mengi ḅumẹ, na ị́ya owunima ḅụọma Naịl Tọrụ mị nanga samịnamamẹ.

²⁶“Ma ị́ naaka na ḅọlọsa sịkị ma ḅie ị̀rị̀ maye mamgba tọnmẹ? À pịkị anị mịẹpakụmasam mịọkụ. À kụrọ se ị́ pịrịmẹ ị́ se kụrọ amama mịẹ se àrị ḅo pumburo sọmẹ.

²⁷Anịanga anga apụma ini ịnyọ nyanakẹ; inia ḅalafa so ọkụma ini ḅarị koroma nyanakẹ. Ịrụapakapaka nyọ ḅo ọfịrị fọrụ ozu ḅie ofurosin osuein anịkanịka warịochu-ọgọnọ pakarị ịnyanya sime ọkụ anị ini sime ọkụ-ẹ.

²⁸“Ọkụma ị́rị́ na gbolomaye goyegoye à nemimẹ, ị́ mịẹarịye na ị́ mun-arị anga na. Ị́ya nọmụ ịganị mị ị́ nwọse ị̀ dapaka la-ọkụ à nemimẹ.

²⁹Anị, ị́ya nọmụ ịganị mị na ị́ya ḅụdekichịẹma mịẹmịẹaye ma na ḅe ḅẹrẹ ḅo ị̀ ḅeri lasam, mịọkụ à pịkị inji-kun-arị se ị́ nini ḅie tolumaḅịa, pịkị asụn ḅịpị kpọye se ị́ ḅịpị kpọḅịa, à pịkị ị́ mịẹḅịa ị́ sime se ḅo ateli ḅụ ị́ vinpịkịḅịa.”

³⁰Aịzaya ḅe nwọse Amanyanaḅọ Hẹzekaya ḅe ḅẹmẹ, “Mịn mịẹḅịaye mị ḅe elekima-ẹ. Mịn kụra na jịn kụra na, ó ḍipika se ngẹrị paka fịaye kẹngẹ anị ọ́ fịḅịaye-ẹ, tẹrẹ karama kụra mị ḅie ómine ineda fịaye ḍipi pịkị sokuḅịa, ọ́ pịkị irumịẹ ozu ḍipiḅịa se pịkị tụmgbakị elelenda fịḅịa.

³¹Juda ḅie fị mị ḅaa kọnmapụ ma, ye ini na lọkọlọkọḅịa ḅara anị kuno iḅiọkụma kiri ḅie sọ mun gbun chịn chịnmgbọlụ chụa ọkụ anị ini simeḅịa ọkụ-ẹ.

³²Jerusalẹm ḅie na Zaịyọn Tụndụ mị ọgọnọ na, fị mị ḅaa kọnmapụ simeḅịa, anịatịḅị Kụrọmamgba Nyanaḅọ Ḅe ọ̀ tọn pẹlẹsam na mịn mị mịẹḅịa.

³³“Asiria sẹdaḅọ ḅe na gbolomaye ḅụ mị Nyanaḅọ Ḅe ḍukoye-ẹ: ‘Mịn opuama ḅie ngịsị ọ̀ sọ ẹkẹ, ọ̀ pịkị gbọrị ḍẹịn sọ tẹịn anị da-ẹkẹ. Agbọ ọlọ owuni, opuama mị kpekima ḅoẹkẹ, ini pịkị tanjị anị kanḅịa aḅaịn nama anị kelema ẹkẹ.

³⁴Ọ̀ ḅọrọḅo ḅịa ateli ḅụ anị ọ̀ pịkị ḅọrọsoḅịaye-ẹ, ọ̀ mị opuama mị ḅie sọka ḅaraḅụ. Ị̀rị̀, Nyanaḅọ Ḅe à ḍukosam.

³⁵Àrị owusọ mị opuama mị pịrị pịkị agbọ sọ anị pịrịḅịa, ị̀ya osi mị na à ḅereni ị̀ya fịrịnwẹngịḅọ Devid ḅe pịrịsaye mị gose.’”

³⁶Nyanaḅọ Ḅe enjẹlḅọ Asiria owunima pike sime nyọ mun se inia ḅie owuni ḅụ sitẹrẹ-a poku fịnjị na owuni-a mẹndẹ oyiasi fịnjị na ḅaamẹ. Jịn ene ḅaaḅịa sịkị anịnyọ ini sarawaraḅẹ, inimgba ini fịsam!

³⁷Se Asiria sẹdaḅọ, Sẹnakirib ḅe ọḅụgbinma se so Ninivẹ mun mẹ.

³⁸Gbọrị ene ḅụ ori oria oru, Nisrọk Oputẹkẹwarị ḅie tẹkẹarịogbo, oria owuapụ awọma ḅie mamapụ, Adramilẹk ḅe na Sharẹza ḅe na inia okola-agijima se ọ̀ ḅaa se mangị so Ararat ama mị mun mẹ. Oria owuapụ awọma ḅie jụmḅọ, Isahadọn ḅe sẹdaḅọ ḅaraḅụ oria kiri ḍinmamẹ.