Read kirikeni Aịzaya 51 Bible Online

Aịzaya 51 - kirikeni bible

Aịzaya 51

¹Nyanaḅọ Ḅe nwọ ḅẹmẹ, “Ómine ị̀ poki, ómine ḍụaḅọrọma ḍọkịarịapụ ma, ómine ḅarachụa pịrị gose ị̀ damaḅo apụma. Ọ́ ḅọrọ pakaḅo ḍụparị mị ọ́ nwọse ḅiekoroma, anị ini ó pu pakụmaḅo ḍụparị mị.

²Ọ́mịna olomu ḍaḅọ Ebraham ḅe ọ́ nwọse ḅiekoroma, pịkị Sera ma na, anị ómine inia furoḅie pakaḅo apụ ma-ẹ. Àrị Ebraham ḅe chịn sịkị, ọ̀ tọkụ nyanakẹ, ọkụma àrị ọ̀ ḅẹlẹma se awọmẹnị se ọ̀ pịrịmẹ; à mịẹse ò furoḅie pakaḅo-apụ ma ḅakamẹ.

³“À ḍikitịḅịfoin nyana Jerusalẹm mị pịrịḅịa, kansosa ama mị ḅie angapụ mamgba. Ama mị anị onwun ele sọmẹ ḅẹ sọnị, à mịẹḅịa ini onu nama kelema iḅi ngwengwe na chịnmgbọlụ na ḍipi iḅi nyọ sọḅịa, anị Idẹn ozu ḅie à ḍipi ayema sime ọkụ. Tọrụḅẹlẹ na ḅieḅẹlẹ na anị nyọ simeḅịa; ini pịkị ḅieḅẹlẹ na mịẹḅaka na nime chu ị̀ bomaḅịa.

⁴“Ómine ị̀ poki, ị̀ya tomoni, à ḍukoarịye ọ́ nwọ poki: À telimaye nwọse sẹsẹ ma pịrịmẹ; ị̀ya olokoma enekuḅu ọkịḅo ini pịrịḅịa.

⁵À sarama ḅo ini ḍụaḅịa; ị̀ya ọmụḅaraiḅi sịkị mị kpekisam. Ị̀rị̀ na mịnaḅụ na à ḅẹrẹtọn sẹma pịrịḅịa. Ḅọlọju amama àrị ị̀ya ḅo mị koru aḅẹ; àrị ini ḍụaḅịaye gose ini kuḅie kụrọma ị̀ korumẹ.

⁶Tọrụ dekichịẹma so ma ḍiki; kiri mị ḍiki! So ma àrị onwoin fa ọkụ faḅịa; kiri mị olomu-a ḅịtẹ kan ọkụ kanḅịa, se arịa ḅie sime tomoni mamgba ọmụmụ fị ọkụ fịḅịa. Ọkụma à se ḅo ḍụaḅọrọma mị sime gbasoḅịa; ị̀ya ọmụḅaraiḅi mị anị kuluma nyana ẹkẹ.

⁷“Ómine ị̀ poki, ómine karakaraye mị nemiapụ ma, ómine ị̀ya ḍieaye ma se ọ́mịna kuḅie chụa wẹrịapụma. Ọ́ ḅalafa nyanama tomoni ómine sima ọkwẹịn kọn pịkị ọ́ wọlọ sịkịḅụ;

⁸akakaraḅa pẹị ḅịtẹ ịmaịnfa ọkụ ini ịmaịnfaḅịa! Ọkụma à se ḅo ḍụaḅọrọma mị sime gbasoḅịa; ị̀ya ọmụḅaraiḅi mị sime gbasomẹ.”

⁹Ị́ ḅụ pakụma Nyanaḅọ, se wa ḍụa! Ị́ya kụrọ mị se wa ḍụa; ḅọrọsa sịkị ma ḅie ị́ kọnkọn kụrọ mị kọn. Ị́rị́ anị tọrụ ḅie sime opu ḅalafama Rehab ḅe pẹlẹ kọsịmaye-ẹ.

¹⁰Ị́rị́ anị pịkị tọrụ mị mịẹ samịnamaye-ẹ, se pịkị mengi ọgọnọ ateli mịẹ pakụmaye-ẹ, mịẹsosịkị ị́ ḍụarịapụ ma saḅa ḅịa ọkụ.

