Read kirikeni Aịzaya 39 Bible Online

Aịzaya 39 - kirikeni bible

Aịzaya 39

¹Pa mị gbọrị sịkị mị ḅụ Babilọn Amanyanaḅọ, Mirodak Baladan, Baladan yaḅe naamẹ na Amanyanaḅọ Hẹzekaya ḅe ori obi se, ọḅụ iḅisam, anịẹrẹchị ò ḍiri pẹkẹrẹ se ọ̀ sẹịnmamẹ pịkị ḍiepịrịaye na.

²Hẹzekaya ḅe oku ḅoapụ ma dawarịchumẹ, se ọ̀ pẹrẹ la-ọkụ nwọse ini ḍiemẹ—oria seleḅa ma na goli ma na, ye kụnụmaye na kụnụ olo na pịkị oria owuniaye mamgba na. Oria ngọ koko warịma na pịkị oria amanyanakiri mị la nyọ goyegoye ḅụ ò se ini ḍie kọmaye ofori-ẹ.

³Anị Ịkịankoro Aịzaya ḅe Amanyanaḅọ Hẹzekaya ḅe damamun se ò gbelaye-ẹ, “Mịna owuapụma nde anga ḅụ ini ḅo, se cheye ini nwọ ḍuko ị́ pịrị?” Hẹzekaya ḅe pẹkẹrẹmẹ, “Ḅọlọ sẹ ḅie ini ḅomẹ, Babilọn ḅie.”

⁴“Amanyanaḅọ odo ḅie cheye ini nwọ ọrị?” “Ye goyegoye ini ọrịmẹ. Ngọ-koko-warị ma ḅie à se ini ḍiekaye ofori-ẹ.”

⁵Anị Aịzaya ḅe ḍuko amanyanaḅọ ḅe pịrịye-ẹ, “Kụrọmamgba Nyanaḅọ Ḅe nwọ ḅẹmẹ

⁶sịkị ḅoaḅẹ, ị́ya odo ḅie, anị amanyanaḅọ odo mị, ị́ya ḅieju-aḍapụ anị enema ḅie ngịsị kokoḅo mịmgba ene la ngọ mamgba ini àrị dekiso Babilọn munḅịa. Gbọrịye sọnị kọn ẹkẹ.

⁷Dada ị́ furoḅie pakaḅoḅịa apụma ḅie dapụ ini nwọ dekisoḅịa, ini ini po se ini se Babilọn amanyanaḅọ odo ḅie fịrịnwẹngịapụ mịẹḅịa.”

⁸Amanyanaḅọ Hẹzekaya ḅe mịn mị kaịnḅo ḅara anị, oria ḍumo sịkị ḅụ dein simeḅịa, gbọrịye sọ paka ẹkẹ, anị ọ̀ pẹkẹrẹye-ẹ, “Nyanaḅọ Ḅe ḅaraḅo ị́ se ị̀ pịrị oku mị iḅimẹ.”