Read kirikeni Aịzaya 44 Bible Online

Aịzaya 44 - kirikeni bible

Aịzaya 44

¹Nyanaḅọ Ḅe nwọ ḅẹmẹ, “Poki mịọkụ, ị̀ya fịrịnwẹngịḅọ, Izrẹl, à sẹlẹ ọkịsapụ, Jekọb furo ḅie pakaḅo apụ.

²Ị̀rị̀ anị Nyanaḅọ ómine tẹmẹḅọ ḅe-ẹ; ini ị́ yi sịkị ngịsị à sakị ḅarachụa ị́ pịrịmẹ. Ḅalafama; ị́rị́ ị̀ya fịrịnwẹngịḅọ-ẹ, à sẹlẹ ọkị se à ḅẹlẹmasapụ.

³“Mengi pụkọtarị amama à mengi se àrị pịrịḅịa à pịkị mịẹḅịa samịna kpoinkpoin kiri mị ọgọnọ mengi ideriḅịa. Àrị ị̀ya kụrọ mị se ọ́mịna awọma ḅụ sara ḅeinmaḅịa ị̀ya ḅẹlẹma pịkị ọ́mịna furo ḅie pakaḅoḅịa apụma ọgọnọ gbanaḅịa.

⁴Mengi la se opuma sẹnịarị osuein ḅara anị ye ini na lọkọlọkọḅịa ọkụ-ẹ, ideri mengi aka ḅụ pakarị chịn awọ sime ọkụ anị ini simeḅịa ọkụ-ẹ.

⁵“Tomonima ḅie, gbọrịḅọ gbọrịḅọ ḅẹḅịa, ‘ị̀rị̀ à sime Nyanaḅọ Ḅe pịrịmẹ.’ Ini ḅo Izrẹlapụma ḅụ sọḅịa. Se ḅọḅọ Nyanaḅọ Ḅe ẹrẹ mị se ọ̀ ḅara kọngọ ḅụ elekima chụaḅịa anịsịkị ọ́ nwọse ọ́ ḅụ chịnḅịa Tamụnọ-a tomonima ḅie gbọrịḅọ.”

⁶Nyanaḅọ, ḅẹrẹtọn Izrẹl mị pịrị pịkị anị ḍikiḍikiarịḅọ ḅe, Kụrọmamgba Nyanaḅọ Ḅe mịn mị ḍukomẹ; “Ị̀rị̀ anị sakị mị-ẹ, pịkị kuluma mị-ẹ, ngẹrị Tamụnọ Ḅe-ẹ; jịn tamụnọ ofori-ẹ ọkụma ị̀rị̀ ngẹrị-ẹ.

⁷Ineda à mịẹaye ma mịẹḅịa jịn gbọrịḅọ omi? Tụḅọ ineda tọrọkọju mịẹḅịaye nwọ ḍukoḅe sakị mị ḅụ ọkịmun kuluma sịkị mị la?

⁸Ọ́ ḅalafama, ị̀ya tomoni! Ḅọlọsa sịkị ngịsị ọkịḅo mịọkụ la ó nemimẹ na ị̀rị̀ anị pakaḅịaye mamgba ḍukoḍukoye-ẹ, ómine ma ị̀ya onyechịẹ apụ-ẹ. Jịn oru omi? Jịn sịkị ma à naaka jịn kụrọ oru omi?”

⁹Ḅarase karaye tẹkẹ àrị apụ mamgba yeḅụsọka apụ-ẹ, ini pịkị se opuma yechịn oruma ngịsị gbọrịye ḅụ sọ àrị ofori-ẹ. Ma oruma tẹkẹ apụma ini tọrụmgbọlụ pụn pịkị yenemikapụ-ẹ, ḅụgerere inimgba tọrụsọḅịa.

¹⁰Ikulele se lụgụ tẹmẹ se oru ḅara se anị tẹkẹ mị, nyana iḅi ofori-ẹ.

