Read kirikeni Aịzaya 60 Bible Online

Aịzaya 60 - kirikeni bible

Aịzaya 60

¹Sịsẹ, Jerusalẹm, se ịrụa mị ḅịa ḅara ḅịa; Nyanaḅọ Ḅe boma mị ị́ ḅụ anị ḅịa pakaḅẹ!

²Ísí-a sẹma kanakana àrị gbẹịnḅịa, Ọkụma Nyanaḅọ Ḅe enekuḅu mị ị́ya ọgọnọ anị ḅịa ḅịa; Oria boma mị ḅe enekuḅu mị ḅe ḅịa ị́rị́ na simeḅịa.

³Ini jịn à sẹ jine ị́ya enekuḅu ḅie chuḅịa, Pịkị amanyanapụ na ọkịḅo ị́ya ịwọma-ḅo-arị ene mị ḅie chuḅịa.

⁴Ị́ ḅụ ḍiki kelema se pakarịye mị ọrị: Ị́ya tomonima ini ama ḅoḅịa ẹrẹchị kpokponimaḅẹ! Ị́ya owuapụ awọma ḅọlọ nyọ ḅụ ini ḅoḅịa; Kala awọmẹnị deki ọkụ ini nwọse ị́ya eremeni awọma dekiḅịa.

⁵Ị́ mịn mị ọrịḅịa se ḅieḅẹlẹ ị́ ḅie ḅeinḅịa. Ḅieḅẹlẹ ḅụ ị́ ḅụgeregereḅịa. Sime sẹma pịrị ala mị ini se ḅo ị́ pịrịḅịa; Inia ngọma tọrụ mị saḅakoro ḅụ àrị ḅoḅịa.

⁶Midia na Ifa na ḅieḅụ ike-nambulo kpo ḅụ ḅoḅịa. Shiba ḅieḅụ àrị goli na insẹnsị na se ḅoḅịa. Tomoni Tamụnọ Ḅe mịẹsaye ma ḅe iḅi ḅẹrẹ ḍukoḅịa!

⁷Kida na Nebaịọt anana mamgba Ini se ḅo ọ́ pịrịḅịa agbamịẹaye ḅaraḅụ Se ómine àrị se agba mịẹ Nyanaḅọ Ḅe pịrị se ò ḅieḅẹlẹmaḅịa. Nyanaḅọ Ḅe ori oria Oputẹkẹwarị mị mịẹse anị ḅo boma nyanatẹịn ḅọrọsa sịkịmamgba nẹngịḅịa.

⁸Ma nde onwoin-arụ soḅuno foinma ḅọrọ àrị ọkụ ḅọrọ-ao, Ama ḅoarị okuku ma sime ọkụ?

⁹Àrị anị ḅọlọju ḅụ ḅoarị onwoin-arụ-ẹ, Anị Tamụnọ-a tomonima se ama ḅoaḅẹ. Ini seleḅa na goli na se chụa ḅoaḅẹ Nyanaḅọ Ḅe ẹrẹ mị osiḅịa ẹrẹchị, Fịafịa Izrẹl Tamụnọ Ḅe, Anị mịẹse sẹsẹ mamgba kụn se oria tomonima pịrịḅọ ḅe.

¹⁰Nyanaḅọ Ḅe nwọse Jerusalẹm mị ḅẹmẹ, “Igoniapụ ị́ya onu ma namaḅịa, Inia amanyanapụ pịkị fịrịnwẹngị ị́ pịrịḅịa. Ị̀ya ḅẹrẹḅuosọ ḅụ à fomuḅara se ị́ pịrịmẹ, Ọkụma mịọkụ àrị ị̀ya ḅẹlẹma na ḍikitịḅịfoin na se ị́ ḍieḅịa.

¹¹Ḅa-na-ḍin-na ḅụ ị́ya onu-a ḅọkọ ma finjiḅịa, Mịẹsosịkị sẹsẹ ma ḅe amanyanapụma Inia ngọ se ḅo ị́ pịrịḅịa ọkụ.

¹²Ọkụma fịrịnwẹngị ị́ pịrịka sẹma Gbọtụma faḅịa.

