Read kirikeni Aịzaya 4 Bible Online

Aịzaya 4 - kirikeni bible

Aịzaya 4

¹Anịsịkị mị ḅolaḅịa sịkị, sọnọma eremeni gịsapụma gbọrị owuḅọ ọlọ se nwọ seni ọ̀ ḅẹḅịa, “Wa ineda fịaye nyana mịnaḅụ ḍikiḍikiḅịa, wa pịkịna chụachụaye na ḅịtẹ na nyanamẹ, ọkụma pasisi ye wa ḅẹ na ị́rị́ mịna de-ẹ, mịẹsosịkị owuḅọ simeka ḅụgerere mị wa ineda nwọ inemaḅịa ọkụ.”

²Sịkị ḅoaḅẹ, Nyanaḅọ Ḅe, ọ̀ mịẹḅịa chịn na eje na goyegoye mamgba ama mị ḅie sẹnị, ḍụḅa pịkịna iḅi ḍikitọrụgbẹịnḅịa. Izrẹl ḅie fịka apụ mamgba, ama mị pakụma ḅoarị fịayema ḍiki ḅieḅẹlẹ pịkịna àrị seni opuaye mịẹḅịa.

³Jerusalẹm ḅie Tamụnọ Ḅe sẹlẹọkị se fịkaḅọ goyegoye ini fịafịaḅọ nwọse nụḅọ chịnḅịa.

⁴Oria kụrọḅụ Nyanaḅọ Ḅe ọ̀ ḅẹrẹkọn se pịkịna sẹ mị mịẹfịafịamaḅịa, ọ̀ pịkịna Jerusalẹm mị mịẹasi ma na anịangaḅụ ini ọsụn tomoni pulo ma na sịkịrị sinḅịa.

⁵Anịsịkị Zaịyọn Tụndụ mị ọgọnọ ḅụ pịkịna anịangaḅụ koḅirima simeḅọ ọgọnọḅụ goyegoye na, Nyanaḅọ Ḅe enekaka ḅụ, ò soḅuno seni ini sẹịnmaḅịa, ọ̀ pịkịna onwoin na kọrịarị fịnị ḅẹlẹ na ḍinḅụ nwọ seni ini sẹịnmaḅịa. Tamụnọ Ḅe oria boma mị opuama mị gbẹịn kelema pịkị agbọ sọ anị pịrịḅịa.

⁶Oria boma mị ịrụa mị opuma ọfịrị sịkịḅụ tịḅịkikimaye sọ opuama mị pịrịḅịa, gbọrịye sọnị yeseni ini lama ẹka ḅaraḅụ, ene na irisi na ḅie anị ini gbẹịnḅịa.