Read kirikeni Aịzaya 55 Bible Online

Aịzaya 55 - kirikeni bible

Aịzaya 55

¹Nyanaḅọ Ḅe nwọ ḅẹmẹ, “Mengi pụkọtarịḅọ goyegoye, ḅo— mị mengi-ẹ! Ó ḅo, ómine igbiki nyanakapụ— ó ḅo fịaye fẹ fị! Ó ḅo! Iru na ndo mengi na fẹ— anị ọ́mịna ḅara famaḅịaye ofori-ẹ!

²Cheye gose ó yeḅụsọkaye ḅụ igbiki fama-ao? Cheye gose ọ́ nwẹngị fịrịḅụ ini se ọ́ gbẹịn igbiki ọ́ nwọ famaso sịkị fịye pa ọ́ tarị-ao? Ómine ị̀ poki se à ḍukoye mị mịẹ, fịaye mamgba ḅụ iḅitẹịn fịaye mị ḅe ḅẹlẹ ọ́ nwọ ọrịḅịa.

³“Ómine ị̀ poki, ị̀ya tomoni, se ómine ị̀ damaḅo; ómine ị̀ damaḅo, anịsịkị ó ḍumoḅịa! Àrị ómine na sime gbamaso ọḅọkụ fịḅịa, anịsịkị à se Devid ḅe karị ḅẹlẹma mị à nwọse ọ́ pịrịḅịa.

⁴Àrị ò se tịḅịnịḅọ na, sẹsẹ ma ḅe ọmụkụlọdaḅọ mịẹmẹ, ọ̀ ḅụ à ḅọrọ ị̀ya kụrọ mị se ini ḍiemẹ.

⁵Mịọkụ ọ́ jịn-a sẹ chịn koḅirimaḅịa; anị ma jịn sịkịḅụ ómine nemika sẹ, ọkụma mịọkụ, mangị ḅụọ ini nwọse ḅo ọ́mịna ḅụ sọḅịa! Ị̀rị̀, Nyanaḅọ ọ́mịna Tamụnọ, fịafịa Izrẹl Tamụnọ Ḅe, mịẹse maye mamgba pakaḅịa; osi na boma na à nwọse ọ́ pịrịḅịa.”

⁶Ó vinpịkị Nyanaḅọ Ḅe da se ọ̀ tẹkẹ, mịọkụ ọ̀ nwọ kpeki sịkịḅụ.

⁷Ye sitịḅịnyanapụma inia si mịẹmịẹaye ma ḅụ ḅarasin se ini kọnkọn koroma ma ḅụ ḍinma. Ye ini vinpịkị Nyanaḅọ Ḅe da, mịna Tamụnọ Ḅe; ò ḍikiḅụgerere nyana-nyanamẹ, ọ̀ sịkị famaka ḅaraḅụ siḅụ ḅarasin sinmẹ.

⁸“Ị̀ya koroma ma,” Nyanaḅọ Ḅe nwọ ḅẹmẹ, “ọ́mịna koroma ma na kịkịnakẹ, ị̀ya ateli ma pịkị ọ́mịnaye ma ḅụ kịrịmẹ.

⁹So mị nwọ kiri mị ḅụ gololo laḅara mị, anị ị̀ya ateli ma na koroma ma na gololo ọ́mịnaye ma nẹngị ọkụ-ẹ.

¹⁰“Ị̀ya ọkwẹịn mị soḅie ḅụ ḅo kiri la kpo ene mgbọlụ na ene na sime ọkụ simemẹ. Àrị fịaye pakụmamẹ àrị pịkị ḍipiḅịa fịaye pakụma fịḅịapụ pịrịmẹ.

¹¹Anị à kọnḅịa ọkwẹịn mị pịkị simeḅịa ọkụ-ẹ— à tọn anị pịrị na anị mun mịẹ nwọḅẹye mị anị gbakị ẹkẹ; anị fịrịma na anị mịẹ ḅẹye goyegoye anị mịẹḅịa.

¹²“Ḅieḅẹlẹ ḅụ ọ́ Babilọn mị koroma soḅịa; dein ḅụ ini opuama mị ḅie ọ́ ḅọrọma pakụmaḅịa. Tụndụ ma na chịngịma na buan paka nime chuḅịa, ejema pịkị ḅieḅẹlẹ ḅụ olokuḅịa.

¹³Saịprẹs ejema àrị sẹnịḅịa mịọkụ aga-ikpu ma sime nyọḅụ; kụnụ ngwengwe na wiliwili ịnyanya na chịnmgbọlụ na chụa eje piri anị ịga piri mị tịḅị ḍinma pakaḅịaye-ẹ. Mị anị sime gbasoḅịa elekima-ẹ, anị se Ị̀rị̀, Nyanaḅọ Ḅe mịẹsaye ma se ḅiekoromaḅịaye-ẹ.”