Read kirikeni Aịzaya 50 Bible Online

Aịzaya 50 - kirikeni bible

Aịzaya 50

¹Nyanaḅọ Ḅe nwọ ḅẹmẹ, “Ọ́ chịnḅara owuḅọ tarọ na soḅara à nwọse ị̀ya tomonima desin ḅe? Anịẹḅẹ-ọkụma à gịẹịn na wa kansam nwọḅẹ ḍiri pẹkẹrẹ ma nde àrị? Ọ́ chịnḅara tomoniḅọ oria awọ se omoni ḅara ḅụ dẹrị ọkụ à nwọse ó se ómine kunso apụma dẹrị? Ẹn-ẹn, ó kunḅara ḅie sọmẹ ọ́mịna sima gose; ini ó desinmẹ ọ́ mịẹ siaye ma gose.

²“Cheye gose ị̀ya tomonima ini yepẹkẹrẹka à mun ini ḍụamun-arịsịkị? Cheye gose àrị ini chịn sịkị ini ḅịpị ọkịka? Ini ḍụa mị ḅụ ị̀ ḅụ ịnyọ opuma fa? Àrị ineda kụrọ pịrị se tọrụ mị samịnaḅịa, à pịkị ineda onwun ele ma pịkịḅo tọrụ mịẹḅịa, mịẹsosịkị arịa ḅie sime injima mengi oforika ḅe ḅụḅalaḅala gose fịḅịa.

³Àrị ineda so mị mịẹ anị kanakanaḅịa, ị́ ḅẹḅịa na anị fịapụ gose kururuaḅẹ.”

⁴Kụrọmamgba Nyanaḅọ Ḅe à ḍukoḅịaye ọ̀ nwọse ị̀ telimasam, mịẹsosịkị àrị ịnyọ ḅụfasapụ ma mịẹkụrọmaḅịa ọkụ. Dede goyegoye ori ị̀ mịẹmẹ ị̀ kuḅie chịẹ-chịẹ-chịẹ ḅụ simemẹ ò se ị̀ telimaḅịaye ma gose.

⁵Nyanaḅọ Ḅe ò yekaịnḅo se ị̀ pịrịsam, ma àrị ori na tụḅụrụ anịkanịka ọ̀ ḅụ pịkị sokẹ.

⁶Àrị ị̀ koku pịkị ị̀ fomuapụ ma damẹ. Ini ị̀ wọlọ sịkị àrị ini dachịẹmakẹ, pịkị ini ị̀ ḅapuko ọgụrẹ ma jine sin àrị sịkị na ini fụla se ị̀ tọrụ sara sịkị na.

⁷Ọkụma ini ị̀ wọlọ ayema ineda ye se ị̀ mịẹkẹ anịatịḅị Kụrọmamgba Nyanaḅọ Ḅe ọ̀ ḅarachụa nyana ị̀ pịrịmẹ. Àrị ị̀ kuḅie kụrọma se inema ḅụ àrị damẹ. À nemimẹ ị̀ ḅụgerere ẹkẹ,

⁸anịatịḅị Tamụnọ Ḅe ò kpekima omi-ẹ, ọ̀ pịkị ḍọkịḅo ọrịḅịa na à nemiye ofori-ẹ. Ḅẹrẹ se ị̀ya ọgọnọ gbanaḅịaḅọ omi? Ó ye wa so ḅẹrẹkọn warị mun! Ò se ị̀ya ọgọnọ gbanaḅịa ḅẹrẹ ma ọ̀ nwọse ḅo!

⁹Kụrọmamgba Nyanaḅọ Ḅe na mịnaḅụ na ọ̀ chịẹ ị̀ pịrịḅịa— tụḅọ, anịsịkị, ineda ḅẹrẹ ḅarasi kọn ị̀ pịrị ḅe? Ye se ị̀ tịḅị gbanapụ mamgba akakaraḅa pẹị ḅịtẹ sịkịrị fa ọkụ ini sịkịrị faḅịa.

¹⁰Ómine Nyanaḅọ Ḅe osi pịkị oria fịrịnwẹngịapụma ḍukoaye ma mịẹ, ọ́ nwẹngịarị ateli mị iḅiọkụma kanakanamẹ nwọḅẹsọ, ọkụma ó kuḅie se Nyanaḅọ Ḅe ḅụgbana, ị́ Tamụnọ Ḅe ḅụ sẹrẹrẹ.

¹¹Ómine nwọ ḅẹrẹḅia se jịn apụ fama ḍọkịarị apụ mamgba ó ḅiaye ma ḅụ ọ́ ḅọrọ fịḅịa. Nyanaḅọ Ḅe na mịnaḅụ na mịn mị mịẹse anị chịẹḅịa; ḅụgererema tọrụsiọrị ọ́ nwọ ọrịḅịa.