Read kirikeni Aịzaya 56 Bible Online

Aịzaya 56 - kirikeni bible

Aịzaya 56

¹Nyanaḅọ Ḅe nwọse oria tomonima ḅẹmẹ, “Karakaraye na mịẹgbẹịnye na ọ́ nwọ mịẹ, ḅọlọ ẹkẹ à ḅo ọ́ ḍụaḅịa.

²Sịkịmamgba Ịnyọ Sara Ene mị koko se anị se gbin-tikapụ ma àrị ini ḅẹlẹmaḅịa. Siye mịẹkapụ ma àrị ini ḅẹlẹmaḅịa.”

³Ḅo Nyanaḅọ Ḅe oria tomonima ḅụ sọ igoniḅọ ḅe, ọ̀ ḅẹ ma na, “Nyanaḅọ Ḅe ò ḅereni ị̀ pịrị ẹkẹ àrị oria tomonima ḅụ sọ ọ̀ tẹkẹ.” Ini po ḅọ ḅe, ò koromama na ori ineda awọ nyana ẹkaye gose ori ineda Tamụnọ-a tomonima ḅie gbọrịḅọ sọ ẹka-ẹ.

⁴Nyanaḅọ Ḅe nwọse ọkọ simeḅọ ḅe ḅẹaḅẹ na, “Ị́ nemikase ị̀ osiḅụ Ịnyọ Sara Ene mị kokomẹ, ị́ pịkị ị̀ ḅụḅẹlẹḅịaye mịẹmịẹmẹ ḅẹḅẹ, se pịkị kuḅiemgbọlụ laḅara nwọse ị̀ya ọḅọkụ mị kokomẹ nwọ ḅẹḅẹ,

⁵ị́ya ẹrẹ mị Oputẹkẹwarị ḅie, ị̀ya tomonima ḅieḅụ ini anịse ḅiekoromatẹịn owuapụ awọ na eremeni awọ na nyana mị nẹngịḅịa. Ngịsị ini ị́ se ḅieḅarama ẹkẹ.”

⁶Nyanaḅọ Ḅe pịkị nwọse, ḅo oria tomonima ḅie sọ se ọ̀ ḅẹlẹma, pịkị fịrịnwẹngị ọ̀ pịrị, kuḅiemgbọlụ laḅara se Ịnyọ Sara Ene mị koko igoniapụma ḅẹaḅẹ na:

⁷“Àrị ómine na Zaịyọn, ị̀ya osi nyana chịngị mị ḅoḅịa, ị̀ya tẹkẹwarị ḅie ḅieḅẹlẹ se ọ́ pịrị, pịkị ị̀ya agbamịẹ ẹbẹ ọgọnọ ọ́ mịẹḅịa agbama da ọkịḅịa. Ị̀ya Oputẹkẹwarị mị ini nwọse anị chịnḅịa sime sẹsẹ mamgba pịrị tẹkẹwarị.”

⁸Kụrọmamgba Nyanaḅọ Ḅe, ini kụrọḅara se depakụma oria tomoni Izrẹlapụma ọkị ama ḅosaḅọ ḅe, ḅereni ọkịsam na ọ̀ pa pịkị jịn apụ ọkịḅo iniaḅụ chuḅịa.

⁹Nyanaḅọ Ḅe, ò ḍuko jịn sẹ apụma pịrịsam na, piri nama ḅara ini nwọse ḅo oria tomonima kanị pẹị sin.

¹⁰Ọ̀ nwọ ḅẹmẹ, “Ị̀ya tomonima inia ḅeri jine gbẹịn ḅara sime tịḅịnị mamgba tọrụmgbọlụ pụn apụ-ẹ! Gbọrịye sọ ini nemikẹ. Oloku-olokuka nyọ koru obiri sime ọkụ anị ini sime ọkụ-ẹ—ini papa ḅọlọlọ mọnọ se ḍawọḍawọmẹ. Ini opuma mọnọ ḅẹlẹmamẹ!

¹¹Fịye pụkọ tantanka ịmụkụ obiri sime ọkụ ini nwọ simemẹ. Mịna tịḅịnịma, ini yekaịnḅo tịḅịḅie nyanakẹ. Inia ḅie ọrụḅọḅọ mịna ḅụḅẹlẹye mịẹmịẹmẹ, pịkị mịnaḅụ iḅi kẹngẹ ḍọkịḍọkịmẹ.

¹²‘Ó ye wa pa iru nyanaḅo,’ mịna iruḅu tọrụḅaama apụma nwọ ḅẹmẹ, ‘se wa ḅu mịna pụkọtanḅịa ḅara nwọ ḅu! Ḅa mị pa iḅitẹịn mịmgba nẹngịḅịa!’”