Read kirikeni Aịzaya 48 Bible Online

Aịzaya 48 - kirikeni bible

Aịzaya 48

¹Ọ́ mịn mị poki Izrẹlapụ, ómine Juda furoḅie apụ; Ọ́ Nyanaḅọ Ḅe ẹrẹ ḅụ yekarịfị se ḅereni ọkịmẹ na ómine Izrẹl Tamụnọ Ḅe tẹkẹtẹkẹ ḅịa— ọkụma ó ḍukoaye ma ḅụ gbọrịye sọ ọ́ mịẹkẹ.

²Ọkụma opuayemịẹḅụ ọ́ ḅẹ aḅẹ na ómine fịafịa ama mị ḅie furo awọ-ẹ ọ́ pịkị Izrẹl Tamụnọ Ḅe ḅụ sẹrẹrẹmẹ, anị Kụrọmamgba Nyana ẹrẹ mị fị ḅọ ḅe.

³Nyanaḅọ Ḅe nwọse Izrẹl mị ḅẹmẹ, “Ḅọlọsa sịkị ma ḅie tọrọkọju pakaḅịaye à nwọ ḍuko ḍukomẹ; se ḅụnemika ḅaraḅụ à mịẹmịẹmẹ anị paka.

⁴À nemimẹ na ọ́mịna tịḅịḅie kụrọ mị ó ḍiepakụmaḅịa, ikulele kụrọ ọkụ kụrọ pịkị alapẹlẹka sịndankị ọkụ sịndankị apụ.

⁵Anịgose tọrọkọju ó simeḅịa ọkụ mị à nwọ ḍukomẹ ḅọlọ ene ngịsị, tatarị tọrọkọju pakaḅịaye ma ḍuko tẹrẹrẹ yema ḅo mịẹmẹ, mịẹsosịkị ọ́ ḅe ẹka ọkụ na ọ́mịna oru ma na lụgụ ma na ye mị mịẹse anị pakaye-ẹ.

⁶“À ḍukoye mamgba mịọkụ àrị pakasam; ó ḅereniḅịa na à ḍukoaye ma karakaraye-ẹ. Mịọkụ ḅoḅịa ịwọaye à nwọ ḍuko ọ́ pịrịḅịa, pakaḅịaye ḅụ ma à ḍuko pakụmakaye.

⁷Mịọkụ àrị pakaḅịaye gose à ye aḅẹ; mịn mị na kịkịnaye ḅọrọsa sịkịḅụ ma pakakẹ. Paka ḅọrọsa ọkụma ọ́ ḅẹḅịa anị gbolomaye mamgba ó nemimẹ.

⁸Kuḅie se ọ́mịna ḅụgbanaḅịa ọkụ ofori ọkụ ó nemimẹ, anị ómine sịkịmamgba tịḅịḅie kụrọ ḅụ oloko kan apụ-ẹ ḅe ye mị. Anịgose mịn mị ma ọ́ naakẹ ngịsị, gbọrị ọkwẹịn sọ ma gose pịkị ḅo ọ́mịna ḅeri ma lakaye-ẹ.

⁹“Tomoni ị̀ya ẹrẹ mị bomaḅịaye gose, àrị ị̀ya ịganị mị ọlọchịẹmamẹ; àrị anị se ọḅụdamẹ, à pịkị ómine ḅaa sin ẹkẹ.

¹⁰Tọrụsiọrịma fịnị ḅie àrị ómine ḍaḍikisam, kọrị fịnị ḅie seleḅa fọị kpaịnma ọkụ. Ọkụma àrị ọrịmẹ na ọ́ laye ofori-ẹ.

¹¹À mịẹye mị ị̀rị̀ gose à mịẹmẹ— à ḅi ẹkẹ ị̀ya ẹrẹ mị osi nyanaka anịkanịka jụmḅọ ị̀rị̀ na boma mị ḍia anị mị sime ị̀ pịrịmẹ, anị sime ị̀rị̀ ngẹrị pịrịmẹ.”

