Read kirikeni Aịzaya 52 Bible Online

Aịzaya 52 - kirikeni bible

Aịzaya 52

¹Jerusalẹm, kụrọ se pịkị opuama nwọ sọ! Fịafịa Tamụnọ opuama, iḅiaye se ị́ ḅụ ḅirima! Oru ḅẹrẹnemi apụma ini ḅarị ngịsị ị́ya onu ḅọkọ ma ḅie sọ ẹkẹ.

²Ị́ ḅụ jike finma, Jerusalẹm! Fọn ma ḅie sịsẹ se ị́ya emine mị ọgọnọ sime! Ọ́ fịnama ikoli ma ọ́ nwọ sin, ómine ini Zaịyọn ḅie kụrọḅara se kunso apụma!

³Kụrọmamgba Nyanaḅọ Ḅe nwọse oria tomonima ḅẹmẹ, “Ómine omoniapụ sọ sịkị ḅụ, ini igbiki gbẹịn se ómine omoniapụ sọkẹ, anị gbọrịḅaraḅụ, ọ́mịna pakaḅo mị ḅụ, gbọrị igbiki sọ gbẹịn ẹkẹ.

⁴Ó mun Ijipt ḅie igoniapụ ḅara ḅụ anga sịkị, ómine ngẹrị ọ́mịna ḅụ ḅereni se mun angamẹ; Asiria mị gbọrị igbiki sọ gbẹịnka ḅaraḅụ kụrọ ḅara nwọse ó kunsomẹ.

⁵Se mịọkụ Babilọn ḅie anị gbọrịye mị pịkị pakasam, ini kụrọḅara se ó kunsomẹ igbiki gbẹịnka ḅaraḅụ. Ḅẹrẹtọn ọ́ pịrịapụ ma, ḅụ boma se ḅịpịkpọ ị̀ pịrịmẹ ini pịkị sịkịmamgba ị̀ ḍikisimaye mịẹmịẹmẹ.

⁶Ó nemiḅịa sịkị ḅoaḅẹ na Ị̀rị̀ Tamụnọ-ẹ, à pịkị ọkwẹịn kọn ọ́ pịrịsam.”

⁷Nde anị ḅụgbiripumaye sọḅịa ọkụ oku nwẹngịḅọ tụndụma ḅie, iḅi ḅẹrẹ mị se saḅa ḅoaḅẹ, anị deinma pịrị iḅi ḅẹrẹ mị! Ọmụḅaraiḅi ọ̀ nwọ ḍukoaḅẹ se ọ̀ nwọse Zaịyọn mị ḅẹmẹ, “Ọ́mịna Tamụnọ Ḅe anị amanyanaḅọ-ẹ!”

⁸Opuama mị koruarịapụ ma ini oloku aḅẹ, ini gboloma se ḅieḅẹlẹ oloku kọn aḅẹ. Ini ḅarana inia tọrụmgbọlụma se ọrịḅịa Nyanaḅọ Ḅe ọ̀ pịkịma Zaịyọn ḅoḅịa sịkị.

⁹Buan paka ḅieḅẹlẹ oloku kọn, ị́rị́ gulugulusa Jerusalẹm! Nyanaḅọ Ḅe ori oria opuama mị ḍụaḅịa se ọ̀ pịkị oria tomonima kuḅie kụrọmaḅịa.

¹⁰Nyanaḅọ Ḅe ori oria fịafịa kụrọ mị se fịrịnwẹngịḅịa; ori oria tomonima ḍụaḅịa, se bebe tomonikiri mị mgba anị ọrịḅịa.

¹¹Gbarịmaka ḅaraḅụ ọ́ Babilọn mị ḅie so, ómine Oputẹkẹwarị mị ḅie fịrịnwẹngị ayema pụra apụ mamgba. Ọ́ ḅara se siaye lamama; ómine ọ́mịna ḅụ ma mịẹfịafịama se ó so.

¹²Mị sịkị ó be ḅụ so ẹkẹ; ó furuḅaraḅụ mangị so ẹkẹ. Nyanaḅọ ọ́mịna Tamụnọ Ḅe tọrọkọda ómine pịrịḅịa se ọ̀ pịkị angana angana ḅụ ọ́ gbẹịnḅịa.

¹³Nyanaḅọ Ḅe nwọ ḅẹmẹ, “Ị̀ya fịrịnwẹngịḅọ ḅe nwẹngịarị fịrị mị ori na tọrọkọ tọrọkọ munḅịa; ini opu osi nyana ọ̀ pịrịḅịa.

¹⁴Tọn apụ ḅụgbiripumẹ ini ori ọrị sịkị; ori opuma si wọlọmaye gose ọ̀ ḅarị mbuḅọ kịkẹkẹ.

¹⁵Ọkụma mịọkụ tọntọn-a sẹ ḅụbuanma ḅara se ò ḍikiḅịa, amanyanapụ pịkị ineda ḅịpị finji ọkwẹịn ẹkẹ ḅalafaḅụ. Jịn enema ini nemikaye ini nwọ ọrị se pịkị anị kaịnḅoḅịa.”