Read kirikeni Aịzaya 59 Bible Online

Aịzaya 59 - kirikeni bible

Aịzaya 59

¹Ó koromama na Nyanaḅọ Ḅe, ómine ḍụa mị ḅụ, ịnyọ opuma ọ̀ ḅụfamẹ anịkanịka ori opuma iniki ẹrẹchị, ḅarachụa gose ómine ọ̀ chịn àrị sịkị ori ọ́mịna chịn ḅịpị mị naakẹ.

²Anịgose ọkọ pakaye anị, ọ́mịna sima gose anị ò gose ọ́ naakaye-ẹ. Ọ́mịna sima àrị Tamụnọ Ḅe ḅụ ómine pu sikimamẹ, ọ́ ḅụkụrọma ọ̀ tẹkẹ àrị sịkị mị ḅụ.

³Iruokọn na angara fị na, nini kọn ḅụ na, ọ́ ḅẹrẹḅarasi nyanamẹ.

⁴Ọ́ ḅẹrẹkọn warị mun mẹ ọkụma ọ́ ḅẹrẹ ḅara iḅi nyana ọ́mịnaḅụ pịrịkẹ. Ḅẹrẹ-ḅara-iḅi gose ómine iruoaye ḅụ sẹrẹrẹmẹ. Ọ́ tọn se ọ́ mịẹḅịaye ma ọ́ nwọ mịẹ pakụmamẹ, se yese jịn apụ lamaḅịaye gose.

⁵Ọ́ tọn se ọ́ mịẹḅịa siaye ma sime ọkụ, tomoni-ḅaa-ḅaa oruwu anyị ọkụ simemẹ. Gbọrị anyị ḅaa kọsị, anịa ḅie oruwu pakaḅoḅịa! Ọkụma ọ́ tọn siaye ma, se ọ́ mịẹḅịa gbọrị iḅi sọnị ofori-ẹ—olokobiriḅa warị se gbin ḅụchụaye ye ḅụ sọka ọkụ anị àrị ye ḅụ sọka ọkụ-ẹ.

⁷Sịkịmamgba siaye kẹngẹ anị ọ́ tọn arịye-ẹ, ọ́ pịkị ineda ịnyọ ḅaa ye mị mịẹkẹ. Ḅẹrẹ nemikapụ nini mị, ọ́ sịkị fama anị pịrịpịrịkẹ. Ọ́mịna ḍumo anị ye sima na ye guluguluma na-ẹ, ó mun anga mun anga ḅụ,

⁸pịkị ó sime nyọḅụ simeḅọ goyegoye ḍumo ẹkẹ. Ọ́ mịẹye goyegoye karakarayekẹ. Kpụlụkụ kpụlụkụ ateli anị ó ḍuko nwẹngịarịye-ẹ, anị ateli mị ḅie nwẹngị se ḍumoḅịa gbọrịḅọ sọnị ofori-ẹ.

⁹Tomonima nwọ ḅẹmẹ, “Mịọkụ wa nemisam Tamụnọ Ḅe gose wa pụndarịapụ ma ḅara ḅie wa ḍụakaye. Wa kuḅie se wa nwẹngịḅịa enekuḅu ḅụgbanamẹ, ọkụma kanakana ḅie anị wa omi-ẹ,

¹⁰wa pịkị tọrụmgbọlụ pụn apụ irima ḅọrọ ọkụ se irima ḅọrọmẹ. Ene ogboin ḅụ mịna ḅụọma tọmbụlọ ḅara, ḍin ḅie ọkụ simemẹ, wa ḍụẹịn ama kanakana tomonikiri ḅie omi-ẹ ḅe ḅara anị anị sime ọkụ-ẹ.

¹¹Mịna ḅalafamẹ, wa ḅụḅalaḅala nyanamẹ. Wa Tamụnọ Ḅe korumẹ, wa pụnda pịkị wa mịẹirimarịapụma ḅara ḅie ò ḅo wa ḍụaḅịa ẹrẹchị, ọkụma gbọrịye sọnị mịẹkẹ.

