Read kirikeni Aịzaya 49 Bible Online

Aịzaya 49 - kirikeni bible

Aịzaya 49

¹Ómine ị̀ poki, ómine ḅọlọju-a sẹma, ómine sasaju anga tomonima! Nyanaḅọ Ḅe ori ị̀ sẹlẹ ọkị tẹrẹrẹ ini ị̀ yimẹ se tọn ị̀ pịrịmẹ na àrị oria fịrịnwẹngịḅọ sọ-ẹ.

²Ori ị̀ya ọkwẹịn ma mịẹmẹ àrị okola-agiji oḅu ọkụ oḅumẹ. Ọ̀ ḅarana ọ̀ ḅarama se ị̀ gbẹịnmẹ. Se ḅụkarakarama lubu tẹịnḅịa, mịọmịọ ḍẹịn ḅara ọ̀ nwọse ị̀ wẹrịmẹ.

³Ọ̀ nwọse ị̀ ḅẹmẹ, “Izrẹl, ị́rị́ ị̀ya fịrịnwẹngịḅọ-ẹ; ị́ gose tomoni ị̀ bomaḅịa.”

⁴À nwọ ḅẹmẹ, “à fịrịnwẹngịsam, ọkụma anị yeḅụsọka ọkụ ḍiki! Ị̀ya ịnyọ mgba à famasosam, ọkụma à nwẹngịḅoye ofori-ẹ.” Anịẹḅẹsọ àrị ineda kuḅie se Tamụnọ Ḅe ḅụgbanaḅịa, à nwẹngịarị fịrị mị ḅụ ọ̀ ḅarachụa ị̀ pịrị; à mịẹye mị gose ọ̀ gbẹịnye se ị̀ pịrịḅịa.

⁵Tẹrẹrẹ ini ị̀ yi Nyanaḅọ Ḅe ori ị̀ tọnmẹ; ori ị̀ se oria fịrịnwẹngịḅọ mịẹmẹ na oria tomonima à nwọ ọkị pịkịmaḅo-ẹ, galagala Izrẹlapụma ọkị pịkịmaḅo. Nyanaḅọ Ḅe ori osi se ị̀ pịrịmẹ; ị̀ya ịnyọ mị ọ̀ ḅara ḅomẹ.

⁶Nyanaḅọ Ḅe nwọse ị̀ ḅẹmẹ, “Ị́ nwẹngịḅịa opu fịrị à nwọ nyana ị́ pịrị waraḅẹ, ị̀ya fịrịnwẹngịḅọ. Fị mị ḅaa kọnma Izrẹlapụma ḅe opu mị mịẹḍụḅama kẹngẹkẹ, ọkụma à pịkị ị́ mịẹḅịa ị́ tọnjie sọ sẹma pịrịḅịa— mịẹsosịkị sẹkiri mị mgba ḍụaḅọrọma nyanaḅịa ọkụ.”

⁷Izrẹl fịafịa Tamụnọ pịkị ḍụaḅọ ḅe nwọse ini opuma ḍikisimaḅọ ḅe ḅẹmẹ, sẹma taraka-se-wẹrịmaḅọ ḅe anị pịkị ḅẹrẹtọn apụ fịrịnwẹngịḅọ ḅe-ẹ: “Amanyanapụ ị́ ọrịḅịa na ị́ ḅarị omoniḅọ sọkẹ ini se ị́ pịrị osi pịkị nwọ ḍiepakụmaḅịa; pịkị amanyanapụ awọ sọnị anị ọrịḅịa, se ini tịḅịtu osi se ị́ pịrịḅịa.” Mịn mị mịẹḅịa anịatịḅị Nyanaḅọ Ḅe oria fịrịnwẹngịḅọ ḅe sẹlẹ ọkịsam; fịafịa Izrẹl Tamụnọ Ḅe ọ̀ ḅịpị ḅẹye ọ̀ mịẹmịẹmẹ.

⁸Nyanaḅọ Ḅe nwọse oria tomonima ḅẹmẹ, “Àrị ómine ḍụaḅịa sịkị mị lasa ḅẹḅẹ, à ḍikiḅụgerere nyana ọ́ pịrị se ọ́ kọn àrị owu ma ḅụ ḅarachụa ọ́ pịrịḅịa. Àrị ọ́ kpa pịkị ó ḍikiḍikiḅịa ọ́mịnaḅụ à pịkị ḅọrọ tomoni mamgba na ọḅọkụ fịḅịa. À pịkị gbọrị sịkị se ḅereni ọ́ pịrịḅịa ọ́mịna ama mịọkụ fasa ama mị ḅie ó dein nyana angaḅịa.

⁹À ḍuko ikoliapụma pịrịḅịa na, ‘Ó so deinmaḅụ!’ se kanakana ḅie simeapụma àrị ini ḅẹḅịa, ‘Ọ́ pakaḅo enekuḅu ḅie sọ!’ Chịngị ma ọgọnọ osuein fịarị anana sime ọkụ ini nwọ simeḅịa;

¹⁰fịye anịkanịka mengi ḅarị ini tarị ẹkẹ. Ịrụa na onwun ele ḅe ọfịrị na ḅarị ini tẹịn ẹkẹ, anịatịḅị ini ḅẹlẹmaḅọ tọrọkọda ini na munḅịa. Ori ini na mun ideri mengi ma laḅịa.

¹¹“Tụndụ ma ḅụ àrị opu ateli mịẹ ḅọrọḅịa à pịkị ị̀ya tomonima nwẹngịḅịa ateli karakaramaḅịa.

¹²Ị̀ya tomonima ḅọlọju ḅụ ini wẹrị ḅoḅịa, ọgọnọju na ịrụasọsọ nyọ na, pịkị chukuju Aswan ḅie ḅụ na.”