¹¹Anị tẹkẹḅọ goyegoye, ini nụḅọ da iderimaḅịa. Ḅarase karaye ma tẹmẹ apụma, oju mịnị chụa tomoni-ẹ, jịnye ofori-ẹ. Ye ini ḅo inia ḅịpị ḍuko inia ḅalafaḅịa, ḅụgerere pịkị inia tọrụ sọḅịa.

¹²Tẹmẹnịḅọ ḅe ori ikulele pẹkẹrẹ ọkị se fịnị ḅie fọị so sịkị, ori anị se ọ̀ nwẹngịḅịa fịrị mị nwẹngịmẹ. Ori oria kụrọkụrọ ḅarama se amana deki anị ḅakụ so se anịḅo ye na kịkịnamẹ. Ọ̀ fịrị mị nwẹngị àrị sịkị fịye na mengi na ọ̀ tarịmẹ, ịnyọ pịkị ọ̀ ḅụ fasam.

¹³Akanịḅọ ḅe ọ̀ chịn ọkị, se ye se anị tọnmẹ. Se ò toru se anịaḅụ ye kẹịn so sịkị ori oria akanị fịrịnwẹngịaye ma se anị kara anị ḅo ḍikitọrụgbẹịn mbuḅọ kịkẹmẹ se ori anị se oria warị ḅie koromamẹ.

¹⁴Ori ineda piriḅie awụ chịn anịkanịka kuru chịn anịkanịka saịprẹs chịn pẹlẹḅịa se fịrịnwẹngịḅịa ẹrẹchị. Anịkanịka, ọ̀ ḅara na gbọrị kụrọ chịn ḍipiḅịa, se ori ene mị koru se anịḅo anị mịẹ sẹnịmaḅịa.

¹⁵Tomoniḅọ ḅe ọ̀ chịn mị ḅụ pẹkẹrẹ ọkị se fịnị tọnọmẹ, ọ̀ pịkị pẹkẹrẹ ọkị se tẹkẹḅịaye karamẹ. Anịaḅụ pẹkẹrẹ ọ̀ nwọ ọkị fịnị tọnọ se ọ̀ ḅụ ọfịrịmamẹ, ọ̀ pịkị anị se fịturu fọịmẹ; ori ísí pẹkẹrẹ mị se oru mịẹse anị tẹkẹmẹ.

¹⁶Anịaḅụ da pẹkẹrẹ ọ̀ nwọse fịnị tọnọ nama fọị pẹịmẹ, pịkị ori na deinmẹ. Ori ọ̀ ḅụ ọfịrịma sosịkị ọ̀ nwọ ḅẹmẹ, “Anị opuma iḅiọkụ ḍiki, ị̀ ḅụ pịkị nwana-nwanasam! Fịnị, anị ḅẹlẹsa.”

¹⁷Chịn mị ḅụ kọn pẹkẹrẹ mị ò se ọ̀ tẹkẹḅịaye karamẹ; ọ̀ tịḅịtu anị pịrị se anị tẹkẹmẹ. Ori anị tẹkẹ se nwọ ḅẹmẹ, “Ị́rị́ ị̀ tamụnọ-ẹ—ị̀ ḍụa!”

¹⁸Ọkọsimeapụ ma, ini oḅoriapụ sọ so ọkụma ini mịẹarịye ini nemikẹ. Inia tọrụmgbọlụma na, inia kuḅie ma na ini gbẹịn karakaraye mị pịrịmẹ.

¹⁹Ọ̀ tẹkẹḅịaye kararịḅọ ḅe, ò koroma na tịḅịḅie ḅẹlẹkị na nyanakẹ, se nwọḅẹ na “Chịn ma ḅụ daye à tọnọmẹ. Anyịmgbọlụ ma à se fịturu fọịmẹ, à pịkị nama se arịa ọgọnọ ḅụ fọị pẹịmẹ. Anịsịkị chịn mị ḅụ kọn pẹkẹrẹ mị à se à tẹkẹḅịaye karamẹ. Mị ị̀rị̀-ẹ à tịḅịtu chịn ikiḅa mị pịrịaḅẹ!”