¹²“Nyanaḅọ, wa ị́ mịẹirimaye ḅakamẹ. Wa mịẹ sima ḅẹrẹ ḍuko mịna ọgọnọ gbanaḅẹ. Àrịmgba wa nemimẹ.

¹³Wa ḅakama sitịḅị chụa ị́rị́ na tụḅụrụsam, wa ị́ sịkịmẹ, wa pịkị ị́ ḍuko ḍụkụkẹ. Wa jịn apụ pụnda se pịkị ị́ ḅụ pịkịsomẹ. Mịna koromama iruo aye-ẹ; mịna ọkwẹịn ma iruo-a ọkwẹịnye.

¹⁴Karakara ḅẹrẹ ḅara mị wa anị desinmẹ, iḅiye pịkị ineda kpekima ḅo ẹkẹ. Karakara ḅẹrẹ mị amaogbo anị pụmbụmẹ, gbụkụkụye mịẹ mị ngịsị anịnyọ anị tọrụtolumakẹ.

¹⁵Karakaraye mịẹ mị, oforika-so-ọkụma, gbọrịḅọ nemikase siaye mịẹ ḅụ kele dachịẹmẹ ḅẹḅẹ, oriḅọ ḅe ori ọ̀ ḅụ ḍọkịḅo ọrịḅịa na ò jokoma ama ḅụ si-fịrị-nwẹngịḅọ ḅaraḅụ fomuḅara dagbẹịnmẹ.” Nyanaḅọ Ḅe mịn mị ọrịsam, anị pịkị ọ̀ ḅụḅẹlẹkẹ na karakara mịẹmịẹye ofori-ẹ nwọ ḅẹye mị.

¹⁶Anị ọ̀ ḅụgbiripumamẹ ḍọkịḅo ọrị na ḅarachụa ini pụndarịapụ ma pịrịarị gbọrịḅọ sọnị ofori-ẹ. Anịẹrẹchị ori oria kụrọ se ini ḍụapakụmaḅịa se owu mị inuma ọmụḅaraiḅi mị nyana ọkịḅịa.

¹⁷Karakaraye mịẹ mị, owuni ḅụchụaye ḅara ọ̀ nwọse anị chụaḅịa se oria nweni ḍụa kụrọ mị owuni okpochu kịkẹḅịa. Ye tọn se anịḅo mịẹkamịẹka ḅara sime-ẹ nwọḅẹ kụrọ kuḅie mị, ọ̀ nwọse ḅụchụaye mịẹ chụaḅịa, ọ̀ pịkị tọrụsiọrị se tomonima pịrị apụma ḅara so owu ḅiḅịa.

¹⁸Ori-na-tarakapụ ma ò fomuḅara se ini pịrịḅịa ini mịẹsaye ma la ḅaraḅụ, ḅọlọ amama ḅie angapụma sọnị.

¹⁹Ịrụapakapaka nyọ ọkịmun ịrụasọsọ nyọ la, tomoniḅọ goyegoye ori na oria kụrọ mị na ḍikiḅalafaḅịa. Owoi ideri mengi na kụrọ fọrụ na ḅo ọkụ ọ̀ nwọse ḅoḅịa.

²⁰Nyanaḅọ Ḅe nwọse oria tomonima ḅẹmẹ, “À Jerusalẹm ḅo owusọ ọ́ pịrịḅịa, se ómine ọ́mịna sima ḅụ vinpịkịsapụ mamgba ḍụaḅịa.

²¹Àrị ómine na ọḅọkụ fịḅịa: Ị̀ya kụrọ na ḍieaye ma na, à se ọ́ pịrị se àrị ọ́mịna aye sọ gbasoḅịa, pịkị mịọkụ ọkị tọrọkọ mun, ómine ị̀ ḅịpị pokiḅịa, ọ́ pịkị se ọ́mịna awọma na ọ́mịna furoḅie pakaḅoḅịa apụma na telima, na ini ị̀ ḅịpị poki gbaso.”