¹¹Ị́ ḍụaḅọrọma sapụ ma ini ḅieḅẹlẹḅụ Jerusalẹm mị laḅịa, nime chu oloku ḅieḅẹlẹ aḅẹ. Ini ḅieḅẹlẹ gbasoḅịa, ini kururu na ḅiefie na nemika gbasoḅịa.

¹²Nyanaḅọ Ḅe nwọ ḅẹmẹ, “Ị̀rị̀ anị ómine mịẹkụrọmarịḅọ ḅe-ẹ. Cheye gose ómine oju akpakpa chụa se fịḅịa tomoniḅọ ḍikiḅalafa-ao, ineda osuein ye inemaka ọkụ inema-ẹkaḅọ ḅe?

¹³Nyanaḅọ ómine tẹmẹḅọ ḅe ómine ò se ḅieḅaramasa, so ma finjima pịkị kiri mị ḅie chuku sẹkẹaye ma koromaḅọ ḅe? Cheye gose kụrọma ó ḍiki ịganị se ọ́ pụndarịapụ ma pịkị ḅụkarakarama ómine ḅaa ḍọkịarị apụma sịkịmamgba ọ́ nwọ ḍikiḅalafa-ao? Inia kụrọ ịganị ḅarị ineda yese ọ́ mịẹ ẹkẹ.

¹⁴Nwọ ikoli ḅie simeapụma ḅọlọka sịkịḅụ ini pakaḅoḅịa; ini ḅọlọ-a ḍin laḅịa pịkị ini ḅi fịaye goyegoye ini nyanaḅịa.

¹⁵“Ị̀rị̀ anị Nyanaḅọ ọ́mịna Tamụnọ Ḅe-ẹ; à tọrụ mị jike se ambura ma mịẹse àrị ḍarịmẹ. Ị̀ya ẹrẹ anị Kụrọmamgba Nyanaḅọ!

¹⁶Ị̀rị̀ so ma finjimamẹ pịkị sẹkiri mị ḅe chuku sẹkẹaye ma koromamẹ; à nwọse Jerusalẹm mị ḅẹmẹ na, ‘Ómine ị̀ya tomoni-ẹ! Ị̀ya ḍieaye ma à se ọ́ pịrịsam, à pịkị ị̀ ḅarama se ọ́ gbẹịnmẹ.’”

¹⁷Jerusalẹm, sịsẹ! Ị́ ḅụ gunugunu se sịsẹ chịẹ! Ọmọngọ mị ḅie fomuḅara mị ị́ ḅusam anị Nyanaḅọ Ḅe oria ịganị ḅụ se ị́ pịrị ḅu nwọḅẹye mị; ị́ anị ḅu iderimamẹ, se anị pịkị ị́ mịẹse ị́ jiajiamẹ.

¹⁸Tọrọkọda ị́ se nwẹngịḅịa gbọrịḅọ sọnị ofori-ẹ, ị́ya tomonima ḅieḅụ ḅaraḅụ ị́ ọlọ nwẹngịḅịa gbọrịḅọ sọnị ofori-ẹ.

¹⁹Mama siaye ḅie ị́ koromẹ; ọmụ ị́ya ama mị gulugulumasam, fịfịye pịkị ị́ya tomonima ḅaasam. Ị́ ḍikitịḅịfoin gbọrịḅọ sọ ofori-ẹ.

²⁰Ị́ya tomonima ateli anga ḅụ goyegoye ịnyọ iniaḅụ faye gose ini ḅịkị korokoromẹ; piri deapụ ịgbọ ḅie koro tụḅụra ọkụ simemẹ. Tamụnọ Ḅe oria ịganị mị ḅe kụrọ mị ini lamẹ.

²¹Ómine tọrụsiọrị ọrịarị Jerusalẹm apụ, ómine nwọ iru ḅuapụ jiajia ọkụ jiajiarị apụma,

²²Nyanaḅọ ọ́mịna Tamụnọ Ḅe ḅarachụa ọ́ pịrị ḅụ ḅẹaḅẹ na, “Ị̀ya yeḅụosọ ḅụ à se ọ́ pịrị ọmọngọ mị, àrị anị ọkị so aḅẹ. Ọ́ ḅarị ḅu ẹkẹ ómine mịẹse ó jiajiarị iru mị.

²³Ómine pụndarịapụ ma à se nwọ pịrịḅịa, anị ómine mịẹse ómine ateli ma ḅie ḅọlọlọ se fun nanga ḅara se ọ́ nangapụ ma.”