Read kirikeni Aịzaya 42 Bible Online

Aịzaya 42 - kirikeni bible

Aịzaya 42

¹Nyanaḅọ Ḅe nwọ ḅẹmẹ, “Ḅe ị̀ya fịrịnwẹngịḅọ ḅe-ẹ, ori anị à mịẹkụrọmasa ḅọ ḅe-ẹ— à sẹlẹ ọkịsaḅọ ḅe oria mịẹmịẹye ị̀ ḅieḅẹlẹmamẹ. Àrị ị̀ya kụrọ mị se ò ḅie ḅeinmasam, ọ̀ pịkị karakara ḅẹrẹkọn ḅara mị se ḅo sẹ goyegoye pịrịḅịa.

²Ori oloku ẹkẹ anịkanịka kụrọ pụkọ se ọkwẹịn ẹkẹ ateli ma ḅie sọ ori oloku ọkwẹịn ẹkẹ.

³Mengi aka ḅụ paka osuein kalaye ma sọ ori anyịma ẹkẹ ọ̀ pịkị bin àrị tọnjie binma karama ẹkẹ. Ḅọlọ sịkị laḅịa karakara ḅẹrẹkọn ḅara ọ̀ nwọse nweni mamgba ḅie chuḅịa.

⁴Ọ̀ ḅụ ịnyọ fa ẹkẹ, ò kuḅie pịkị lọkọ ẹkẹ; ọ̀ mịẹḅịa karakara ḅẹrẹkọn ḅara sẹkiri ḅie ḅụọ nyana chịẹḅịa. Ḅọlọju amama oria yetelima ḅara mị koru aḅẹ ḅie chịẹ-chịẹ-chịẹ ḅụ.”

⁵Tamụnọ Ḅe so ma tẹmẹ se àrị finjima galagalamamẹ; ọ̀ sẹkiri mị tẹmẹmẹ pịkị anịa ḅie sime ḍumo aye mamgba na; ḍumo na ḍumo pịrị ọwụ na ọ̀ nwọse anịa ḅie sime tomoni mamgba pịrịmẹ. Se mịọkụ Nyanaḅọ Tamụnọ Ḅe nwọse oria fịrịnwẹngịḅọ ḅe ḅẹmẹ,

⁶“Ị̀rị̀, Nyanaḅọ Ḅe, ị́ chịn pịkị kụrọ se ị́ pịrịsam ị́ ḍọkịḅo ọrịḅịa na karakara ḅẹrẹkọn sẹkiri ḅie simemẹ. Ị́ ḅụ ḅụ à ḅọrọ sẹkiri ḅie tomoni mamgba na ọḅọkụ fịḅịa; ị́ ḅụ ḅụ à ḅọrọ enekuḅu se sẹma pịrịḅịa.

⁷Tọrụmgbọlụ pụn apụma tọrụmgbọlụma ị́ finjiḅịa se ị́ pịkị kanakana ikoli warịma ḅie sime apụma pakụmaḅoḅịa.

⁸“Ị̀rị̀ ngẹrị anị ị́ Nyana Tamụnọ Ḅe-ẹ. Ị̀rị̀ na ị̀ya boma mị ḍiaḅịa jịn oru ofori-ẹ; à ḅereni ẹkẹ ini ḅara se kara tẹkẹ àrị ye ḅo ị̀rị̀ na sime ị̀ pịrị boma mị ḍia.

⁹À ḍuko na tọrọkọju mịẹḅịa nwọḅẹ ayema ḅo karakaraye sọsam. Mịọkụ à pịkị ịwọ aye ḍuko ị́ pịrịḅịa ma àrị pakaka simeogbo.”

¹⁰Ịwọ nime chu se Nyanaḅọ Ḅe pịrị; tomonikiri mị mgba nime chu ò boma! Ò boma, ómine tọrụ dọkụarịapụ ma; mengi ḅie ọ̀ tẹmẹ aye mamgba ò boma! Ḅọlọju sime amama na arịa ḅie angaye mamgba nime chu!

¹¹Ye onwun ele na anịa ḅie sime amama na Tamụnọ Ḅe boma; ye Kida ḅie sime tomonima ò boma! Ye Sila opuama mị ḅie anga tomonima tụndụma ọgọnọju ḅụ wẹrị ḅieḅẹlẹ ḅụ oloku ò boma!

¹²Ye sasaju amama ḅie anga apụma tokoni na boma na se Nyanaḅọ Ḅe pịrị!