¹³So ma ó nime chu! Sẹkiri, ḅieḅẹlẹ ḅụ oloku! Ye nime tụndụma ḅie kan paka! Nyanaḅọ Ḅe ori oria tomonima kuḅie kụrọmaḅịa; ò ḍikitịḅịfoin nyana oria tomoni tọrụsiọrịarịapụma pịrịḅịa.

¹⁴Ọkụma Jerusalẹm apụma nwọ ḅẹmẹ, “Nyanaḅọ Ḅe ọ̀ wa sarakoroma sam! Ọ̀ wa se ḅieḅaramasam.”

¹⁵Anị Nyanaḅọ Ḅe ḅo pẹkẹrẹye-ẹ, “Eremeniḅọ ineda árịa tọkụ se ḅieḅarama ḅe á yi tọkụ mị ḅẹlẹmaka ḅaraḅụ? Nyengiḅọ ineda mịna tọkụ se ḅieḅaramaḅịa sọnị ị̀rị̀ ngịsị àrị ó se ḅieḅarama ẹkẹ.

¹⁶Jerusalẹm, ngịsị àrị ineda ị́ se ḅieḅarama ẹkẹ! Ị́ya ẹrẹ à se ị̀ ḅarakuḅu ḅie gịẹịnsam.

¹⁷“Kpoto ị́ namaḅịapụ ma ini ḅoaḅẹ ḅọlọka sịkịḅụ, se ị́ kansarapụ ma ini soḅịa.

¹⁸Ị́ sime okpokiriḅa mị ḍiki kelema se pakarịye mị ḍiki! Ị́ya tomonima ini kpokponimaḅẹ—ini ama ḅoaḅẹ! Ị̀rị̀ anị ḍumo Tamụnọ Ḅe-ẹ nwọ ḅẹye mị anịa ḅụ pikipikiye ofori-ẹ, ị́ya tomonima ini se opuaye mịẹḅịa, anị ya sọ eremeniḅọ árịa ḅiriaye se opuaye mịẹ ọkụ simemẹ.

¹⁹“Ị́ya ama mị ini anị kan guluguluma yawụma koromamẹ— ọkụma mịọkụ ḅo anịa ḅie angaḅịa apụ ma ḅụ ngịsị anị ḅo ẹkẹ. Ị́ kan guluguluma koromapụ ma àrị iḅiọkụma ị́ ḅụ ḅụ ini sikimaḅịa.

²⁰Ị́ya tomonima ḅie ini sẹịnso mun anịnyọ la se ini yiapụ ma gbọrị ene nwọse ini ḅẹḅịa na, ‘Mịn ama mị ngịsị bokẹ— wa angaḅịa ḍụḅa nyọ wa nwọ ḅimẹ!’

²¹Anịsịkị ị́ nwọse ị́ ḅụ ḅẹḅịa na, ‘Tụḅọ mịna awọ mamgba yi ị̀ pịrị? Ị̀ya awọ mamgba ini fịsomẹ, à ḅarị pịkị jịn awọ nyanakẹ. Ini kụrọḅara se ị̀ sẹịnso se ị̀ depakụmamẹ— tụḅọ mịna awọma ḍikiḍiki pakụmaḅo? Ị̀rị̀ ngẹrị kpọngọlọma simemẹ— mịna awọma nde anga ini ḅo?’”

²²Kụrọmamgba Nyanaḅọ Ḅe nwọse oria tomonima ḅẹmẹ: “Àrị elekima mịẹ sẹsẹ ma sẹịnmaḅịa, se ini ị́ya awọma pịkịma ama ḅoḅịa.

²³Amanyanapụ ma ini ị́ ḅụ ḍapụ sime ọkụ simeḅịa; amanyanapụ erema nyengiapụ sime ọkụ simeḅịa. Ini ị́ tọrọkọ tịḅịtu pịkị osi se ị́ pịrịḅịa; ini ḅụ se kiri pịrị inia osi se ị́ pịrịḅịa. Anịsịkị ị́ nemiḅịa na Ị̀rị̀ anị Nyanaḅọ Ḅe-ẹ; ị̀ya ḅarachụa mị koru se à gbakịḅịaḅọ ofori-ẹ.”

²⁴Owuniḅọ ḅe ọfọịn ọkịsaye ị́ ineda ọkịḅe? Sitịḅị ḅụ ḅo kụrọḅara se sẹdaḅọ ḅe ḅaraḅie ị́ ineda ikoliḅọ ḍụaḅe?

²⁵Nyanaḅọ Ḅe pẹkẹrẹmẹ, “Anị mịọkụ paka-ẹ mun-arịye-ẹ. Owuniḅọ ḅe ḅaraḅie sime ikoliapụma ini ini ọkị soḅịa, pịkị sitịḅị ḅụ kụrọḅara se sẹdaḅọ ḅe ọfọịn so ayema ini àrị kọrịḅịa. Ị́rị́ na owusọḅọ goyegoye àrị nụḅọ na owusọḅịa, se à pịkị ị́ya awọma ḍụaḅịa.

²⁶À mịẹḅịa ị́ pụndarịapụ ma ini jụmḅọ jụmḅọ ḅaaḅịa; nweni ḅaa na opu ịganị na inia tọrụsọḅịa. Anịsịkị tomoni mamgba nemiḅịa na Ị̀rị̀ anị Nyanaḅọ Ḅe-ẹ, ọ́ ḍụa pịkị ọ́ pẹkẹrẹ pẹkẹrẹḅọ ḅe-ẹ. Ini nemiḅịa na Ị̀rị̀ anị Izrẹl mị ḅe kụrọ Tamụnọ Ḅe-ẹ.”