²⁰Ò koroma ḅara fọn mị taḅa mị opuma iḅiye ọkụ simemẹ. Oria yenemika mịẹaye ọ̀ dairima so ọkụma ḅarachụa ọ̀ pịrịḅịa eke mị ọ̀ ḅọrọsam. Ò ḅereni ọkị ẹkẹ na ọ̀ nwọ ọ̀ ḅaraḅie ọlọ se tẹkẹ àrị ye mị ngịsị tamụnọkẹ.

²¹Nyanaḅọ Ḅe nwọ ḅẹmẹ, “Izrẹl, mịn mị se ḅiekoroma; se ḅiekoroma na ị́rị́ ị̀ya fịrịnwẹngịḅọ-ẹ. Ị́ ị̀ya fịrịnwẹngịḅọ sọḅịa ẹrẹchị àrị ị́ tẹmẹmẹ, à pịkị ngịsị ị́ se ḅieḅarama ẹkẹ.

²²Ị́ya sima soḅuno ọfịn sin ọkụ àrị àrị ọfịn sinsam. Vinpịkị ị̀ damaḅo; ị̀rị̀ anị ị́ ḍụaḍụaḅọ ḅe-ẹ.”

²³Ḅieḅẹlẹ ḅụ oloku, ómine so ma! Sẹkiri ḅie gbun nyọma ómine oloku! Ḅieḅẹlẹ ḅụ ómine oloku, tụndụ, pịkị piriḅie sime eje goyegoye na! Nyanaḅọ Ḅe oria opu mị ọ̀ nwọ ḍiepakụmasam, anị oria tomoni Izrẹlapụma ḍụa mị ḅụ.

²⁴“Ị̀rị̀ anị Nyanaḅọ, ọ́mịna ḍụaḅọrọmaḅọ ḅe-ẹ; Ị̀rị̀ anị ómine tẹmẹḅọ ḅe-ẹ. Ị̀rị̀ anị Nyanaḅọ, yemamgba Tẹmẹḅọ ḅe-ẹ. Ị̀rị̀ ngẹrị ngẹrị so ma finjimamẹ; à sẹkiri mị tẹmẹ sịkị, gbọrịḅọ sọ ḅarachụa ị̀ pịrịkẹ.

²⁵À ḅịrịapụma se oḅoriapụ mịẹmẹ à pịkị lolia ḍikiapụ ma ḍukoḅịaye ma kikimẹ. Yenemiapụ ọkwẹịn ma à ḅẹmẹ iruo aye-ẹ à pịkị ḍiepakụmamẹ na inia nemi ma oḅori-a mịẹye-ẹ.

²⁶Ọkụma ị̀ya fịrịnwẹngịḅọ pakaḅịaye ḍuko sịkị, anị àrị okunwẹngịḅọ fịrịma à tọn ayema mịẹḅelemaḅịa sịkị ḅụ, à mịẹmẹ arịaye ma ḅo kọkọmaye sọmẹ. À ḍuko Jerusalẹm mị pịrịmẹ tomoni pịkị mun anịanga ḅụ angaḅịa-ẹ, Juda opuamama ini pịkị kpoto àrị namaḅịa. Àrị opuamama ini àrị kankoroma nyọ ḅụ ini àrị nama pakụmaḅịa.

²⁷Ọkwẹịn ḅụ à tọn abaji ma pịrịmẹ se àrị samịnamẹ.

²⁸À nwọse Saịrọs ḅe ḅẹmẹ, ‘Ị́rị́ anị nyọ mị ḍikiḍiki ị́ pịrịḅịaye-ẹ; à ḅiye anị ị́ mịẹḅịaye-ẹ; ị́ kụrọ pịrịḅịa na ini mun kpoto pịkị Jerusalẹm mị nama pịkị Oputẹkẹwarị mị ḅe chuku sẹkẹ ḍụparị mị sọ soku chụa.’”