¹³“Paịn chịnma na, junipa ma na, pịkị saịprẹs ma na, Lẹbanọn piri ma ḅie iḅitẹịn chịnma, Ini se ḅo kpoto ị́ nama chịẹmaḅịa, Jerusalẹm, Mịẹsosịkị ị̀ya Oputẹkẹwarị mị ḍikitọrụgbẹịnḅịa ọkụ, Mịẹsosịkị ị̀ya opuama mị boma nyanaḅịa ọkụ.

¹⁴Ị́ pụndapụ ma inia furoḅie apụ ḅo Kụn se ị́ pịrịḅụ tịḅịtu ị́ pịrịḅịa. Gbọrị-sịkị ḅụ ị́ ḍikisimapụ mamgba ḅo ị́ ḅụọ-chuku tẹkẹḅịa. Ini nwọse ị́ chịnḅịa ‘Nyanaḅọ Ḅe oria Opuama,’ ‘Zaịyọn, Izrẹl Fịafịa Tamụnọ Ḅe Opuama.’

¹⁵“Ini ngịsị ḅarị ị́ sịkị pịkị taraka se ị́ wẹrịma ẹkẹ, Fa se gulugulusa opuama. Àrị ị́ mịẹḅịa ị́ opu sọ pịkị ḍikitọrụgbẹịnḅịa. Nweni-a ḅieḅẹlẹma gbasoḅịa nyọ.

¹⁶Sẹsẹ na amanyanapụ na ị́ abalaḅịa Tọkụ yi nyengiḅọ árịa tọkụ ḍikiḍiki ḅara. Ị́ nemiḅịa na Ị̀rị̀, Nyanaḅọ Ḅe anị ị́ ḍụaye-ẹ, Na Izrẹl opu Tamụnọ Ḅe anị ḅụfụka ḅie ị́ fimaye-ẹ.

¹⁷“Àrị alapẹlẹka ọkịḅo ị́ pịrị na karaka à goli ọkịḅo ị́ pịrịḅịa, Ikulele na chịn na karaka seleḅa na alapẹlẹka na-ẹ. Ḍụparị mgbọlụ na karaka ikulele-ẹ. Ḅẹrẹtọn ị́ pịrịapụ ma ini ḅarị ị́ pụnda ẹkẹ; Àrị ini mịẹḅịa ini karakaraye ḅụ na dein na ḅụ ḅẹrẹtọnḅịa.

¹⁸Kụrọ mịẹmịẹaye ḅe nyọ fiema ọ́ ḅarị naa ẹkẹ; Ị́ya sẹ mị ḅarị kan gulugulu ẹkẹ. Àrị ị́ kikima pịkị owusọ ị́ pịrịḅịa onu nyọ kikima ḅara; Ị́ ị̀ bomaḅịa anịatịḅị àrị ị́ ḍụasam.

¹⁹“Ịrụa mị ḅarị enekaka ḅụ ị́ya tọnjie sọ ẹkẹ Akalụ mị sọ ḅarị pịkị ḍin ḅụ ị́ya tọnjie sọ ẹkẹ; Ị̀rị̀, Nyanaḅọ Ḅe, ị́ya tọnjie sọ gbasoḅịa; Ị̀ya boma mị ḅe tọnjie mị ị́ya ọgọnọ ḅịa ḅịa.

²⁰Ị́ya kururu enema ḅo kulumaḅịa. Ị̀rị̀, Nyanaḅọ Ḅe, ị́ya tọnjie sọ gbasoḅịa, Anị ḅọlọ-a ḍin latẹịn ịrụa na akalụ na nẹngịḅịa.

²¹Ị́ya tomoni mamgba karakaraye mị mịẹḅịa, Ama mị pịkị iniaye sọ gbasoḅịa. Ị̀rị̀ ini ḍipi koromamẹ, Ị̀rị̀ ini tẹmẹmẹ, Ị̀ya opu mị ḍuko finjima nweni mamgba pịrịḅịaye gose.

²²Ị́ya bokatẹịn pịkị ḅụ iderimatẹịn furo mị Anị ḅo kụrọ sẹ opu sọ ọkụ sọḅịa. Sịkị mị ḅo kara gbasịḅịa sịkị, À mịẹḅịa anị sarasarama kiri ọkị. Ị̀rị̀ anị Nyanaḅọ Ḅe-ẹ!”