¹²Nyanaḅọ Ḅe nwọ ḅẹmẹ, “Ómine ị̀ poki, Izrẹl, à chịnsapụ ma! Ị̀rị̀ Tamụnọ-ẹ, sakị ḅụ na, kuluma ḅụ na, pịkị ngẹrị Tamụnọ!

¹³Ị̀ ḅarama sẹkiri mị ḅe chuku sẹkẹ ayema mịẹmẹ pịkị so ma finjima galagalamamẹ. À so ma na sẹkiri mị na chịn koḅirima sịkị, gbọrị kirikiri àrị ḅo arịa ḅụ ḍiepakụmamẹ.

¹⁴“Ó koḅirima se poki, ómine mgba! Oru ma ḅie gbọrị oru sọ ineda ḍuko ẹkẹ na à sẹlẹ ọkịsaḅọ ḅe owu se Babilọn mị pakaḅịa ḅẹye mị; à ḅi na ọ̀ mịẹḅẹye anị ọ̀ mịẹḅịaye-ẹ.

¹⁵Ị̀rị̀ anị ọkwẹịn so se ọ̀ chịnḅọ ḅe-ẹ; à tọrọkọda ọ̀ pakụmaḅo se pịkị mịẹmẹ ye ori na tọrọkọ mun mẹ.

¹⁶“Mịọkụ ómine ị̀ kpekima ḅo se à ḍukoḅịaye ma naa. Sakị mị ngịsị à ḅelema ọkwẹịn-ọkwẹịnmẹ à pịkị sịkịmamgba mịẹmịẹmẹ à ḍukoaye ma pakapakamẹ.” (Mịọkụ Kụrọmamgba Nyanatẹịnḅọ Ḅe oria kụrọ se ị̀ pịrị se ị̀ se sẹịnmẹ.)

¹⁷Izrẹl fịafịa Tamụnọ Ḅe, ómine ḍụaḍụaḅọ ḅe nwọ ḅẹmẹ: “Ị̀rị̀ Nyanaḅọ ọ́mịna Tamụnọ Ḅe, ọ́mịna iḅi gose ye se ó telimarịḅọ ḅe pịkị ómine da ọ́ sọ gbẹịn ateli ḅie chuarịḅọ ḅe-ẹ.

¹⁸“Ó nemikase ị̀ya olokoma koko ọkụma! Anịsịkị re anị ḅẹlẹma kụlụkụlụ kpaịn-kpaịn-ẹka ideri mengi seri ọkụ seri ómine pịrịḅịaye-ẹ. Mgbọkụ ọmụḅaraiḅi sime ọ́ pịrịḅịa anị ambura pekele-pekele anga da ọkụ simemẹ.

¹⁹Ọ́mịna furo ḅie pakaḅoḅịapụ ma onwun mgbọlụ ḅaka ọkụ ini nwọ ḅakaḅịa, à pịkị ḍọkịḅo ọrịḅịa na ngịsị ini fị ẹkẹ.”

²⁰Ọ́ pakaso Babilọn ḅie, ó fimaso! Ḅieḅẹlẹḅụ ḅẹrẹ mị oloku pakụma; mịẹ nyọ mamgba anị nemi: “Nyanaḅọ Ḅe oria fịrịnwẹngịḅọ Izrẹl ḅe ḍụasam!”

²¹Nyanaḅọ Ḅe ọfịrị, samịna onwun ele ḅie oria tomonima sụngụma pakasịkịḅụ, ini mengi pụkọtarị ḅe tọrụsiọrị ọrịkẹ. Ọ̀ mịẹmẹ mengi ḍụparị ḅie pakaḅo ini pịrịmẹ; ọ̀ ḍụparị mị pu finjimẹ, se mengi anịa ḅie ideri pakaḅomẹ.

²²“Si mịẹarị ḅọḅe ngịsị ò dein nyana ẹkẹ,” anị Nyanaḅọ Ḅe ḍuko ọkụ-ẹ.