Read kirikeni Aịzaya 54 Bible Online

Aịzaya 54 - kirikeni bible

Aịzaya 54

¹Jerusalẹm, tọkụ nyanaka eremeniḅọ sime ọkụ ị́ nwọ simemẹ, ọkụma mịọkụ ineda nime chu pịkị ḅieḅẹlẹ oloku kọnḅịa. Mịọkụ ị́ ḅaka awọ nyanatẹịn deḅọ ngịsị koromasoka eremeniḅọ nẹngịḅịa!

²Ị́ se anga ikowarị mị mịẹ anị ḍụḅatẹịn; jịn ḍiki se ísí-a ḍiki ma chịrọma se ịnyọ nyana chịn se anị kakị!

³Ị́ mịẹḅịa angana anganaḅụ ị́ya eke mị ye anịaḅụ sọ; jịn sẹ apụ nwọ mịọkụ angarị ama mị ḅie ị́ya tomonima ini kpoto anị ọkị angaḅịa. Tomoni ḅie oforika opuamama ḅie mịọkụ tomoni ḅo ḅeinḅịa.

⁴Ḅalafama—ị́ ḅarị ḅụgerere nyana ẹkẹ; ini ị́ ḍiki iderima ẹkẹ. Ị́ya ḅereni nyanaka mị ị́ se ḅieḅaramaḅịa anị ịwọma owuḅọ sime eremeniḅọ deḅọ ḅe osika mị se ḅieḅarama ọkụ, pịkị iremeni tọkụ deḅọ fịsaḅọ gbọngọlọma sime ọkụ sime mị sọ ị́ ḅieḅaraḅịa.

⁵Ị́ Tẹmẹḅọ Ḅe ò deḅọ sọ ị́ pịrịḅịa— Kụrọmamgba Nyanaḅọ anị oria ẹrẹ-ẹ. Fịafịa Izrẹl Tamụnọ Ḅe ori ị́ ḍụaḅịa— ori anị ḅẹrẹtọn bebe tomonikiri mị mgba pịrịarịye-ẹ.

⁶Izrẹl, ịwọma owuḅọ sime eremeni tọkụ sime ọkụ anị ị́ sime ọkụ-ẹ, anị deḅọ koromaso se ḅo opu kururu nyanaḅọ sime ọkụ. Ọkụma Nyanaḅọ Ḅe ị́ chịn pịkịma ọ̀ ḅụ pịrị se nwọ ḅẹmẹ:

⁷“Gbọrị kala sịkị à nwọse ị́ ḅụ ḅarasinmẹ; gbun ḅẹlẹma ḅụ àrị ị́ ọkị ḅo ḅịa.

⁸Gbọrị kala sịkị ḅụ àrị ịganị ḅụ ị́ ḅụ sikimamẹ, ọkụma àrị ị̀ya ḅẹlẹma mị se ị́ ḍie gbasoḅịa.” Anị Nyanaḅọ ị́ ḍụaḍụaḅọ ḅe ḍukoye-ẹ.

⁹“Noa ḅe sịkị ḅụ à ye ḅerenimẹ na à ḅarị opumengi se sẹkiri mị fama ẹka-ẹ. Mịọkụ à pịkị yeḅerenimẹ na à ḅarị ịganị nyana ị́ pịrị ẹkẹ; à ḅarị opuma ị́ ḍiki ịganị anịkanịka fomuḅara se ị́ pịrị ẹkẹ.

¹⁰Tụndụ ma na chịngịma na àrị ineda kọsị saraḅịa, ọkụma à nyana ị́ pịrị ḅẹlẹma mị ngịsị kuluma ẹkẹ; à ḅereni dein mị à koko gbasoḅịa.” Anị Nyanaḅọ ị́ ḅẹlẹmaḅọ ḅe ḍukoye-ẹ.

¹¹Nyanaḅọ Ḅe nwọ ḅẹmẹ, “Yei Jerusalẹm, ị́rị́ tọrụsiọrịarị ḅarachụa pịrịḅọ oforika opuama, gbọrịḅọ sọ ị́ kuḅie kụrọmakẹ, yela ḍụparị à nwọse kpoto ị́ya chukusẹkẹ ḍụparịma nama chịẹmaḅịa.

¹²Yela ḍụparị à nwọse ị́ya sokopi warịma namaḅịa, ị́ya onu ḅọkọ ma fịnị ọfịrị ọkụ ọfịrị ḍụparị mị à se àrị mịẹḅịaye-ẹ, se ị́ gbori kelema onu ma yela ḍụparị anị à se àrị mịẹḅịaye-ẹ.

¹³“Ị̀rị̀na-mịnaḅụ na ye se ị́ya tomonima telima pịkị mịẹaye ḅarasọ na dein na se ini pịrịḅịa.

¹⁴Karakaraye mịẹ na iḅi mịẹmịẹye na mịẹse ị́ kụrọḅịa. Tomoni pụnda na ḅalafamaye na ị́ ḅarị nwọ nyana ẹkẹ.

¹⁵Owu se ómine pakaḅọ goyegoye, nụḅọ ị̀ ḅịpị gbelakẹ; owu se ómine pakaḅo goyegoye ọmụ nụḅọ ḅara si ḅịa.

¹⁶“Tẹmẹnịḅọ ḅe ị̀rị̀ ọ̀ tẹmẹmẹ, anị nwọ fịnị se owuniaye tẹmẹtẹmẹḅọ ḅe. Owuniḅọ ḅe sọ ị̀rị̀ ọ̀ tẹmẹmẹ, anị nwọ owuniaye ma se owusọ se tomoni ḅaa àrịḅọ ḅe.

¹⁷Ọkụma gbọrị owuniaye sọnị ọ́mịnaḅụ fịrịnwẹngị ẹkẹ; ḅẹrẹ se ómine pụnụmarịapụ mamgba ọ́ pẹkẹrẹ ḅịpị nyana ini pịrịḅịa. Àrị owusọ ị̀ya fịrịnwẹngịapụma pịrị se ọmụḅaraiḅi se ini pịrịḅịa.” Nyanaḅọ Ḅe ò ḍukosam.