¹³Nyanaḅọ Ḅe ọ̀ paka mun owuniḅọ ḅara se owusọ mẹ; ọ̀ ḅụkarakaramamẹ ọ̀ ḅụ pịkị chịẹtarịkẹ owusọḅịaye gose. Ori owuni oloku kọn, pịkị paịnmẹ; ori na tarakapụma ḅụ ori oria kụrọ mị ḍiepakụmamẹ.

¹⁴Tamụnọ Ḅe nwọ ḅẹmẹ, “Ḅọlọ sịkị à nwọse yawụma simemẹ; ị̀ya tomonima àrị ini pẹkẹrẹkẹ. Ọkụma mịọkụ fịrịnwẹngịḅịa sịkị lasam; yi ḅụfụkamarị eremeniḅọ oloku ọkụ à nwọse oloku pakụmamẹ.

¹⁵À chịngịma na tụndụma na ḅaa kọsị ḅịa à pịkị mịẹḅịa osueinma na ejema na samịnaḅịa. Mengi ideriarị pẹsịkiri ma à àrị pịkị onwun ele mịẹḅịa se à mịẹḅịa ḍapa ma samịnaḅịa.

¹⁶“Ị̀ya tomoni tọrụmgbọlụ pụn apụma à tọrọkọda ini pịrị ini se ma ini ḅọrọka ateli ḅie ḅọrọḅịa. Inia kanakana mị à pịkị enekaka mịẹ ini pịrịḅịa à pịkị kpụlụkụ kpụlụkụ sẹma mịẹḅịa àrị mọnịmọnị se ini ọrịḅịa. Ma anị à ḅereniaye ma-ẹ, à pịkị àrị mịẹḅịa gbarịmaka ḅaraḅụ.

¹⁷Kuḅie se ḍumo nyanakaye ḅụ gbanapụ mamgba, lụgụ se inia oru mịẹarị apụma na, ini ini nanga iderimaḅịa se inia ḅụgerereḅịa.”

¹⁸Nyanaḅọ Ḅe nwọ ḅẹmẹ, “Ó poki, ómine inikiapụ! Ó kweinma iḅiọkụma ḍiki, ómine tọrụmgbọlụ pụn apụ!

¹⁹Tọrụmgbọlụ pụn ị̀ya fịrịnwẹngịḅọ ḅe nẹngịḅọ omi, iniki à se fịrịma oku nwẹngịḅọ ḅe nẹngịḅọ omi?

²⁰Izrẹl ọ́ ḅakama ye ọrịsam, ọkụma anị mị ọ́mịnaḅụ anị che fie? Ó ye naa ḅeri nyanamẹ, ọkụma jokoma ó che naa?”

²¹Nyanaḅọ Ḅe nweni ḍụapakụma gose ḅụ chịẹ-chịẹ-chịẹ Tamụnọ-ẹ, anịẹrẹchị oria olokoma na oria ḍieaye ma na ọ̀ nwọ deki gololomamẹ, ọ̀ pịkị ḅimẹ oria tomonima kụn se àrị pịrị.

²²Ọkụma mịọkụ oria tomonima ini kụrọḅara se iniaye ma ọfọịnsam; ini ini se kiri chuku kanakana ikoli warịma ḅie chu ịkasịmẹ ikoli warịma ḅie ini ini ḅọị se gbọtụma ini se ḅieḅaramamẹ. Ini ini furu pịkị iniaye ma ọfọịnmẹ, ḅo ḅarachụa ini pịrị gbọrịḅọ sọ ofori-ẹ.

²³Ọ́mịna ḅie mịn mị poki ḅịa ḅọ omi? Mịọkụ ọkịmun ó ḅeri gbẹlẹma poki ḅe?

²⁴Tụḅọ Izrẹl mị ḅụ ḅarasin ye ọfọịn apụma pịrị? Nyanaḅọ Ḅe na-mịnaḅụ-na-ẹ, anị wa mịẹirima àrịḅọ ḅe! Ọ̀ wa ḅẹ na wa sime-ẹ nwọḅẹ ḅara mị wa sime ḍụkụkẹ anịkanịka ò se wa telimaye ma sọ wa àrị ḍuko nwẹngịkẹ.

²⁵Anịgose ọ̀ mịẹmẹ oria ịganị mị ḅe ọfịrị ḅụọyị wa nwọ nemi pịkị ọmụ ḅie tọrụsiọrị nwọ ọrịmẹ. Oria ịganị mị Izrẹl ḅie mgba fịnị kọrị ọkụ kọrịmẹ, ọkụma mịẹarịye ngịsị wa nemikẹ; wa pịkị anịaḅụ ye ḍawọ ọkịkẹ.